ຖະແຫຼງຂ່າວວັນສ້າງຕັ້ງສະຫະພັນກຳມະບານລາວ ຄົບຮອບ 69 ປີ

 ສູນກາງສະຫະພັນກໍາມະບານລາວ (ສກລ) ໄດ້ຖະແຫຼງຂ່າວຕໍ່ສື່ມວນຊົນ ໃນວັນທີ 22 ມັງກອນນີ້ ທີ່ ສກລວ່າ: ເພື່ອຫວນຄືນມູນເຊື້ອປະຫວັດສາດແຫ່ງການກໍາເນີດເຕີບໃຫຍ່ ຂອງອົງການຈັດຕັ້ງກໍາມະບານລາວ ຕະຫຼອດໄລຍະ 69 ປີ ທີ່ຜ່ານມາ ໂດຍພັກໄດ້ມອບໝາຍພາລະກິດອັນໃຫຍ່ຫຼວງໃຫ້ແກ່ອົງການຈັດຕັ້ງກໍາມະບານລາວ ທີ່ເປັນອົງການຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທໍາຂອງກໍາມະກອນ ແລະ ຊາວຜູ້ອອກແຮງງານບັນດາເຜົ່າ. ພວກເຮົາມີຄວາມເອກອ້າງທະນົງໃຈຢ່າງຍິ່ງທີ່ເຫັນວ່າຕະຫຼອດໄລຍະ 69 ປີ ແຫ່ງການຕໍ່ສູ້ຍາດເອົາເອກະລາດ, ອິດສະລະພາບ ກໍຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນນໍາພາໂດຍກົງ ແລະ ຮອບດ້ານຂອງພັກປະຊາຊົນ ປະຕິວັດລາວ; ຊົນຊັ້ນກໍາມະກອນ ແລະ ຊາວຜູ້ອອກແຮງງານ ທີ່ຖືກກົດຂີ່ຂູດຮີດແຮງງານ ເປັນຂີ້ຂ້າມ້າຕ່າງຂອງຈັກກະພັດ ແລະ ລູກແຫຼ່ງຕີນມືໃນເມື່ອກ່ອນ. ກໍາມະກອນ ແລະ ຊາວຜູ້ອອກແຮງງານບັນດາເຜົ່າໄດ້ຮັບການປົດປ່ອຍ ໄດ້ກາຍເປັນຜູ້ທີ່ມີອິດສະລະພາບ ແລະ ສາມາດປະກອບສ່ວນເຂົ້າໃນການສ້າງສາພັດທະນາລະບອບໃໝ່ຂອງພວກເຮົາໃຫ້ມີຄວາມຈະເລີນຮຸ່ງເຮືອງ ແລະ ສ້າງປະຖົມປັດໃຈກ້າວຂຶ້ນສູ່ສັງຄົມນິຍົມເທື່ອລະກ້າວ.
ອົງການຈັດຕັ້ງກໍາມະບານ ກໍເປັນອົງການຈັດຕັ້ງມະຫາຊົນຂອງພັກ ຍາມໃດກໍມີຄວາມຈົ່ງຮັກພັກດີຕໍ່ພັກ, ຕໍ່ປະເທດຊາດ ແລະ ຕໍ່ລະບອບໃໝ່ ໂດຍບໍ່ຫວັ່ນໄຫວຄອນແຄນຕໍ່ສະພາບການຂອງໂລກທີ່ຜັນແປຢ່າງສະລັບຊັບຊ້ອນ ແລະ ມີຄວາມຫຍຸ້ງຍາກທາງດ້ານເສດຖະກິດ ສົ່ງຜົນກະທົບຕໍ່ຊີວິດການເປັນຢູ່ຂອງກໍາມະກອນ. ແຕ່ອົງການຈັດຕັ້ງກໍາມະບານໄດ້ຕັ້ງໜ້າຈັດຕັ້ງປະຕິບັດແນວທາງການປ່ຽນແປງໃໝ່ຢ່າງຮອບດ້ານຂອງພັກ ເປັນຕົວແທນແຫ່ງສິດ, ຜົນປະໂຫຍດອັນຊອບທໍາຂອງຊົນຊັ້ນກໍາມະກອນ ແລະ ຊາວຜູ້ອອກແຮງງານລາວບັນດາເຜົ່າ; ໄດ້ເຮັດໜ້າທີ່ໃນການສຶກສາອົບຮົມການເມືອງ-ແນວຄິດໃຫ້ສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ໃຫ້ປະຕິບັດຕາມແນວທາງປ່ຽນແປງ ໃໝ່ຂອງພັກ, ມີຄວາມສາມັກຄີ, ມີລະບຽບວິໄນໃນການອອກແຮງງານ. ພ້ອມນັ້ນ, ຍັງໄດ້ເອົາໃຈໃສ່ປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ; ກໍ່ສ້າງ ບໍາລຸງສະມາຊິກກໍາມະບານ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້, ຄວາມສາມາດທາງດ້ານເຕັກນິກວິທະຍາສາດ, ສີມືແຮງງານທີ່ດີ ເຂົ້າໃນການພັດທະນາຕາມທິດສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ; ປັບປຸງຂະຫຍາຍການຈັດຕັ້ງຂອງຕົນໃຫ້ໜັກແໜ້ນເຂັ້ມແຂງທາງດ້ານປະລິມານ ແລະ ຄຸນນະພາບ ໂດຍມີເນື້ອໃນຂໍ້ແຂ່ງຂັນ 5 ເປັນເຈົ້າ ເພື່ອຝຶກຝົນຕົນເອງ. ມາຮອດໃນປັດຈຸບັນສະຫະພັນກໍາມະບານລາວ ປະກອບມີ 39 ສະຫະພັນກໍາມະບານກະຊວງ ແລະ ອົງການ, ມີ 18 ສະຫະພັນກໍາມະບານແຂວງ, ນະຄອນຫຼວງວຽງຈັນ, ມີ 3 ສະຫະພັນກໍາມະບານນະຄອນ ແລະ ມີ 145 ສະຫະພັນກໍາມະບານເມືອງ; ໃນທົ່ວປະເທດມີສະມາຊິກກໍາມະບານທັງໝົດ 208,883 ຄົນ.
ທ່ານ ພອນສານ ວິໄລເມັ້ງ ກ່າວຕື່ມວ່າ: ເພື່ອປົກປັກຮັກສາໝາກຜົນຂອງການປະຕິວັດໄວ້ຢ່າງໝັ້ນຄົງ ອົງການຈັດຕັ້ງກໍາມະບານ ຕ້ອງໄດ້ສູ້ຊົນບຸກບືນສ້າງການຫັນປ່ຽນໃໝ່ຢ່າງແຂງແຮງ, ເລິກເຊິ່ງ ແລະ ຮອບດ້ານ ກ່ອນອື່ນຕ້ອງຄົ້ນຄວ້າພັດທະນາເສດຖະກິດ-ສັງຄົມ ໂດຍສະເພາະແມ່ນການຜະລິດຕາມມະຕິ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ; ເພີ່ມທະວີນໍ້າໃຈຮັກຊາດ, ຄວາມສາມັກຄີເປັນປຶກແຜ່ນພາຍໃນຊາດໃຫ້ສູງຂຶ້ນ, ເປັນເຈົ້າການປະຕິບັດຈິດໃຈບຸກທະລຸສູ້ຊົນບຸກບືນເພື່ອສ້າງຄວາມເຂັ້ມແຂງໃຫ້ແກ່ອົງການຈັດຕັ້ງກໍາມະບານລາວ ກໍຄືປະເທດຊາດ. ເອົາໃຈໃສ່ເຄື່ອນໄຫວປົກປ້ອງສິດ ແລະ ຜົນປະໂຫຍດອັນຊອບທໍາຂອງກໍາມະກອນ ແລະ ຊາວຜູ້ອອກແຮງງານ ບໍ່ໃຫ້ຖືກເອົາລັດເອົາປຽບດ້ານຄ່າແຮງງານ, ຊຸກຍູ້ການປະຕິບັດນະໂຍບາຍສະຫວັດດີການສັງຄົມ ແລະ ການເບິ່ງແຍງຊີວິດການເປັນຢູ່, ເອົາໃຈໃສ່ສຶກສາອົບຮົມສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ຄຸ້ມຄອງການຈັດຕັ້ງກໍາມະບານດ້ວຍກົດໝາຍຢ່າງເຂັ້ມງວດ, ໂປ່ງໃສ, ເພີ່ມທະວີການຕິດຕາມ, ກວດກາການພັດທະນາເສດຖະກິດ-ສັງຄົມ, ການເຄື່ອນໄຫວຂອງສະພາ ແລະ ສະມາຊິກແຕ່ລະຂັ້ນ. ໃນໂອກາດ ວັນທີ່ມີຄວາມໝາຍ-ສໍາຄັນຂອງກໍາມະບານລາວ ກໍຄືສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ເຮັດໃຫ້ຮຸ່ນສືບທອດໄດ້ຮັບຮູ້ ແລະ ເຂົ້າໃຈເຖິງມູນເຊື້ອແຫ່ງການກໍາເນີດເຕີບໃຫຍ່ຂະຫຍາຍຕົວຂອງສະຫະພັນກໍາມະບານລາວ ໂດຍຕິດພັນກັບການສະເຫຼີມສະຫຼອງສາມວັນປະຫວັດສາດ ຄື: ວັນສ້າງຕັ້ງພັກປະຊາຊົນປະຕິບັດລາວຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ ຜູ້ນໍາທີ່ແສນເຄົາລົບຮັກຂອງປະຊາຊົນລາວບັນດາເຜົ່າ. ປີນີ້, ສກລ ຈຶ່ງໄດ້ອອກແຈ້ງການໃຫ້ສະຫະພັນກໍາມະບານແຕ່ລະຂັ້ນ ໃນຂອບເຂດທົ່ວປະເທດ ຈັດຕັ້ງເຊື່ອມຊຶມເລົ່າປະຫວັດຫວນຄືນມູນເຊື້ອຂອງວັນສ້າງຕັ້ງກໍາມະບານລາວ ເພື່ອໃຫ້ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ໄດ້ຮັບຮູ້ ເຊື່ອມຊຶມ ແລະ ເຂົ້າໃຈເຖິງຜົນງານຂອງການປະກອບສ່ວນຂອງອົງການກໍາມະບານລາວໃນພາລະກິດປົກປັກຮັກສາ ແລະ ພັດທະນາປະເທດຊາດ ແນໃສປູກຈິດສໍານຶກ ມູນເຊື້ອອັນອົງອາດກ້າຫານຂອງຊົນຊັ້ນກໍາມະກອນລາວ ເປັນຕົ້ນສ້າງຂະບວນການກິລາ, ສິນລະປະວັນນະດີ, ບໍລິຈາກເລືອດຊ່ວຍເຫຼືອສັງຄົມ ແລະ ກິດຈະກໍາອື່ນໆຕາມເງື່ອນໄຂ ແລະ ຄວາມເໝາະສົມ.
ໃນໂອກາດນີ້, ທ່ານ ພອນສານ ວິໄລເມັ້ງ ຍັງຮຽກຮ້ອງມາຍັງສະຫະພັນກໍາມະບານແຕ່ລະຂັ້ນ ຈົ່ງປຸ້ມລຸມຄວາມສາມັກຄີ ອັນເປັນປຶກແຜ່ນພາຍໃຕ້ການນໍາພາຂອງພັກ ສູ້ຊົນບຸກບືນພັດທະນາຕົນເອງ, ພັດທະນາປະເທດຊາດ ໃຫ້ຈະເລີນຮັ່ງມີ, ຮັກສາມູນເຊື້ອທາດແທ້ ແລະ ອຸດົມການສັງຄົມນິຍົມກໍຄືຊົນຊັ້ນກໍາມະກອນ. ພິເສດໃນປີ 2025 ແມ່ນປີກ້າວເຂົ້າສູ່ການກະກຽມດໍາເນີນກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ IX ພວກເຮົາຕ້ອງໄດ້ຕັ້ງໜ້າເຄື່ອນໄຫວຢ່າງຟົດຟື້ນ ຫ້າວຫັນ ເພື່ອປະຕິບັດໜ້າທີ່ໃຫ້ສໍາເລັດຕາມພັກ-ລັດມອບໝາຍໃຫ້ ເພື່ອສ້າງ: “ກໍາມະບານລາວ ເຂັ້ມແຂງ ທັນສະໄໝ ສາມັກຄີ ມີວິໄນ ແລະ ນໍ້າໃຈສາກົນກໍາມະຊີບ”.
ໃນໂອກາດວັນສ້າງຕັ້ງສະຫະພັນກໍາມະບານລາວ ຄົບຮອບ 69 ປີໃກ້ຈະມາເຖິງນີ້, ທ່ານ ພອນສານ ວິໄລເມັ້ງ ໄດ້ອວຍພອນໄຊອັນປະເສີດ ໃຫ້ການນໍາພັກ-ລັດ ຈົ່ງມີສຸຂະພາບແຂງແຮງ ສືບຕໍ່ນໍາພາ-ຊີ້ນໍາ ການພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງ, ອວຍພອນໃຫ້ສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານ ຈົ່ງມີສຸຂະພາບແຂງແຮງ ພ້ອມກັນສູ່ຊົນພັດທະນາວຽກງານກໍາມະບານ ກໍຄືການພັດທະນາປະເທດ ໃຫ້ມີຄວາມຮຸ່ງເຮືອງ ແລະ ສີວິໄລ.
ນໍ້າໃຈວັນທີ 1 ກຸມພາ ໝັ້ນຍືນ!.
(ຂ່າວ-ພາບ: ວັນເພັງ)