ສສຊ ແລະ ສສຂ ລົງເຄືີ່ອນໄຫວພົບປະຜູ້ມີສິດເລືອກຕັັ້ງ ຢູ່ເມືອງໄຊພູທອງ

ໂອກາດດັ່ງກ່າວ, ທ່ານ ນາງ ບຸນທະວີ ພິມວົງສາ ຄະນະພັກຮາກຖານ ກຸ່ມບ້ານຕ່າງໜ້າຂຶ້ນຜ່ານບົດສະຫຼຸບຂອງບ້ານໂດຍສັງເຂບ. ຈາກນັ້ນ, ບັນດາທ່ານ ສສຊ, ສສຂ ກໍໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ IV ໃຫ້ປະຊາຊົນຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈ, ທັງເປັນການລົງພົບປະຜູ້ມີສິດເລືອກຕັ້ງ ເພື່ອເປັນການເກັບກຳຄຳຄິດ-ຄຳເຫັນ ຕໍ່ວຽກງານການຄຸ້ມຄອງບໍລິຫານລັດ. ຈາກນັ້ນ, ກໍໄດ້ເປີດໂອກາດໃຫ້ການນໍາຂອງເມືອງ, ການຈັດຕັ້ງຂັ້ນບ້ານ ກໍຄືປະຊາຊົນພາຍໃນແຕ່ລະບ້ານໄດ້ຊັກຖາມ ແລະ ມີຄຳສະເໜີຂອງປະຊາຊົນຫຼາຍບັນຫາ ຊຶ່ງເປັນບັນຫາທີ່ຕິດພັນກັບການດຳລົງຊີວິດຂອງປະຊາຊົນ, ຕິດພັນກັບການພັດທະນາເສດຖະກິດ-ສັງຄົມ ໂດຍສະເພາະແມ່ນບັນຫາການພັດທະນາພື້ນຖານໂຄງລ່າງເປັນຕົ້ນແມ່ນ: ການສ້ອມແປງເສັ້ນທາງ, ການສ້ອມແປງຂົວ, ການສ້ອມແປງໂຮງຮຽນ ແລະ ບັນຫາອື່ນໆ. ຈາກນັ້ນ, ບັນດາທ່ານ ສສຊ ແລະ ສສຂ ກໍໄດ້ຕອບບັນຫາການຊັກຖາມຂອງ ພໍ່ແມ່ປະຊາຊົນເພື່ອໃຫ້ຮັບຮູ້ ແລະ ເຂົ້າໃຈເຖິງບັນຫາຕ່າງໆ ຕໍ່ກັບສະພາບການອັນລວມຕໍ່ກັບການພັດທະນາຂອງປະເທດເຮົາໃນໄລຍະປັດຈຸບັນ ພ້ອມທັງຮັບເອົາຄໍາສະເໜີຂອງອຳນາດການປົກຄອງບ້ານ ແລະ ພໍ່ແມ່ປະຊາຊົນໄປນຳສະເໜີ ຕໍ່ຂະແໜງການກ່ຽວຂ້ອງ, ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ. ພ້ອມນີ້ ສສຊ ແລະ ສສຂ ໄດ້ຮຽກຮ້ອງມາຍັງຜູ້ມີສິດເລືອກຕັ້ງ ກໍຄືພໍ່ແມ່ປະຊາຊົນຜູ້ທີ່ມີອາຍຸ 18 ປີຂຶ້ນໄປ ຈົ່ງພ້ອມພາກັນໄປໃຊ້ສິດປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນແຂວງ ຊຸດທີ V ທີ່ຈະຈັດຂຶ້ນພ້ອມກັນທົ່ວປະເທດໃນຄັ້ງວັນທີ 22 ກຸມພາ 2026 ທີ່ຈະມາເຖິງນີ້, ໃຫ້ເຕັມໄປດ້ວຍບັນຍາກາດຟົດຟື້ນ.

ໂອກາດນີ້, ຄະນະ ສສຊ, ສສຂ ກໍໄດ້ນຳເອົາອຸປະກອນການຮຽນຈໍານວນໜຶ່ງ, ປຶ້ມ 500 ຫົວ ແລະ ບິກຂຽນ 500 ກ້ານ ແລະ ເຄື່ອງນຸ່ງຮົ່ມຈຳນວນໜຶ່ງຄິດເປັນມູນຄ່າ 16 ລ້ານກວ່າກີບ.

(ແຫຼ່ງຂ່າວ: ແຂວງສະຫວັນນະເຂດ)