ສື່ມວນຊົນ ຮ່ວມເຄື່ອນໄຫວເກັບກໍາຂ່າວວຽກງານສຸຂະພາບຈະເລີນພັນຢູ່ແຂວງວຽງຈັນ

ໂອກາດນີ້, ທ່ານ ນາງ ວຽງມະນີ ແກ້ວມະຫາວົງ ຮອງຫົວໜ້າພະແນກສາທາລະນະສຸກແຂວງວຽງຈັນຜູ້ຊີ້ນໍາວຽກງານອະນາໄມ ແລະ ສົ່ງເສີມສຸຂະພາບ ໄດ້ໃຫ້ຮູ້ກ່ຽວກັບການຕິດຕາມ, ຊຸກຍູ້ວຽກງານສຸຂະພາບຈະເລີນພັນໃນໄລຍະຜ່ານມາຕໍ່ສື່ມວນຊົນໃນວັນທີ 1 ກໍລະກົດ ນີ້ວ່າ: ໂດຍປະຕິບັດຕາມ 5 ຍຸດທະສາດ, ສຸຂະພາບຈະເລີນພັນໄວໜຸ່ມ, ສຸຂະພາບຂອງແມ່, ເດັກ ທີ່ໄດ້ຈັດຕັ້ງປະຕິບັດນັບແຕ່ໂຮງໝໍແຂວງ ຈົນຮອດຂັ້ນສຸກສາລາ ແລະ ແຜນປະຕິບັດງານສຸຂະພາບຈະເລີນພັນແມ່ ແລະ ເດັກເກີດໃໝ່, ເດັກນ້ອຍ ແລະ ໄວໜຸ່ມທີ່ສູນແມ່ ແລະ ເດັກ ກໍຄືກະຊວງສາທາລະນະສຸກ ທີ່ໄດ້ວາງອອກ ພະແນກສາທາລະນະສຸກແຂວງວຽງຈັນ ກໍໄດ້ຈັດຕັ້ງປະຕິບັດຕະຫຼອດມາ.

ແຂວງວຽງຈັນ ມີໂຮງໜໍແຂວງ 1 ແຫ່ງ ປະມານ 100 ຕຽງ, ມີໂຮງໝໍເມືອງ 11 ແຫ່ງ, ສຸກສາລາ 40 ແຫ່ງ. ພ້ອມນັ້ນ, ມີການບໍລິການຄົງທີ່ ແລະ ມີບໍການເຄື່ອນທີ່ເຊື່ອມສານ ປະມານ 112 ບ້ານໃນຈໍານວນ 424 ບ້ານໃນທົ່ວແຂວງ ໂດຍສະເພາະບ້ານທີ່ມີໄວຈະເລີນພັນທີ່ຢູ່ຫ່າງໄກສອກຫຼີກໃຫ້ໄດ້ເຂົ້າເຖິງການບໍລິການຮັກສາສຸຂະພາບຢ່າງທົ່ວເຖິງ. ໃນປີ 2024 ຜ່ານມາການກວດທ້ອງໃຫ້ແມ່ຍິງຖືພາຄັ້ງທີ 1 ບັນລຸໄດ້ 96%, ກວດຄັ້ງທີ 4 ບັນລຸ 69% ຖືວ່າຍັງຕໍ່າ ຊຶ່ງເກີດມາຈາກຫຼາຍສາເຫດຄື: ຄວາມບໍ່ພໍໃຈຢູ່ສະຖານທີ່ໃຫ້ບໍລິການ, ເປັນໂຮງໝໍນ້ອຍ, ບໍ່ເຊື່ອໝັ່ນຕໍ່ແພດໝໍ, ຢູ່ຫ່າງໄກສອກຫຼີກ ເຮັດໃຫ້ບໍ່ມາກວດທ້ອງ, ຝາກທ້ອງນໍາແພດໝໍ ແລະ ອື່ນໆ. ໃນນັ້ນ, ມີແມ່ຖືພາມາເກີດລູກຢູ່ສະຖານທີ່ບໍລິການໄດ້ພຽງ 73% ເຫັນວ່າຍັງບໍ່ບັນລຸຕາມໂຕເລກສະພາຮັບຮອງໃຫ້ແຕ່ລະແຂວງປະຕິບັດ 89%. ຢ່າງໃດກໍຕາມກໍໄດ້ມີຄວາມພະຍາຍາມປັບປຸງການບໍລິການຕ່າງໆ ເພື່ອເຮັດໃຫ້ແມ່ຍິງຖືພາເຂົ້າມາບໍລິການຝາກທ້ອງຫຼາຍຂຶ້ນ ເພື່ອເຮັດໃຫ້ຫຼຸດຜ່ອນການເສຍຊີວິດຂອງແມ່ ແລະ ເດັກ. ພ້ອມນັ້ນ, ການເສຍຊີວິດຂອງແມ່ຖືພາ ໃນປີ 2024 ມີພຽງ 3 ກໍລະນີ ຖ້າທຽບໃສ່ປີ 2023 ຫຼຸດລົງຕາມລໍາດັບ.

ທ່ານ ນາງ ວຽງມະນີ ແກ້ວມະຫາວົງ ໃຫ້ຮູ້ຕື່ມວ່າ: ໃນຕໍ່ໜ້າຈະເລັ່ງໃສ່ການເກັບຂໍ້ມູນ ເພື່ອສະ ເໜີໃຫ້ໂຮງໝໍສູນກາງປ້ອນຂໍ້ມູນໃຫ້ຄຽງຄູ່ກັບການໃຫ້ຂໍ້ມູນ ແລະ ຄໍາປຶກສາດ້ານສຸຂະສຶກສາໃຫ້ແກ່ແມ່ຍິງໃນຫຼາຍຮູບແບບ; ສືບຕໍ່ເຮັດກິດຈະກໍາສໍາລັບໄວໜຸ່ມຢູ່ໃນໂຮງຮຽນ ເພື່ອໃຫ້ຂະເຈົ້າມີຄວາມຮູ້ກ່ອນຈະແຕ່ງງານ ແລະ ຮັບຮູ້ເຖິງຄວາມອັນຕະລາຍຂອງການແຕ່ງງານກ່ອນໄວອັນຄວນ, ຖືພາແບບບໍ່ໄດ້ຕັ້ງໃຈ, ສືບຕໍ່ໃຫ້ຄໍາປຶກສາຄູ່ແຕ່ງງານໃໝ່ ຊຶ່ງຈະໄດ້ຜົນດີ ແລະ ຊ່ວຍຫຼຸດຜ່ອນການຕາຍຂອງແມ່ ໂດຍເພີ່ມການສັກຢາກັນພະຍາດໃຫ້ແມ່ ແລະ ອື່ນໆ.

ການເຄື່ອນໄຫວໃນຄັ້ງນີ້, ສື່ມວນຊົນຈາກສູນກາງ ແລະ ທ້ອງຖິ່ນໄດ້ຮ່ວມກັນເກັບກຳຂ່າວການຈັດຕັ້ງປະຕິບັດວຽກງານສຸຂະພາບຈະເລີນພັນ, ກວດທ້ອງ, ວາງແຜນຄອບຄົວ ແລະ ການໃຫ້ຄຳປຶກສາວຽກງານສຸຂະພາບຈະເລີນພັນ ຢູ່ພາຍໃນແຂວງແລ້ວ, ຍັງຈະໄດ້ເຄື່ອນໄຫວເກັບກໍາຂ່າວວຽກງານດັ່ງກ່າວຢູ່ ເມືອງວັງວຽງ ແຂວງວຽງຈັນ ຕື່ມອີກ.

(ຂ່າວ-ພາບ: ວັນເພັງ)