ສປປ ລາວ ແລະ ສະຫະພັນ ຣັດເຊຍ ສືບຕໍ່ຍົກລະດັບການຮ່ວມມືສອງຝ່າຍ

ໃນວັນທີ 29-30 ພະຈິກ ຜ່ານມາ ໄດ້ມີການຈັດກອງປະຊຸມຄະນະກໍາມາທິການຮ່ວມມືດ້ານເສດສະກິດ-ການຄ້າ ແລະ ວິທະຍາສາດ-ເຕັກນິກ ລາວ-ຣັດເຊຍ ຄັ້ງທີ XVII ຂຶ້ນ ທີ່ ກະຊວງແຜນການ ແລະ ການລົງທຶນ ພາຍໃຕ້ການເປັນປະທານຮ່ວມ ຂອງທ່ານ ຄໍາເຈນ ວົງໂພສີ ລັດຖະມົນຕີ ກະຊວງແຜນການ ແລະ ການລົງທຶນ ແຫ່ງ ສປປ ລາວ ແລະ ທ່ານ ອີເຣັກ ໄຟຊູລິນ ລັດຖະມົນຕີກະຊວງກໍ່ສ້າງ, ເຄຫາສະຖານ ແລະ ສາທາລະນຸປະໂພກ ແຫ່ງ ສະຫະພັນ ຣັດເຊຍ. ມີຜູ້ຕາງໜ້າ ຈາກກະຊວງ ຂະແໜງການ, ສະຖານເອກອັກຄະລັດຖະທູດ, ແລະ ພາກເອກະຊົນ ຂອງສອງຝ່າຍເຂົ້າຮ່ວມ. ການຮ່ວມມື ລາວ-ຣັດເຊຍ ແມ່ນມີກົນໄກປະຊຸມຮ່ວມກັນທຸກໆປີ ແລະ ພັດປ່ຽນກັນເປັນເຈົ້າພາບ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານ ສະຫະພັນ ຣັດເຊຍ. ຈຸດປະສົງຂອງກອງປະຊຸມ ຄະນະກໍາມາທິການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ຣັດເຊຍ ຄັ້ງທີ XVII ແມ່ນທົບທວນ ແລະ ຕີລາຄາຄືນ ຜົນຂອງການຕົກລົງ, ຂໍ້ສະເໜີຕ່າງໆກ່ຽວກັບບັນຫາຄົງຄ້າງໃນຂອບການຮ່ວມມືສອງຝ່າຍ ລວມທັງການຈັດຕັ້ງປະຕິບັດຂໍ້ຕົກລົງໃນບົດບັນທຶກກອງປະຊຸມ ຄະນະກຳມາທິການຮ່ວມມື ລາວ-ຣັດເຊຍ ຄັ້ງທີ 16 ແລະ ຮັບຮອງເອົາບົດບັນທຶກກອງປະຊຸມຄະນະກຳມະການຮ່ວມມື ລາວ-ຣັດເຊຍ ຄັ້ງທີ 17 ຊຶ່ງປະກອບມີ ການຮ່ວມມືໃນຂົງເຂດຈຸດສຸມເປັນຕົ້ນແມ່ນ: ການຄ້າ ແລະ ການລົງທຶນ, ອຸສາຫະກຳ, ພະລັງງານ, ຂົນສົ່ງ, ໄອຊີທີ, ວິທະຍາສາດ ແລະ ການສຶກສາ, ວັດທະນະທຳ ແລະ ສື່ມວນຊົນ, ການທ່ອງທ່ຽວ, ການປ່ຽນແປງດິນຟ້າອາກາດ, ສາທາລະນະສຸກ, ກະສິກຳ ແລະ ການຮ່ວມມື ໃນຂົງເຂດອື່ນໆ. ໃນນີ້, ອັນພົ້ນເດັ່ນທີ່ເຫັນໄດ້ແມ່ນການເພີ່ມທະວີຊຸກຢູ້ໃນຂະແໜງການສຶກສາ, ຝ່າຍຣັດເຊຍ ແມ່ນມີຄວາມພ້ອມ ທີ່ຈະສືບຕໍ່ຈັດສັນໂຄຕາ ເພື່ອໃຫ້ນັກສຶກສາລາວສາມາດເຂົ້າສຶກສາໃນສະຖາບັນການສຶກສາຊັ້ນສູງ ຂອງ ຣັດເຊຍ, ໂດຍພິຈາລະນາຕາມຄວາມຕ້ອງການ ຂອງຝ່າຍລາວ ໃນສົກຮຽນ ປີ 2023-2024, ຈຳນວນໂຄຕາປະຈຳປີແມ່ນເພີ່ມຂຶ້ນເປັນ 100 ຄົນ; ດຶງດູດນັກທ່ອງທ່ຽວ ຈາກ ສ. ຣັດເຊຍ ໃຫ້ຫຼາຍຂຶ້ນ ຈາກແຕ່ລະປີມີປະມານ 23.000 ຄົນ/ປີ; ສະໜັບສະໜູນການຮ່ວມມື ແລກປ່ຽນຂໍ້ມູນນັກທຸລະກິດສອງຝ່າຍຮ່ວມມກັນໃຫ້ຫຼາຍຂຶ້ນ ພ້ອມສະເໜີໃຫ້ຝ່າຍລາວ ພິຈາລະນາຄວາມເປັນໄປໄດ້ ຂອງການເຂົ້າຮ່ວມການຈັດຕັ້ງປະຕິບັດໂຄງການ ຢູ່ ເຂດເສດຖະກິດພິເສດຕາເວັນອອກໄກ ຣັດເຊຍ (Russian Far East Special Economic Zones, ເປັນຕົ້ນແມ່ນຢູ່ເຂດພັດທະນາທີ່ລໍ້າໜ້າ (Territories of Advanced Development) ແລະ ທ່າເຮືອ ຂອງ ເມືອງວະລາດິໂວສະຕັອກ (Free Port of Vladivostok); ສືບຕໍ່ສົ່ງເສີມໂຄງການສວນພຶກສາສາດ, ວິທະຍາສາດ ແລະ ການສຶກສາ ທີ່ເປັນໂຄງການຮ່ວມມືຂອງສອງປະເທດ ຢູ່ ແຂວງວຽງຈັນ ສປປ ລາວ; ແລະ ເຫັນດີສຶກສາຄວາມເປັນໄປໄດ້ໃນການຮ່ວມມືຂຸດຄົ້ນແຮ່ທາດທີ່ຫາຍາກອື່ນໆໃນ ສປປ ລາວ. 
ໃນຕອນທ້າຍ, ທັງສອງຝ່າຍໄດ້ມີພິທີເຊັນບົດບັນທຶກ 2 ສະບັບ ຄື: 1. ບົດບັນທຶກກອງປະຊຸມຄະນະກຳມາທິການ ລາວ-ຣັດເຊຍ ຄັ້ງທີ 17 ແລະ 2. ບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງວິທະຍາສາດ ແລະ ການສຶກສາຊັ້ນສູງ ຂອງສະມາພັນຣັດເຊຍ ໃນຂົງເຂດການສຶກສາຊັ້ນສູງ. (ຂ່າວ: ກະຊວງ ຜທ)