 |
ຕະຫຼອດໄລຍະຜ່ານມາ, ຫຼາຍຄົນເຂົ້າໃຈດີວ່າ ສື່ມວນຊົນແມ່ນເຄື່ອງມືອັນແຫຼມຄົມຂອງພັກ-ລັດ ມີໜ້າທີ່ເຜີຍແຜ່ແນວທາງນະໂຍບາຍທີ່ຖືກຕ້ອງຂອງພັກ-ລັດຖະບານ ກໍຄືໝາກຜົນຂອງການພັດທະນາເສດ ຖະກິດ-ສັງຄົມຂອງປະເທດຊາດອອກສູ່ສັງຄົມທັງພາຍໃນ ແລະ ຕ່າງປະເທດ, ແຕ່ກໍຍັງມີຫຼາຍຄົນທີ່ຍັງບໍ່ທັນເຂົ້າໃຈເລິກເຊິ່ງເຖິງບົດບາດຂອງສື່ມວນຊົນໃນໄລຍະທີ່ປະເທດຊາດຕົກເປັນຫົວເມືອງຂຶ້ນຂອງຈັກກະ ພັດລ່າເມືອງຂຶ້ນແບບເກົ່າ ແລະ ແບບໃໝ່, ຫຼາຍທົດສະວັດກ່ອນໜ້ານີ້ ນັກສື່ມວນຊົນໄດ້ອາໄສປາກກາ, ເຈ້ຍ, ສໍ, ອາໄສສຽງຂີດຂຽນ ແລະ ປ່າວປະກາດຜ່ານເຄື່ອງມືສື່ສານທີ່ມີໃນຍຸກສະໄໝນັ້ນໂຈມຕີພວກສັດຕູ, ໄປພ້ອມໆກັບການປຸກລະດົມປະຊາຊົນ ຍົກສູງຄວາມສາມັກຄີພາຍໃນຊາດ ລຸກຂຶ້ນຕໍ່ຕ້ານການຮຸກຮານຂອງພວກຈັກກະພັດ ແລະ ລູກແຫຼ່ງຕີນມືຂອງເຂົາບໍ່ຕ່າງຫຍັງກັບອ້າຍນ້ອງທະຫານຜູ້ໜຶ່ງ; ທະຫານຈັບປືນຕໍ່ສູ້ ແຕ່ນັກຂ່າວຈັບປາກກາຂີດຂຽນຂ່າວປຸກລະດົມການຕໍ່ສູ້ຂອງປະຊາຊົນລາວບັນດາເຜົ່າເພື່ອປົດປ່ອຍປະເທດຊາດອອກຈາກແອກປົກຄອງຂອງພວກລ່າເມືອງຂຶ້ນ.
 |
ທ່ານ ວັນນະສິນ ສິມມະວົງ ໃຫ້ຮູ້ຕື່ມວ່າ: ໃນໄລຍະ 1 ປີຜ່ານມາ, ພັກເຮົາໄດ້ສືບຕໍ່ເອົາໃຈໃສ່ນໍາພາ-ຊີ້ນໍາວຽກງານສື່ມວນຊົນຢ່າງເດັດດ່ຽວ ແລະ ມີຫົວຄິດປະດິດສ້າງ, ຖືສໍາຄັນການສຶກສາອົບຮົມການ ເມືອງແນວຄິດໃຫ້ຖັນແຖວພະນັກງານສື່ມວນຊົນ, ຮັບປະກັນໃຫ້ມວນຊົນເຮັດສໍາເລັດໜ້າທີ່ຂອງຕົນຢ່າງຖືກ ຕ້ອງຕາມແນວທາງຂອງພັກ-ລັດ, ຮັບປະກັນໃຫ້ສື່ມວນຊົນເປັນນັກຕໍ່ສູ້ທີ່ມີຄວາມຮູ້-ຄວາມສາມາດ, ມີຫົວຄິດປະດິດສ້າງ ສາມາດປະກອບສ່ວນ ແລະ ຜັກດັນການສ້າງສາພັດທະນາປະເທດຊາດຕາມເສັ້ນທາງກ້າວຂຶ້ນສັງຄົມນິຍົມ, ສ້າງສະພາບເງື່ອນໄຂທີ່ເອື້ອອໍານວຍຕໍ່ການເຕີບໃຫຍ່ຂະຫຍາຍຕົວຂອງສື່ມວນຊົນ. ແຕ່ເຖິງຢ່າງໃດກໍຕາມ, ສື່ມວນຊົນຂອງພວກເຮົາຍັງຜະເຊີນໜ້າກັບສິ່ງທ້າທາຍຫຼາຍຢ່າງ ບໍ່ວ່າຈະເປັນບຸກຄະລາກອນ ແລະ ງົບປະມານທີ່ຍັງມີຈໍາກັດ.
 |
ຂະນະດຽວກັນ, ບັນຫາທີ່ກຸ່ມຄົນບໍ່ຫວັງດີນໍາໃຊ້ສື່ສັງຄົມອອນລາຍປ່ອຍຂ່າວປອມ, ຂ່າວບິດເບືອນ, ນໍາໃຊ້ເອໄອເສກສັນປັ້ນແຕ່ງເລື່ອງລາວຕ່າງໆຂຶ້ນ ເພື່ອສ້າງຄວາມປັ່ນປ່ວນໃນສັງຄົມ. ດັ່ງນັ້ນ, ຈຶ່ງຮຽກຮ້ອງໃຫ້ສື່ມວນຊົນຕ້ອງຍົກສູງຄວາມຮູ້-ຄວາມສາມາດຂອງຕົນໃຫ້ທັນຍຸກ, ທັນສະໄໝ ແລະ ປະຕິບັດໜ້າທີ່ຂອງຕົນຢ່າງມີສະຕິ ແລະ ເຄົາລົບຈັນຍາບັນ, ຈັນຍາທໍາຂອງຕົນຮູ້ໝູນໃຊ້ເຕັກໂນໂລຊີ ແລະ ນະວັດຕະກໍາໃໝ່ໆຢ່າງມີຫົວຄິດປະດິດສ້າງເພື່ອໃຫ້ສົມກັບວ່າ ສື່ມວນຊົນເປັນກະບອກສຽງ ແລະ ເຄື່ອງມືອັນແຫຼມຄົມຂອງພັກ-ລັດຢ່າງແທ້ຈິງ.
ຄໍາເຫັນ