ເພື່ອຂໍ່ານັບຮັບຕ້ອນວັນສຳຄັນດັ່ງກ່າວທີ່ໃກ້ຈະມາເຖິງນີ້, ທ່ານນາງ ສິມມະນີ ແກ້ວແກ່ນ ຜູ້ອຳນວຍການໂທລະພາບແຫ່ງຊາດລາວ ໄດ້ໃຫ້ສໍາພາດເມື່ອບໍ່ດົນມານີ້ວ່າ: ຍາມໃດພັກ-ລັດ ກໍຄືຜູ້ນຳການປະຕິວັດລາວແຕ່ລະຮຸ່ນລ້ວນແຕ່ຖືສຳຄັນວຽກງານໂຄສະນາສຶກສາອົບຮົມ ແລະ ນຳໃຊ້ສື່ຕ່າງໆເປັນພາຫານະອັນແຫຼມຄົມເພື່ອໂຄສະນາເຜີຍແຜ່ແນວທາງນະໂຍບາຍທີ່ຖືກຕ້ອງສ່ອງໃສຂອງພັກລົງເຖິງປະຊາຊົນລາວບັນດາເຜົ່າ ປຸກລະດົມຂົນຂວາຍໃຫ້ມີນໍ້າໃຈຮັກຊາດ, ຄຽດແຄ້ນສັດຕູເຂົ້າຮ່ວມຂະບວນການປົດປ່ອຍປະເທດຊາດ. ຕະຫຼອດໄລຍະແຫ່ງການນຳພາຂະບວນການຕໍ່ສູ້ປົດປ່ອຍຊາດ ຍາດເອົາເອກະລາດແຫ່ງຊາດ ແລະ ອິດສະຫຼະພາບມາສູ່ປະຊາຊົນກໍຄືໄລຍະ 50 ປີແຫ່ງພາລະກິດປົກປັກຮັກສາ ແລະ ສ້າງສາປະເທດຊາດ. ໃນນັ້ນ, ວຽກງານສື່ມວນຊົນ ແລະ ການພິມຈຳໜ່າຍກໍໄດ້ກາຍເປັນອາວຸດອັນແຫຼມຄົມ ແລະ ປະກອບສ່ວນຢ່າງຕັ້ງໜ້າໃນໄຊຊະນະລວມຂອງການປະຕິວັດ.
ໂດຍປະຕິບັດຕາມພາລະບົດບາດຂອງໂທລະພາບແຫ່ງຊາດລາວໃນໄລຍະ 1 ປີຜ່ານມາ, ໄດ້ປະຕິບັດໜ້າທີ່ທີ່ມີກຽດສະຫງ່າງາມຂອງຕົນໃນການກະຈາຍຂໍ້ມູນຂ່າວສານທີ່ສຳຄັນຂອງພັກ-ລັດ ແລະ ສັງຄົມ, ສ່ອງແສງເຫດການທີ່ພົ້ນເດັ່ນທັງພາຍໃນ ແລະ ຕ່າງປະເທດໄດ້ຢ່າງວ່ອງໄວ, ຕ້ານປະກົດການຫຍໍ້ທໍ້ຕ່າງໆຂອງສັງຄົມ ແລະ ຖ້ອຍທຳນອງບິດເບືອນຄວາມຈິງ ໃສ່ຮ້າຍປ້າຍສີຂອງຜູ້ບໍ່ຫວັງດີຕໍ່ຜົນສຳເລັດໃນການປົກປັກຮັກສາພັດທະນາປະເທດຊາດ, ໂຄສະນາໃຫ້ແກ່ວັນສຳຄັນຕ່າງໆຂອງພັກ-ຂອງຊາດຢ່າງກວ້າງ ເປັນຕົ້ນການເຄື່ອນໄຫວວຽກງານການເປັນປະທານອາຊຽນ 2024 ຂອງ ສປປ ລາວ ເປັນເຈົ້າພາບ; ການໂຄສະນາດຶງດູດນັກທ່ອງທ່ຽວໃນໂອກາດເປີດປີທ່ອງທ່ຽວລາວ 2024 ແລະ ນຳໃຊ້ເສັ້ນທາງລົດໄຟລາວ-ຈີນ; ການດຳເນີນການປັບປຸງລັດຖະທຳມະນູນ ສະບັບປີ 2015 ແລະ ການກະກຽມດຳເນີນບັ້ນສຳຫຼວດພົນລະເມືອງ ແລະ ທີ່ຢູ່ອາໃສທົ່ວປະເທດຄັ້ງທີ 5 ປີ 2025 ແລະ ວັນສຳຄັນອື່ນໆ.
ຄຽງຄູ່ກັບຜົນງານ ແລະ ຜົນສຳເລັດຍັງມີສິ່ງທ້າທາຍຕໍ່ສື່ມວນຊົນ ໂດຍສະເພາະໂທລະພາບໃນຍຸກປັດຈຸບັນເຊັ່ນ: ບຸກຄະລາກອນຍັງມີຄວາມຈຳກັດໂດຍສະເພາະແມ່ນໂກຕ້າພະນັກງານເພື່ອສ້າງເປັນພະນັກງານສືບທອດປ່ຽນແທນ, ອຸປະກອນເກົ່າແກ່ຊຸດໂຊມ ຊຶ່ງເປັນສິ່ງທ້າທາຍຕໍ່ກັບໜ້າວຽກ ໂດຍສະເພາະການຍົກລະດັບຫ້ອງອອກອາກາດ ງົບປະມານຮັບໃຊ້ຍັງບໍ່ທັນຕອບສະໜອງໄດ້ກັບໜ້າວຽກຕົວຈິງ. ຕໍ່ກັບບັນຫາດັ່ງກ່າວ, ໃນຕໍ່ໜ້າໂທລະພາບແຫ່ງຊາດລາວຈະສືບຕໍ່ສ້າງຄວາມເຂັ້ມແຂງໃຫ້ບຸກຄະລາກອນ ຍົກສູງຄວາມຮັບຜິດຊອບໃນການປະຕິບັດໜ້າທີ່, ສິດ, ພາລະບົດບາດຂອງຕົນຢ່າງເລິກເຊິ່ງຂຶ້ນຕື່ມ ແລະ ໃຫ້ສາມາດຮັບປະກັນໃນການຮັບໃຊ້ໜ້າທີ່ການເມືອງໃນລະດັບທີ່ດີໃຫ້ສົມກັບວ່າເປັນກະບອກສຽງທີ່ແຫຼມຄົມຂອງພັກ-ລັດທີ່ແທ້ຈິງ ແລະ ເປັນເຄື່ອງມືຮັບໃຊ້ໂຄສະນາສ້າງຄວາມຮັບຮູ້, ເຂົ້າໃຈໃຫ້ແກ່ສັງຄົມກໍຄືປະຊາຊົນ ແລະ ເປັນເວທີສົ່ງເສີມການແລກປ່ຽນບົດຮຽນ, ເປັນແຫຼ່ງຂໍ້ມູນຂ່າວສານ, ສາລະຄວາມຮູ້ ແລະ ຕອບໂຕ້ຖ້ອຍທຳນອງຂອງກຸ່ມຄົນບໍ່ດີ, ເອົາໃຈໃສ່ພັດທະນາເນື້ອໃນ ແລະ ຮູບການໃຫ້ສາມາດດຶງດູດຄວາມສົນໃຈຂອງຜູ້ຊົມພ້ອມທັງຮັບປະກັນຕາມ 4 ລັກສະນະຂອງສື່ມວນຊົນຢູ່ໃນຂອບເຂດຂອງແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ.
ໃນຍຸກດີຈີຕອນຮຽກຮ້ອງໃຫ້ສື່ມວນຊົນເອົາໃຈໃສ່ປັບປຸງ ພັດທະນາຕົນເອງໃຫ້ມີການຫັນປ່ຽນໄປສູ່ຄຸນນະພາບ, ທັນສະໄໝເທື່ອລະກ້າວພ້ອມກັນແກ້ໄຂບັນຫາຂອດອຸດຕັນ, ຫຍຸ້ງຍາກຕ່າງໆໃຫ້ມີຄວາມໂລ່ງລຽນ ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຕົວຈິງ, ຕິດຕາມກວດກາ ຕອບໂຕ້ຫາງສຽງທີ່ບໍ່ດີຂອງສັງຄົມຢ່າງເປັນລະບົບ, ຕໍ່ເນື່ອງພ້ອມດຽວກັນນັ້ນກໍປະສານສົມທົບກັບພາກສ່ວນກ່ຽວຂ້ອງ, ຊີ້ແຈງອະທິບາຍບັນຫາທີ່ສັງຄົມໃຫ້ຄວາມສົນໃຈ ຄວາມຂ້ອງໃຈຂອງປະຊາຊົນໃຫ້ວ່ອງໄວ, ທັນການ, ຖືກເປົ້າໝາຍ.
ໃນໂອກາດທີ່ມີຄວາມໝາຍສຳຄັນນີ້, ຂ້າພະເຈົ້າຕາງໜ້າໃຫ້ຄະນະນຳຂອງໂທລະພາບແຫ່ງຊາດລາວຂໍອວຍໄຊໃຫ້ພອນບັນດາທ່ານການນຳພັກ-ລັດຈົ່ງມີຄວາມສຸກຄວາມຈະເລີນໃນຊີວິດສ່ວນຕົວ ແລະ ຄອບຄົວ ມີຜົນສຳເລັດໃນໜ້າທີ່ວຽກງານອັນມີກຽດປະກອບສ່ວນພັດທະນາປະເທດຊາດໃຫ້ຈະເລີນກ້າວໜ້າຢ່າງບໍ່ຢຸດຢັ້ງ.
ນ້ຳໃຈວັນສື່ມວນຊົນ ແລະ ການພິມຈໍາໜ່າຍວັນທີ 13 ສິງຫາ ຈົ່ງໝັ້ນຍືນ !
ຄໍາເຫັນ