ເພື່ອສືບຕໍ່ເພີ່ມທະວີຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ກໍຄືການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ ແລະ ຍີ່ປຸ່ນ ໃຫ້ໄດ້ຮັບການພັດທະນາຍິ່ງໆຂຶ້ນ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ປະເທດຍີ່ປຸ່ນ ຢ່າງເປັນທາງການ, ໃນວັນທີ 7-11 ພະຈິກ 2023, ຕາມຄຳເຊື້ອເຊີນຂອງ ທ່ານ ນາງ ຄາມິກາວະ ໂຢໂກະ (KAMIKAWA Yoko) ລັດຖະມົນຕີກະຊວງການຕ່າງປະເທດ ແຫ່ງ ຍີ່ປຸ່ນ.
ກອງປະຊຸມພົບປະສອງຝ່າຍ ລະຫວ່າງ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງ ຄາມິກາວະ ໂຢໂກະ ລັດຖະມົນຕີກະຊວງການຕ່າງປະເທດຍີ່ປຸ່ນ ໄດ້ມີຂຶ້ນໃນຕອນແລງຂອງວັນທີ 10 ພະຈິກ 2023, ທີ່ ເຮືອນຮັບແຂກຂອງກະຊວງການຕ່າງປະເທດຍີ່ປຸ່ນ. ໃນໂອກາດນີ້, ສອງຝ່າຍ ໄດ້ປຶກສາຫາລື ແລະ ທົບທວນຄືນການພົວພັນຮ່ວມມື ລາວ-ຍີ່ປຸ່ນ ໃນໄລຍະຜ່ານມາ, ໂດຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ກໍຄື ການເປັນຄູ່ຮ່ວມຍຸດທະສາດ ລະຫວ່າງ ສປປ ລາວ - ຍີ່ປຸ່ນ ທີ່ສືບຕໍ່ໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ, ສະແດງອອກຄື ການນຳຂັ້ນສູງຂອງສອງປະເທດ ໄດ້ມີການພົບປະແລກປ່ຽນຢ້ຽມຢາມຢ່າງເປັນປົກກະຕິ, ປະຊາຊົນສອງປະເທດ ໄດ້ມີການໄປມາຫາສູ່ກັນ ຢ່າງເປັນປະຈຳ, ການຮ່ວມມືສອງຝ່າຍໃນຂະແໜງການຕ່າງໆ ກໍໄດ້ຮັບການເສີມຂະຫຍາຍ ແລະ ຈັດຕັ້ງປະຕິບັດຢ່າງເປັນຮູບປະທຳ ແລະ ມີຜົນສຳເລັດເປັນກ້າວໆມາ.
ພ້ອມດຽວກັນນີ້, ສອງຝ່າຍ ໄດ້ປຶກສາຫາລືທິດທາງແຜນການໃນຕໍ່ໜ້າ, ໂດຍເຫັນດີໃຫ້ ສອງກະຊວງການຕ່າງປະເທດ ລາວ ແລະ ຍີ່ປຸ່ນ ສືບຕໍ່ເປັນໃຈກາງໃນການປະສານສົມທົບກັນຊຸກຍູ້ໃຫ້ສືບຕໍ່ມີການພົບປະແລກປ່ຽນຂອງບັນດາການນຳສອງປະເທດ ລາວ-ຍີ່ປຸ່ນ, ສືບຕໍ່ຊຸກຍູ້ການຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືຂອງສອງລັດຖະບານ ລາວ-ຍີ່ປຸ່ນ ທີ່ໄດ້ລົງນາມແລ້ວນັ້ນ ໃຫ້ປະສົບຜົນສຳເລັດຕາມຄາດຫມາຍ. ພ້ອມນີ້, ຝ່າຍລາວ ສະເໜີໃຫ້ສືບຕໍ່ການຈັດກອງປະຊຸມປຶກສາຫາລື ລະ ຫວ່າງ ພາກລັດ ແລະ ເອກະຊົນ ລາວ-ຍີ່ປຸ່ນ (Lao-Japan Public and Private Dialogue) ປະຈຳປີ ຢ່າງເປັນປົກກະຕິ ເພື່ອປັບປຸງສະພາບແວດລ້ອມການລົງທຶນຢູ່ ສປປ ລາວ, ອັນຈະເປັນການສົ່ງເສີມການລົງທຶນຂອງບັນດາປະເທດເພື່ອນມິດອື່ນໆເຊັ່ນກັນ, ຊຸກຍູ້ການຮ່ວມມືດ້ານການຄ້າສອງຝ່າຍ ລາວ ແລະ ຍີ່ປຸ່ນ, ການລົງທຶນຂອງພາກທຸລະກິດຍີ່ປຸ່ນ ຢູ່ ສປປ ລາວ ເພີ່ມຂຶ້ນ, ລວມທັງການສືບຕໍ່ສົ່ງເສີມການໄປມາຫາສູ່ຂອງປະຊາຊົນສອງຊາດ ກໍຄືການທ່ອງທ່ຽວ ແລະ ອື່ນໆ. ພ້ອມດຽວກັນນີ້, ສອງຝ່າຍ ເຫັນດີຈະສືບຕໍ່ປຶກສາຫາລື ແລະ ເຮັດວຽກຮ່ວມກັນຢ່າງໃກ້ຊິດ ເພື່ອກະກຽມໃຫ້ແກ່ ການຈັດກອງປະຊຸມ ອາຊຽນ-ຍີ່ປຸ່ນ ສະໄໝພິເສດ ເພື່ອສະເຫຼີມສະຫຼອງມິດຕະພາບ ແລະ ການຮ່ວມມື ອາຊຽນ-ຍີ່ປຸ່ນ ຄົບຮອບ 50 ປີ ໃນເດືອນທັນວາ 2023, ການກະກຽມຄວາມພ້ອມສໍາລັບການເປັນປະທານອາຊຽນຂອງ ສປປ ລາວ ໃນປີ 2024 ແລະ ການຈັດປີທ່ອງທ່ຽວລາວ 2024, ການກະກຽມສະເຫຼີມສະຫຼອງວັນສ້າງຕັ້ງສາຍພົວພັນການທູດ ສປປ ລາວ - ຍີ່ປຸ່ນ ຄົບຮອບ 70 ປີ (5 ມິນາ 1955) ກໍຄື ການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ຄົບຮອບ 10 ປີ ໃນປີ 2025 ທີ່ຈະມາເຖິງນີ້. ສອງຝ່າຍຍັງໄດ້ຢືນຢັນຄືນຈະສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອຊຶ່ງກັນ ແລະ ກັນ ເພື່ອການພັດທະນາຂອງຂົງເຂດ ແລະ ພາກພື້ນ, ໂດຍສະເພາະ ການຮ່ວມມື ອາຊຽນ-ຍີ່ປຸ່ນ ໃຫ້ແໜ້ນແຟ້ນຍິ່ງໆຂຶ້ນ.
ໂອກາດດຽວກັນນີ້, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນຊ່ວຍເຫຼືອ ຈາກລັດຖະບານ ແລະ ປະຊາ ຊົນຍີ່ປຸ່ນ ຕະຫຼອດໄລຍະຜ່ານມາ, ໂດຍສະເພາະການຊ່ວຍເຫຼືອທາງການເພື່ອການພັດທະນາ (ODA) ໃນບັນດາຂະແໜງການຕ່າງໆ ເປັນຕົ້ນການພັດທະນາຊັບພະຍາກອນມະນຸດ, ສາທາລະນະສຸກ, ກະສິ ກຳ-ປ່າໄມ້, ໂຄງລ່າງພື້ນຖານ, ການເກັບກູ້ລະເບີດບໍ່ທັນແຕກ (UXO) ແລະ ອື່ນໆ, ພິເສດ ກໍແມ່ນການຊ່ວຍເຫຼືອ ສປປ ລາວ ໃນການກະກຽມເປັນປະທານອາຊຽນ ປີ 2024 ທີ່ຈະມາເຖິງ ຊຶ່ງທັງໝົດນີ້ ໄດ້ປະກອບສ່ວນສໍາຄັນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ.
ໃນຂະນະດຽວກັນ, ທ່ານ ນາງ ຄາມິກາວະ ໂຢໂກະ ໄດ້ຢືນຢັນຄືນຄວາມໝາຍໝັ້ນຂອງລັດຖະບານຍີ່ປຸ່ນ ໃນການສືບຕໍ່ເສີມຂະຫຍາຍ ແລະ ຮັດແໜ້ນການພົວພັນຮ່ວມມືກັບ ລັດຖະບານລາວ, ພາຍໃຕ້ການເປັນຄູ່ຮ່ວມຍຸດທະສາດ ຍີ່ປຸ່ນ-ລາວ, ກໍຄື ການພົວພັນຮ່ວມມືໃນຂອບ ຍີ່ປຸ່ນ-ອາຊຽນ ໃຫ້ໄດ້ຮັບການພັດທະນາຍິ່ງໆຂຶ້ນ, ຈະໃຫ້ການສະໜັບສະໜູນຊ່ວຍເຫຼືອ ສປປ ລາວ ການເປັນປະທານອາຊຽນ ປີ 2024 ໃຫ້ປະສົບຜົນສໍາເລັດຕາມລະດັບຄາດໝາຍ.
ພາຍຫຼັງສຳເລັດກອງປະຊຸມພົບປະ, ສອງຝ່າຍ ຍັງໄດ້ຮ່ວມກັນລົງນາມເອກະສານແລກປ່ຽນ ໂຄງ ການປັບປຸງສະໜາມກິລາເຈົ້າອະນຸວົງ, ມູນຄ່າ 4.171 ລ້ານເຢນ, ຊຶ່ງແມ່ນໂຄງການຊ່ວຍເຫຼືອຂອງລັດຖະບານຍີ່ປຸ່ນ ແກ່ ສປປ ລາວ ແລະ ໂຄງການດັ່ງກ່າວຈະກາຍເປັນສັນຍາລັກທີ່ສຳຄັນຖັດຈາກ ຊ້າງ ແລະ ດອກຊາກຸຣະ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ ໃນປີ 2025 ທີ່ຈະມາເຖິງນີ້. ນອກຈາກນີ້, ສອງຝ່າຍ ກໍໄດ້ເຂົ້າຮ່ວມພິທີຖະແຫຼງຂ່າວຕໍ່ບັນດາສື່ມວນຊົນ ກ່ຽວກັບ ຜົນສຳເລັດຂອງການພົບປະສອງຝ່າຍ ລາວ-ຍີ່ປຸ່ນ ໃນຄັ້ງນີ້.
ໃນວັນດຽວກັນນີ້, ທ່ານ ສະເຫຼີມໄຊ ກົມມະສິດ ຍັງໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ພົບປະເຮັດວຽກກັບພາກສ່ວນຫົວໜ່ວຍທຸລະກິດ ເພື່ອປຶກສາຫາລືກ່ຽວກັບການຮ່ວມມືໃນຕໍ່ໜ້າ ເປັນຕົ້ນ ບໍລິສັດ ANA FOODS ແລະ ບໍລິສັດ Nissan Steel.
(ຂ່າວ-ພາບ: ກົມການຂ່າວ ກຕທ)
ຄໍາເຫັນ