 |
ການເຄື່ອນໄຫວຄັ້ງນີ້, ໄດ້ພົບປະພໍ່ແມ່ປະຊາຊົນ ແລະ ອຳນາດການປົກຄອງເມືອງ ລວມມີ 4 ຈຸດຄື: ຈຸດບ້ານອຸດົມສຸກ ແລະ ຈຸດສະໂມສອນຂອງເມືອງ, ຈຸດບ້ານຫ້ວຍມະໄລ ແລະ ຈຸດບ້ານໂພນສະອອນ ຊຶ່ງໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາບ້ານ, ແຜນພັດທະນາເສດຖະກິດ-ສັງຄົມ ຂອງເມືອງໃນໄລຍະຜ່ານມາ ແລະ ບາງທິດທາງແຜນການໃນຕໍ່ໜ້າ. ຈາກນັ້ນ, ບັນດາທ່ານ ສສຊ ແລະ ສສຂ ກໍໄດ້ຜັດປ່ຽນກັນເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 10 ຂອງ ສະພາແຫ່ງຊາດ ຊຸດທີ IX ແລະ ກອງປະຊຸມສະໄໝວິສາມັນເທື່ອທີ 1, ກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງຄຳມ່ວນ ຊຸດທີ IV, ພ້ອມທັງໄດ້ສະແດງຄວາມຂອບໃຈຕໍ່ປະຊາຊົນຜູ້ມີສິດເລືອກຕັ້ງ ທີ່ໄດ້ໃຫ້ການສະໜັບສະໜູນໃນການເຄື່ອນໄຫວເປັນຕົວແທນແຫ່ງສິດ, ຜົນປະໂຫຍດຂອງປະຊາຊົນ ໃນຕະຫຼອດໄລຍະ 5 ປີທີ່ຜ່ານມາ, ສະແດງຄວາມຂອບໃຈພໍ່ແມ່ປະຊາຊົນ ທີ່ໄດ້ໃຫ້ຄວາມໄວ້ວາງໃຈ ເລືອກຕັ້ງເອົາມາເປັນຕົວແທນແຫ່ງສິດ ແລະ ຜົນປະໂຫຍດຂອງຕົນ.
 |
ມາຮອດປັດຈຸບັນນີ້, ແມ່ນເປັນວາລະສຸດທ້າຍ ໃນການປະຕິບັດໜ້າທີ່ຂອງ ສສຊ ຊຸດທີ IX ແລະ ສສຂ ຊຸດທີ IV, ຕໍ່ໄປກໍ່ຈະໄດ້ສືບຕໍ່ຈັດຕັ້ງປະຕິບັດ ເລືອກຕັ້ງເອົາ ສສຊ ຊຸດທີ X ແລະ ສສຂ ຊຸດທີ V ຊຶ່ງຈະໄດ້ດຳເນີນການປ່ອນບັດ ໃນວັນທີ 22 ກຸມພາ 2025 ທີ່ໃກ້ຈະມາເຖິງນີ້, ຄາດວ່າ ບັນດາທ່ານຜູ້ມີສິດເລືອກຕັ້ງຢູ່ໃນຂອບເຂດເມືອງນາກາຍ ຈະເຂົ້າຮ່ວມໃນບັ້ນເລືອກຕັ້ງເອົາຜູ້ແທນທັງສອງຊຸດນີ້ ໃຫ້ໄດ້ຕາມລະດັບຄາດໝາຍ ແລະ ຮັບປະກັນໃນ 4 ຄາດໝາຍໃຫຍ່ ທີ່ຄະນະກຳມະການ ການເລືອກຕັ້ງໄດ້ວາງອອກ.
(ຂ່າວ-ພາບ: ກອງຄໍາ)
ຄໍາເຫັນ