 |
ໃນພິທີ, ທ່ານ ສຸກສົມພອນ ອະໂນໄທ ກຳມະການພັກແຂວງ ຫົວໜ້າພະແນກ ສກຂ ແຂວງຜູ້ເກົ່າ ໄດ້ຂຶ້ນຜ່ານບົດລາຍງານການນຳພາ-ຊີ້ນຳວຽກງານຮອບດ້ານ ໃນຕະຫຼອດໄລຍະຜ່ານມາ ຊຶ່ງຍົກໃຫ້ເຫັນຜົນສຳເລັດອັນພົ້ນເດັ່ນໃນການພັດທະນາວຽກງານການສຶກສາພາຍໃນແຂວງ ໂດຍສະເພາະ ໃນສົກຮຽນ 2025-2026 ທົ່ວແຂວງມີໂຮງຮຽນທັງໝົດ 1,878 ແຫ່ງ, ມີນັກຮຽນ 174,378 ຄົນ, ມີພະນັກງານ-ລັດຖະກອນລວມທັງໝົດ 7,508 ຄົນ ພ້ອມທັງຍົກໃຫ້ເຫັນການຈັດຕັ້ງປະຕິບັດແຜນງົບປະມານ ແລະ ບັນດາໂຄງການຊ່ວຍເຫຼືອຕ່າງໆ ເພື່ອຍົກລະດັບຄຸນນະພາບການສຶກສາຢ່າງເປັນຮູບປະທຳ.
 |
ຈາກນັ້ນ, ທ່ານ ນາງ ຈັນເພັງສຸກ ເພັດຕະພອນ ໄດ້ຂຶ້ນຜ່ານຂໍ້ຕົກລົງຂອງຄະນະກຳມະການປົກຄອງແຂວງ ສະບັບເລກທີ 751/ຄປຂ, ລົງວັນທີ 28 ເມສາ 2026 ວ່າດ້ວຍການຍົກຍ້າຍທ່ານ ສຸກສົມພອນ ອະໂນໄທ ຫົວໜ້າພະແນກ ສກຂ ແຂວງຜູ້ເກົ່າ ໄປປະຈຳການຢູ່ຫ້ອງວ່າການເມືອງອາດສະພັງທອງ; ຜ່ານຂໍ້ຕົກລົງ ສະບັບເລກທີ 931/ຄປຂ, ລົງວັນທີ 13 ພຶດສະພາ 2026 ວ່າດ້ວຍການແຕ່ງຕັ້ງທ່ານ ອະນຸສອນ ສຸດທິວົງ ເປັນວ່າການຫົວໜ້າພະແນກ ສກຂ ແຂວງສະຫວັນນະເຂດ ແລະ ຜ່ານມະຕິຕົກລົງຂອງຄະນະປະຈຳພັກແຂວງ ສະບັບເລກທີ 416/ຄປພຂ, ລົງວັນທີ 14 ພຶດສະພາ 2026 ວ່າດ້ວຍການບົ່ງຕົວແຕ່ງຕັ້ງສະຫາຍ ອະນຸສອນ ສຸດທິວົງ ເປັນວ່າການເລຂາຄະນະພັກຮາກຖານ ພະແນກ ສກຂ ແຂວງ.
ໃນພິທີໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງທ່ານ ສຸກສົມພອນ ອະໂນໄທ ຫົວໜ້າພະແນກ ສກຂ ແຂວງຜູ້ເກົ່າ ແລະ ທ່ານ ອະນຸສອນ ສຸດທິວົງ ວ່າການຫົວໜ້າພະແນກ ສກຂ ແຂວງຜູ້ໃໝ່.
 |
ຕອນທ້າຍພິທີ, ທ່ານ ບຸນໂຈມ ອຸບົນປະເສີດ ໄດ້ໃຫ້ກຽດໂອ້ລົມເນັ້ນໜັກ ໃຫ້ວ່າການຫົວໜ້າພະແນກຜູ້ໃໝ່ ຈົ່ງສືບຕໍ່ຮັກສາມູນເຊື້ອອັນດີງາມ, ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານ-ລັດຖະ ກອນ, ເອົາໃຈໃສ່ປັບປຸງຄຸນນະພາບການຮຽນ-ການສອນໃນທຸກຊັ້ນທຸກສາຍໃຫ້ສູງຂຶ້ນ, ຍົກສູງແບບແຜນວິທີເຮັດວຽກໃຫ້ມີຄວາມຊັດເຈນ ແລະ ສືບຕໍ່ແກ້ໄຂບັນຫາສິ່ງທ້າທາຍຕ່າງໆ ໃນຂົງເຂດການສຶກສາ ເພື່ອເຮັດສຳເລັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍໃຫ້. ຂ່າວ: ພານຸມາດ ສກຂ ສະຫວັນນະເຂດ
ຄໍາເຫັນ