 |
ສະຫາຍ ບຸນຍະວັດ ນີຣະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ (ຍທຂ ນວ) ໄດ້ສະເໜີຮ່າງຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນວ່າດ້ວຍ ການຄຸ້ມຄອງລະບົບການບໍາບັດນໍ້າເປື້ອນໃນ ນວ ວ່າ: ໂຄງການບຳບັດນໍ້າເປື້ອນ ນວ, ພາຍໃຕ້ເງິນກູ້ຢືມບໍ່ມີດອກເບ້ຍ ຈາກລັດຖະບານຮົງກາລີ, ເລີ່ມຈັດຕັ້ງປະຕິບັດສໍາຫຼວດ-ອອກແບບ ແລະ ຮັບຮອງບົດສຶກສາຄວາມເປັນໄປໄດ້ໃນກາງປີ 2021 ແລະ ລົງມືກໍ່ສ້າງໃນຕົ້ນປີ 2023, ມາຮອດປັດຈຸບັນ ໂຄງການແມ່ນມີຄວາມຄືບໜ້າ 97,5% ຂອງແຜນການລວມ ແລະ ຄາດໝາຍໃຫ້ສໍາເລັດພາຍໃນເດືອນມີນາ 2026, ໂຄງການດັ່ງກ່າວ ຈະນໍາເອົານໍ້າເປື້ອນຈາກຕົວເມືອງໄປບຳບັດຢູ່ຈຸດດຽວເປັນການຫຼຸດຜ່ອນຜົນກະທົບອັນບໍ່ດີຕໍ່ສຸຂະພາບຂອງຄົນ, ສັດ ແລະ ລະບົບນິເວດອື່ນ ຕາມຮ່ອງນໍ້າທຳມະຊາດເຊັ່ນ: ຮ່ອງແກ, ຮ່ອງແຊງ ແລະ ບ່ອນອື່ນໆ. ພາຍຫຼັງການກໍ່ສ້າງໂຄງການສໍາເລັດຈະເຮັດໃຫ້ລະບົບບຳບັດນໍ້າເປື້ອນມີຄວາມຍືນຍົງ.
ຮ່າງຂໍ້ຕົກລົງຂອງທ່ານເຈົ້າຄອງ ນວ ວ່າດ້ວຍການຄຸ້ມຄອງລະບົບການບໍາບັດນໍ້າເປື້ອນໃນ ນວ ມີ 12 ໝວດ ແລະ 36 ມາດຕາ ເມື່ອຮ່າງຂໍ້ຕົກລົງສະບັບນີ້ຖືກຮັບຮອງ ແລະ ປະກາດໃຊ້ ຈະເປັນບ່ອນອີງໃຫ້ແກ່ພະແນກການທີ່ກ່ຽວຂ້ອງນໍາໄປໃຊ້ໃນການຄຸ້ມຄອງລັດ, ຄຸ້ມຄອງສັງຄົມ ໃນວຽກງານລະບົບບຳບັດນໍ້າເປື້ອນ, ປົກປັກຮັກສາສິ່ງແວດລ້ອມນໍ້າໃຫ້ມີປະສິດທິພາບ ປະຊາຊົນທຸກຊັ້ນຄົນ ອົງການຈັດຕັ້ງທຸກພາກສ່ວນທັງພາກລັດ-ເອກະຊົນ ແລະ ບັນດາຫົວໜ່ວຍທຸລະກິດ ໃຫ້ມີຄວາມຮັບຮູ້, ເຂົ້າໃຈ ແລະ ມີຄວາມຮັບຜິດຊອບໃນການຄຸ້ມຄອງລະບົບບຳບັດນໍ້າເປື້ອນຢ່າງຖືກວິທີ, ປະກອບສ່ວນໃນການຄຸ້ມຄອງບໍລິຫານຈັດການຢ່າງມີຄວາມເໝາະສົມໂດຍບໍ່ກະທົບກັບປະຊາຊົນທີ່ມີລາຍຮັບຕໍ່າ, ເປັນບ່ອນອີງໃຫ້ແກ່ລັດວິສາຫະກິດນໍ້າປະປາ ນວ ໄດ້ເຂົ້າໄປຄຸ້ມຄອງບໍລິຫານ ລະບົບສາຍທໍ່ ລະບົບປໍ້າສູບນໍ້າ ແລະ ໂຮງງານບຳບັດນໍ້າເປື້ອນໃຫ້ມີຄວາມຍືນຍົງ, ສາມາດນໍາໃຊ້ໄດ້ຍາວນານ, ສາມາດແກ້ໄຂບັນຫາສິ່ງແວດລ້ອມນໍ້າໃນຕົວເມືອງ ຊຶ່ງຈະເປັນໃບໜ້າໃໝ່ທີ່ຫຼຸດຜ່ອນບັນຫາກິ່ນເໝັນຍ້ອນນໍ້າເປື້ອນຕາມຮ່ອງນໍ້າສາທາລະນະ, ປະຊາຊົນໃນຕົວເມືອງຈະມີການໃຊ້ນໍ້າປະປາຢ່າງປະຢັດ, ເຮັດໃຫ້ບາງເຂດຂອງຕົວເມືອງມີນໍ້າໃຊ້ເພີ່ມຂຶ້ນ, ບັນຫາລະບົບນິເວດວິທະຍາໂດຍສະເພາະສັດນໍ້າທີ່ອາໄສຢູ່ຕາມບຶງທາດຫຼວງ ແລະ ຄອງ ນໍ້າວຽງຈັນ ຈະມີການຟື້ນໂຕກັບມາດີຂຶ້ນ, ປະຊາຊົນທີ່ອາໄສທຳມາຫາກິນ, ທໍາການຜະລິດກະສິກຳ ຕາມສາຍຄອງນໍ້າດັ່ງກ່າວຈະມີຄວາມປອດໄພດ້ານສະບຽງອາຫານ ທີ່ບໍ່ມີສານພິດປົນເປື້ອນຈາກນໍ້າເປື້ອນທີ່ປ່ອຍອອກຈາກຕົວເມືອງ.
 |
ພາຍຫຼັງຮັບຟັງການລາຍງານຮ່າງຂໍ້ຕົກລົງດັ່ງກ່າວ, ບັນດາສະມາຊິກສະພາແຫ່ງຊາດ(ສສຊ) ປະຈຳເຂດເລືອກຕັ້ງທີ 1 ນວ, ສະມາຊິກສະພາປະຊາຊົນນະຄອນຫຼວງວຽງຈັນ(ສສນວ) ກໍໄດ້ຜັດປ່ຽນກັນປະກອບຄຳເຫັນເພື່ອໃຫ້ເນື້ອໃນຮັດກຸມ, ສົມບູນຍິ່ງໆຂຶ້ນ ແລະ ພ້ອມກັນ ລົງຄະແນນສຽງຮັບຮອງເອົາຮ່າງຂໍ້ຕົກລົງດັ່ງກ່າວຢ່າງເປັນເອກະສັນ. (ຂ່າວ: ແສງຈັນ)
ຄໍາເຫັນ