ສປສສ ທົບທວນການເຄື່ອນໄຫວວຽກງານກໍ່ສ້າງພັກ-ພະນັກງານ

ກອງປະຊຸມຄັ້ງນີ້, ໄດ້ພ້ອມກັນຈັດຕັ້ງເຊື່ອມຊຶມເອກະສານທີ່ສໍາຄັນຂອງຂັ້ນເທິງ, ທົບທວນຄືນກ່ຽວກັບການເຄື່ອນໄຫວວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງໃນໄລຍະໜຶ່ງປີຜ່ານມາ ເພື່ອຊອກໃຫ້ເຫັນຈຸດດີດ້ານຕັ້ງໜ້າ ກໍຄືຜົນສໍາເລັດທີ່ຈະຕ້ອງໄດ້ຮັກສາ ແລະ ເສີມຂະຫຍາຍໃຫ້ດີຂຶ້ນເລື້ອຍໆ ແລະ ຈຸດອ່ອນຂໍ້ຄົງຄ້າງທີ່ຈະຕ້ອງສຸມໃສ່ແກ້ໄຂໃຫ້ທັນກັບສະພາບ, ບົນພື້ນຖານການຄົ້ນຄວ້າແນວທາງນະໂຍບາຍຂອງພັກກ່ຽວກັບວຽກງານຈັດຕັ້ງທີ່ກອງປະຊຸມໃຫຍ່ຄັ້ງທີ XI ຂອງພັກໄດ້ກໍານົດອອກ ເພື່ອກ້າວໄປສູ່ການກໍານົດທິດທາງ, ວິທີການເຄື່ອນໄຫວຢ່າງເປັນປົກກະຕິ ເຮັດໃຫ້ການເຄື່ອນໄຫວວຽກງານມີປະສິດທິພາບ ແລະ ໄດ້ຮັບປະສິດທິຜົນສູງ ທັງສອດຄ່ອງກັບສະພາບຄວາມເປັນຈິງໃນປັດຈຸບັນ ແນໃສ່ປັບປຸງຍົກສູງຄຸນນະພາບ ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງສານປະຊາຊົນໃນໄລຍະໃໝ່ໃຫ້ດີຂຶ້ນ ສາມາດຮັບປະກັນຕໍ່ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ພ້ອມກັນນັ້ນກໍເປັນພື້ນຖານໃຫ້ການວາງທິດທາງຈຸດສຸມຂອງວຽກງານຈັດຕັ້ງ, ກໍ່ສ້າງພັກ-ພະນັກງານໃນລະບົບສານປະຊາຊົນສະເພາະໜ້າ ແລະ ຍາວນານ.

ກອງປະຊຸມຍັງໄດ້ຮັບຟັງການເຜີຍແຜ່ບົດສູນທອນພົດຂອງສະຫາຍ ທອງລຸນ ສີສຸລິດ ເລຂາທິການໃຫຍ່

ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ໃນພິທີສະເຫຼີມສະຫຼອງວັນສ້າງຕັ້ງຄະນະ ຈັດຕັ້ງສູນກາງພັກ ຄົບຮອບ 70 ປີ, ບົດລາຍງານຂອງສະຫາຍນາງ ສີໃສ ລືເດດມູນສອນ ກໍາມະການກົມ ການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ກ່ຽວກັບການກໍາເນີດ ແລະ ການເຄື່ອນໄຫວແຕ່ລະໄລຍະຂອງຄະນະຈັດຕັ້ງສູນກາງພັກ ຕະຫຼອດ 70 ປີ, ເອກະສານປາຖະກະຖາ ມູນເຊື້ອ 70 ປີວຽກງານຈັດຕັ້ງຂອງພັກປະຊາຊົນ ປະຕິວັດລາວ ແລະ ເຜີຍແຜ່ຄຳແນະນຳສະບັບເລກທີ 28/ຄຈສພ, ລົງວັນທີ 14 ກຸມພາ 2025 ຂອງຄະນະຈັດຕັ້ງສູນກາງພັກກ່ຽວກັບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ.

ຕອນທ້າຍກອງປະຊຸມຍັງໄດ້ຮັບຟັງການໂອ້ລົມຂອງສະຫາຍນາງ ວຽງທອງ ສີພັນດອນ ເພື່ອເປັນເຂັມຊີ້ທິດເຍືອງທາງໃຫ້ວຽກງານກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງຂອງສານປະຊາຊົນສູງສຸດ ໃນຕໍ່ໜ້າ ໂດຍສະເພາະທິດທາງແຜນການທີ່ໄດ້ກຳນົດໄວ້ໃຫ້ໄດ້ຮັບຜົນສຳເລັດເປັນກ້າວໆ.