 |
ໃນໂອກາດນີ້, ທ່ານ ເພັດພິໄຊ ສູນວິໄລ, ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດແຂວງໄຊຍະບູລີໄດ້ລາຍງານໃຫ້ຊາບ ກ່ຽວກັບສະພາບໄພພິບັດທີ່ເກີດຂຶ້ນຢູ່ແຂວງໄຊຍະບູລີໃນປີ 2025 ເຫັນວ່າ ມີໄພພິບັດເກີດຂຶ້ນທັງໝົດ 44 ຄັ້ງ, ໃນນັ້ນ: ນໍ້າຖ້ວມ 8 ຄັ້ງ, ລົມພາຍຸພັດ 16 ຄັ້ງ, ໄຟໄໝ້ 17 ຄັ້ງ, ຊຶ່ງໄດ້ສົ່ງຜົນກະທົບຕໍ່ຊີວິດ, ຊັບສິນ, ທີ່ຢູ່ອາໄສ, ພື້ນຖານໂຄງລ່າງ, ເສັ້ນທາງ, ເນື້ອທີ່ທຳການຜະລິດ ແລະ ສັດລ້ຽງຂອງປະຊາຊົນ ຈໍານວນ 11 ເມືອງ, 275 ບ້ານ, 7,000 ກວ່າຄອບຄົວ, 36ພັນກວ່າຄົນ, ເສຍຊິວິດ 3 ຄົນ, ເຮືອນເສຍຫາຍໝົດຫຼັງ 32 ຫຼັງ (ນໍ້າຖ້ວມ 27 ຫຼັງ, ດິນເຈື່ອນທັບຖົມ 2 ຫຼັງ ແລະ ໄຟໄໝ້ 3 ຫຼັງ),ເນື້ອທີ່ທໍາການຜະລິດເສຍຫາຍ 2,214 ເຮັກຕາ, ສັດລ້ຽງ 23,209 ໂຕ (ງົວ, ຄວາຍ, ໝູ, ແບ້...), ລະບົບຊົນລະປະທານ 38 ແຫ່ງ, ເສັ້ນທາງເສຍຫາຍ 106 ເສັ້ນ, ຂົວ 16 ແຫ່ງ, ຫົວງານນໍ້າປະປາ 4 ແຫ່ງ, ລະບົບນໍ້າລິນຂາດ 13 ແຫ່ງ ແລະ ເສຍຫາຍດ້ານອື່ນໆຈໍານວນຫຼາຍລວມມູນຄ່າເສຍຫາຍທັງໝົດ 273 ຕື້ກວ່າກີບ. ສະເພາະເດືອນກໍລະກົດ ໄດ້ຮັບຜົນກະທົບຫຼາຍກວ່າໝູ່ ຈາກເຫດການນໍ້າຖ້ວມທັງໝົດ 3 ຄັ້ງ ຊຶ່ງໄດ້ຮັບຜົນກະທົບຢູ່ 10 ເມືອງ, ລວມມູນຄ່າເສຍຫາຍທັງໝົດ 249 ຕື້ກວ່າກີບ.
 |
ສຳລັບການຊ່ວຍເຫຼືອສຸກເສີນເບື້ອງຕົ້ນ: ຄະນະກໍາມະການຄຸ້ມຄອງໄພພິບັດຂັ້ນແຂວງ ໄດ້ປຸກລະ ດົມກໍາລັງຂອງ ປກຊ-ປກສ, ຊາວໜຸ່ມ ແລະ ກອງພົນທະຫານຮາບທີ 2 ລວມທັງໝົດ 787 ສະຫາຍ ລົງຊ່ວຍເຫຼືອແກ້ໄຂສຸກເສີນ, ພ້ອມທັງໃຫ້ຄວາມຊ່ວຍເຫຼືອຄອບຄົວທີ່ໄດ້ຮັບຜົນກະທົບ ເປັນຕົ້ນ ຍົກຍ້າຍເຄື່ອງຂອງ, ສັດລ້ຽງ ແລະ ປະຊາຊົນ ໄປຢູ່ເຂດປອດໄພ. ພາຍຫຼັງນໍ້າບົກແຫ້ງ ກໍໄດ້ອະນາໄມທີ່ຢູ່ອາໄສ ຂອງປະຊາຊົນ, ສໍານັກງານລວມໝູ່ ແລະ ບັນດາເສັ້ນທາງທີ່ຖືກຜົນກະທົບ, ຊຶ່ງຄະນະຄຸ້ມຄອງໄພພິບັດຂັ້ນແຂວງໄດ້ໃຫ້ຄວາມຊ່ວຍເຫຼືອເບື້ອງຕົ້ນແກ່ຄອບຄົວທີ່ໄດ້ຮັບຜົນກະທົບ, ພ້ອມທັງປຸກລະດົມຈາກສັງຄົມຢູ່ພາຍໃນແຂວງ ເປັນວັດຖຸ-ປັດໃຈ ຊ່ວຍເຫຼືອຜູ້ປະສົບໄພ. ນອກນັ້ນ ແມ່ນໄດ້ແກ້ໄຂເສັ້ນທາງໃຫ້ສາມາດສັນຈອນໄປມາໄດ້ 106 ເສັ້ນ; ສະພາແຫ່ງຊາດໄດ້ຊ່ວຍເຫຼືອອຸປະກອນປຸກສ້າງເຮືອນ 31 ຫຼັງໃຫ້ຄອບຄົວທີ່ເຮືອນບໍ່ສາມາດອາໄສຢູ່ໄດ້; ໄດ້ໃຫ້ການປິ່ນປົວສຸຂະພາບຂອງປະຊາຊົນທີ່ຖືກຜົນກະທົບຢູ່ 18 ບ້ານ, ຈໍານວນ 163 ຄົນ ແລະ ໄດ້ອະນາໄມນໍ້າສ້າງ 85 ແຫ່ງ; ຄຽງຄູ່ກັນນັ້ນ, ຄະນະຄຸ້ມຄອງໄພພິບັດຂັ້ນສູນກາງໄດ້ໃຫ້ການຊ່ວຍເຫຼືອແກ່ຄອບຄົວທີ່ໄດ້ຮັບຜົນກະທົບ ເປັນຕົ້ນເງິນສົດ, ເຂົ້າສານ, ເຄື່ອງໃຊ້ຄົວເຮືອນ ແລະ ອື່ນໆ. ສຳລັບຄວາມຕ້ອງການງົບປະມານ ໃນການຟື້ນຟູຜົນເສຍຫາຍດັ່ງກ່າວ ຕາມແຜນ 137 ໂຄງການ, ມູນຄ່າທັງໝົດ 153 ຕື້ກວ່າກີບ.
 |
ໃນໂອກາດນີ້, ທ່ານຮອງນາຍົກລັດຖະມົນຕີກໍໄດ້ມີຄຳເຫັນຊີ້ນໍາຕໍ່ຄະນະກໍາມະການຄຸ້ມຄອງໄພພິບັດ ແຂວງໄຊຍະບູລີ ເປັນຕົ້ນ: ໃຫ້ສືບຕໍ່ເອົາໃຈໃສ່ຕິດຕາມສະພາບອາກາດທີ່ອາດຈະເກີດມີພາຍຸຫົວໃໝ່ ໂດຍໃຫ້ມີລະບົບການແຈ້ງເຕືອນລວ່ງໜ້າເຖິງປະຊາຊົນບັນດາເຜົ່າໃນພື້ນທີ່ມີຄວາມສ່ຽງຢ່າງວອ່ງໄວທັນການເພື່ອ ສາມາດກະກຽມຄວາມພ້ອມຮັບມື ໄດ້ຢ່າງທັນການ; ໃຫ້ກະກຽມກໍາລັງ ປກຊ-ປກສ ເພື່ອກຽມຄວາມພອ້ມຕ້ານໄພພິບັດທີ່ອາດຈະເກີດຂຶ້ນໃນຕໍ່ໜ້າ, ພອ້ມທັງເອົາໃຈໃສ່ຕ້ານການໂຄສະນາໃສ່ຮ້າຍປ້າຍສີຂອງກຸ່ມຄົນບໍ່ຫວັງດີ ຕໍ່ແນວທາງນະໂຍບາຍຂອງພັກ-ລັດ ເຮົາ.
ຫຼັງຈາກນັ້ນ, ທ່ານ ຮອງນາຍົກລັດຖະມົນຕີ ແລະ ຄະນະ ໄດ້ເຂົ້າຮວ່ມເປັນສັກຂີພິຍານ ພິທີມອບ-ຮັບເຄື່ອງຊວ່ຍເຫຼືອຈາກຄະນະກຳມະການຄຸ້ມຄອງໄພພິບັດຂັ້ນສູນກາງ, ຊຶ່ງກ່າວມອບໂດຍ ທ່ານ ພົງໄຊສັກ ອິນຖາລາດ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ແລະ ກ່າວຮັບໂດຍ ທ່ານ ເພັດພິໄຊ ສູນວິໄລ, ຮອງເຈົ້າແຂວງ, ປະທານຄະນະກໍາມະການຄຸ້ມຄອງໄພພິບັດຂັ້ນແຂວງໄຊຍະບູລີ ລວມມູນຄ່າ 300 ລ້ານກວ່າກີບ ເພື່ອນໍາໃຊ້ເຂົ້າໃນວຽກງານແກ້ໄຂສຸກເສີນ. ພ້ອມນີ້ ຄະນະຂອງທ່ານ ຮອງນາຍົກລັດຖະມົນຕີ ກໍໄດ້ໄປຕິດຕາມເບິ່ງພື້ນທີ່ຕົວຈິງ ໂດຍສະເພາະ ບັນດາພື້ນທີ່ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ເປັນຕົ້ນ ຈຸດບ້ານໜອງແຊງ, ບ້ານນາຕໍໃຫຍ່ ແລະ ບ້ານຖິ່ນ, ເມືອງໄຊຍະບູລີ ຕື່ມອີກ. (ຂ່າວ-ພາບ: ກົມປະຊາສຳພັນ ຫສນຍ)
ຄໍາເຫັນ