ທ່ານ ທອງສະລິດ ມັງໜໍ່ເມກ ກ່າວວ່າ: ຕໍ່ບັນຫາດັ່ງກ່າວ, ກະຊວງ ສສກ ໄດ້ມີວິທີການ ໃນການແກ້ໄຂແຕ່ລະຊັ້ນຮຽນດັ່ງນີ້: ສະພາບການປະລະການຮຽນ ຍັງເປັນບັນຫາສິ່ງທ້າທາຍໃຫຍ່ສໍາລັບຂົງເຂດສຶກສາ ແຕ່ໂດຍ ລວມແລ້ວຫຼາຍຕົວຊີ້ວັດທີ່ສະພາແຫ່ງຊາດໄດ້ຮັບຮອງມີທ່າອ່ຽງດີຂຶ້ນ ເມື່ອສົມທຽບກັບປີຜ່ານມາ. ໃນນັ້ນ, ສົກປີ 2025-2026 ການບັນລຸອັດຕາການເຂົ້າຮຽນໃໝ່ສຸດທິຂັ້ນ ປ1 ແມ່ນເພີ່ມຂຶ້ນ 100%; ການຫຼຸດລົງຂອງອັດຕາການປະລະການຮຽນໃນຊັ້ນມັດທະຍົມຕອນຕົ້ນຈາກ 12.4% ເປັນ 10.9% ຜົນສໍາເລັດດັ່ງກ່າວແມ່ນໝາກຜົນຂອງການຈັດຕັ້ງປະຕິບັດຫຼາຍມາດຕະການ ໂດຍສະເພາະ ການຍົກສູງບົດບາດຄວາມສໍາຄັນຂອງການສຶກສາ, ໂຄງການນໍານ້ອງກັບສູ່ໂຮງຮຽນ, ການສະໜອງອາຫານທ່ຽງໃຫ້ນ້ອງນັກຮຽນຈໍານວນ 217,000 ຄົນ, ໃຫ້ເງິນອຸດໜູນເບ້ຍລ້ຽງໃຫ້ນັກຮຽນຜູ້ທຸກຍາກ ແລະ ດ້ອຍໂອກາດຈໍານວນ 1,000 ຄົນ (ຂັ້ນປະຖົມ), 4,148 ຄົນ (ຊັ້ນມັດ ທະຍົມ). ນອກຈາກນັ້ນ, ຍັງໄດ້ສະໜອງທຶນການສຶກສາຈໍານວນ 153 ທຶນໃຫ້ນັກຮຽນເກັ່ງ. ການສຶກສາສາຍອາຊີວະ ໄດ້ດໍາເນີນການສອນສາມັນວິຊາຊີບຄູ່ຂະໜານໃນ 9 ສາຂາວິຊາຊີບ (ສ້ອມແປງຄອມພິວເຕີ, ໄຟຟ້າ, ປຸງແຕ່ງອາຫານ, ຕັດຫຍິບ ແລະ ອື່ນໆ ຢູ່ຕາມໂຮງຮຽນກິນນອນຊົນເຜົ່າ ແລະ ໂຮງຮຽນຕ່າງໆ ຊຶ່ງມີຜູ້ເຂົ້າຮຽນຈໍານວນ 1,762 ຄົນ. ການສຶກສາຊັ້ນສູງ ໄດ້ປະຕິບັດນະໂຍບາຍຕໍ່ນັກຮຽນທີ່ທຸກຍາກ ໃນເຂດຫ່າງໄກສອກຫຼີກ ໄດ້ເຂົ້າຮຽນໃນສາຍການສຶກສາຊັ້ນສູງ ໂດຍການສະໜັບສະໜູນທຶນການສຶກສາ 1,500 ທຶນ ໃນສົກຮຽນ 2025-2026 ແລະ 2026-2027. ໃນສົກປີ 2026-2027 ມີຈໍານວນນັກສຶກສາທີ່ກໍາລັງຮຽນຢູ່ 4 ມະ ຫາວິທະຍາໄລຄື: ມະຫາວິທະຍາໄລແຫ່ງຊາດ (ມຊ) ທັງໝົດ 14,564 ຄົນ, ລົງທະບຽນຮຽນເຂົ້າໃໝ່ 3,776 ຄົນ; ມະຫາວິທະຍາໄລສຸພານຸວົງ ຈໍານວນນັກສຶກສາທີ່ກໍາລັງຮຽນຢູ່ທັງໝົດ 2,494 ຄົນ, ລົງທະບຽນເຂົ້າຮຽນ 727 ຄົນ; ມະຫາວິທະຍາໄລສະຫວັນນນະເຂດ ຈໍານວນນັກສຶກສາກໍາລັງຮຽນຢູ່ທັງໝົດ 2,150 ຄົນ, ລົງທະບຽນເຂົ້າຮຽນໃໝ່ 750 ຄົນ; ມະຫາວິທະຍາໄລຈໍາປາສັກ ຈໍານວນນັກສຶກສາກໍາລັງຮຽນຢູ່ທັງໝົດ 2,333 ຄົນ, ລົງ ທະບຽນເຂົ້າຮຽນໃໝ່ 920 ຄົນ. ເຖິງແນວໃດກໍຕາມໃນ 9 ຄາດໝາຍທີ່ສະພາແຫ່ງຊາດຮັບຮອງມີ 4 ຄາດໝາຍ ທີ່ມີຄວາມຄືບໜ້າດີ ແລະ ຍັງອີກ 5 ຄາດໝາຍ ທີ່ຍັງບໍ່ທັນບັນລຸຕາມແຜນການ ເປັນຕົ້ນ ອັດຕາການປະລະຂອງນັກຮຽນຊັ້ນປະຖົມ, ການພັດທະນາວິຊາຊີບຄູແບບຕໍ່ເນື່ອງ, ອັດຕາມວນຊົນທຸກເພດ, ທຸກໄວເຂົ້າຮ່ວມຫັດກາຍບໍລິຫານ, ອອກກໍາລັງກາຍ ແລະ ຫຼິ້ນກິລາ. ສາເຫດຕົ້ນຕໍທີ່ບໍ່ທັນບັນລຸຕາມຄາດໝາຍແມ່ນມາຈາກສະພາບຄວາມຫຍຸ້ງຍາກທາງດ້ານເສດຖະກິດທີ່ເຮັດໃຫ້ນັກຮຽນ ແລະ ຄູບາງສ່ວນຕ້ອງອອກໄປຊອກວຽກເຮັດງານທໍາ ເພື່ອຫາລາຍໄດ້ລ້ຽງຄອບຄົວ; ການຂາດແຄນຄູໃນບາງທ້ອງຖິ່ນ, ບາງວິຊາ ໂດຍສະເພາະເຂດຫ່າງໄກສອກຫຼີກ, ການຂາດແຄນງົບປະມານບໍລິຫານ ແລະ ອຸປະກອນທີ່ຈຳເປັນ ເພື່ອໃຫ້ຂັ້ນທ້ອງຖິ່ນຕິດຕາມ, ປະເມີນຜົນບັນດາຕົວຊີ້ວັດ ຍັງບໍ່ທັນມີຄວາມຊັດເຈນ ແລະ ຕໍ່ເນື່ອງເທົ່າທີ່ຄວນ.
ທ່ານລັດຖະມົນຕີກະຊວງ ສສກ ກ່າວຕື່ມວ່າ: ຕໍ່ບັນຫາທີ່ກ່າວມານັ້ນ, ກະຊວງ ສສກ ໄດ້ມີຄວາມພະຍາມແກ້ໄຂຢ່າງເປັນລະບົບ ໂດຍໄດ້ປະຕິຮູບໂຄງສ້າງ, ປັບປຸງລະບົບການສຶກສາສາມັນຈາກ 5+4+3 ມາເປັນ 6+3+3, ປັບປຸງລະບົບສ້າງຄູຄືນໃໝ່ດ້ວຍການຍຸບໂຮມບັນດາວິທະຍາໄລສ້າງຄູໃນທົ່ວປະເທດ ທີ່ຍັງມີລັກສະນະກະແຈກກະຈາຍບໍ່ລວມສູນ ແລະ ສ້າງເປັນມະຫາວິທະຍາໄລສ້າງຄູແຫ່ງຊາດ; ຫັນປ່ຽນເອົາສະຖານການສຶກສາຈໍານວນໜຶ່ງ ຫັນເປັນໂຮງຮຽນສາມັນວິຊາຊີບ (ສິດສອນທັງລະບົບສາມັນ ແລະ ເພີ່ມທັກສະວິຊາຊີບຂັ້ນຕົ້ນ); ຂຶ້ນແຜນສໍາຫຼວດ ແລະ ສ້ອມແປງບັນດາໂຮງຮຽນທີ່ບໍ່ໄດ້ມາດຕະຖານ ຊຶ່ງປັດຈຸບັນມີ 1,059 ແຫ່ງຂັ້ນປະຖົມ ທີ່ຍັງບໍ່ທັນໄດ້ມາດຕະຖານເພື່ອປັບປຸງສະພາບແວດລ້ອມ ແລະ ສິ່ງອໍານວຍຄວາມສະດວກໃຫ້ນັກຮຽນດີຂຶ້ນກວ່າເກົ່າ.
ຄຽງຄູ່ກັນນັ້ນ, ກໍສຸມໃສ່ປັບປຸງຫຼັກສູດການສຶກສາຊັ້ນສູງ ໂດຍມີການສ້າງຫຼັກສູດໃໝ່ໃຫ້ສອດຄ່ອງກັບທ່າອ່ຽງລວມຂອງຍຸກສະໄໝ ແລະ ຄວາມຕ້ອງການຕົວຈິງຂອງການພັດທະນາ, ຍຸບບັນດາຫຼັກສູດທີ່ເຫັນວ່າມີຄົນສົນໃຈຮຽນໜ້ອຍ ແລະ ບໍ່ແທດເໝາະກັບສະພາບໃນປັດຈຸບັນ, ສົ່ງເສີມສະຖານການສຶກສາຊັ້ນສູງໃຫ້ຂະຫຍາຍພາກຄໍ່າ, ທ້າຍອາທິດ, ຮຽນອອນລາຍ/ປະສົມ ໃນສາຂາທີ່ສັງຄົມຕ້ອງການ ເພື່ອໃຫ້ຄົນເຮັດວຽກຮຽນຕໍ່ໄດ້.
ນອກຈາກບັນດາມາດຕະການ, ວິທີການທີ່ກ່າວມາແລ້ວ. ກະຊວງ ສສກ ໄດ້ມີກົນໄກກອງປະຊຸມສະຫຼຸບຕີລາຄາປະຈຳພາກຮຽນ ແລະ ກອງປະຊຸມຜູ້ບໍລິຫານການສຶກສາທົ່ວປະເທດປະຈຳແຕ່ລະປີ ຊຶ່ງໃນປີ 2026 ກໍໄດ້ວາງຄາດໝາຍສຸມໃສ່ແກ້ໄຂບັນຫາການປະລະການຮຽນ ແລະ ປັບປຸງຄຸນນະພາບຄູ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ