ເນື່ອງໃນໂອກາດສະເຫຼີມສະຫຼອງບຸນປີໃໝ່ຂອງເຜົ່າຄື: ບຸນປຣົດປີ ຫຼືບຸນເກີຣຂອງເຜົ່າກຶມມຸ ແລະບຸນກິນຈຽງ (ບຸນນໍເປ້ເຈົ່າ) ຂອງເຜົ່າມົ້ງ ຕົວແທນປະຊາຊົນທັງ 2 ເຜົ່າໃນນະຄອນຫຼວງພະບາງໄດ້ອວຍພອນປີໃໝ່ທ່ານ ວຽງທອງ ຫັດສະຈັນ ເຈົ້ານະຄອນຫຼວງພະບາງ ພ້ອມດ້ວຍຄະນະ ເມື່ອບໍ່ດົນມານີ້, ທີ່ຫ້ອງວ່າການນະຄອນ.
ໂອກາດນີ້, ທ່ານ ໄຊຊົວລືເຮີ ເດີ້ເຈີຊົວວື ໄດ້ຕາງໜ້າອວຍພອນການນໍາພັກ-ລັດພາຍໃນນະຄອນຫຼວງພະບາງ ໂດຍສະແດງຄວາມຮູ້ບຸນຄຸນທີ່ຄະນະນຳນະຄອນ ໄດ້ເອົາໃຈໃສ່ການນໍາພາ-ຊີ້ນໍາວຽກງານຮອບດ້ານ ເຮັດໃຫ້ປະຊາຊົນ 2 ເຜົ່າມີຄວາມສາມັກຄີຮັກແພງພາຍໃນເຜົ່າທັງເປັນເຈົ້າການປະກອບສ່ວນເຮັດໃຫ້ນະຄອນຫຼວງພະບາງມີຄວາມສະຫງົບເປັນລະບຽບຮຽບຮ້ອຍດີ, ປະຊາຊົນມີຄວາມສາມັກຄີ ພ້ອມກັນສ້າງສາເສດຖະກິດເຮັດໃຫ້ເສດຖະກິດຄອບຄົວນັບມື້ດີຂຶ້ນ, ພ້ອມນີ້ທ່ານໄດ້ອວຍພອນໃຫ້ຄະນະນຳນະຄອນຫຼວງພະບາງ ຈົ່ງມີສຸຂະພາບເຂັ້ມແຂງມີພາລະນາໄມສົມບູນ ຢູ່ດີມີແຮງປະສາຈາກໂລກໄພໄຂ້ເຈັບທຸກປະການ.
ຕອນທ້າຍທ່ານ ວຽງທອງ ຫັດສະຈັນ ໄດ້ສະແດງຄວາມຊົມເຊີຍປະຊາຊົນທັງ 2 ເຜົ່າທີ່ໄດ້ຄຽງບ່າ-ຄຽງໄລ່ ຮັກສາໄດ້ຮີດຄອງປະເພນີ ແລະຄວາມສາມັກຄີປອງດອງຂອງເຜົ່າ ປະກອບສ່ວນພັດທະນາເສດຖະກິດໃຫ້ຂະຫຍາຍຕົວ ທ່ານໄດ້ເນັ້ນໃຫ້ປະຊາຊົນທັງ 2 ເຜົ່າ ສຸມໃສ່ຮັກສາຮີດຄອງປະເພນີ ເພື່ອໃຫ້ລູກຫຼານໄດ້ຮັບຮູ້ ແລະສືບທອດເປັນມູນເຊື້ອຂອງຊາດຢ່າງຍືນຍົງ.
ຂ່າວ: ສົມແກ້ວ ຈົ່ວຈູ່ລີ
ຄໍາເຫັນ