ທ່ານ ສະເຫຼີມໄຊ ກົມມະສິດ ເຂົ້າຢ້ຽມຂ່ຳນັບ ນາຍົກລັດຖະມົນຕີຍີ່ປຸ່ນ

ໃນຕອນເຊົ້າວັນທີ 10 ພະຈິກ 2023 ທີ່ ສຳນັກງານນາຍົກລັດຖະມົນຕີ ແຫ່ງປະເທດຍີ່ປຸ່ນ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຢ້ຽມຂ່ຳນັບ ທ່ານ ກິຊິດະ ຟູມິໂອະ ນາຍົກລັດຖະມົນຕີຍີ່ປຸ່ນ, ໃນໂອກາດທີ່ຄະນະຜູ້ແທນລາວ ໄດ້ເດີນທາງມາຢ້ຽມຢາມທາງການຢູ່ປະເທດຍີ່ປຸ່ນ ແຕ່ວັນທີ 7-11 ພະຈິກ 2023.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ຈາກທ່ານນາຍົກລັດຖະມົນຕີ ສອນໄຊ ສີພັນດອນ ມາຍັງ ທ່ານ ນາຍົກລັດຖະມົນຕີ ກິຊິດະ ຟູມິໂອະ, ພ້ອມທັງແຈ້ງໃຫ້ຊາບວ່າ: ນາຍົກລັດຖະມົນຕີ ແຫ່ງ ສປປ ລາວ ສະແດງຄວາມປິຕິຍິນດີທີ່ຈະເຂົ້າຮ່ວມກອງປະຊຸມສຸດຍອດ ອາຊຽນ-ຍີ່ປຸ່ນ ສະໄໝພິເສດເພື່ອສະເຫຼີມສະຫຼອງມິດຕະພາບ ແລະ ການຮ່ວມມື ອາຊຽນ-ຍີ່ປຸ່ນ ຄົບຮອບ 50 ປີ ແລະ ກອງປະຊຸມຜູ້ນໍາປະຊາຄົມອາຊີ ເພື່ອຫຼຸດການປ່ອຍອາຍພິດເປັນສູນAZEC (AZEC Leader’s Meeting) ທີ່ຈະຈັດຂຶ້ນ ຢູ່ ນະຄອນຫຼວງໂຕກຽວ ໃນເດືອນທັນວາ 2023 ທີ່ຈະມາເຖິງນີ້. ພ້ອມນີ້, ກໍສະແດງຄວາມຊົມເຊີຍຕໍ່ຜົນສຳເລັດຂອງການຊີ້ນຳ-ນຳພາ ແລະ ການບໍລິຫານປະເທດຂອງລັດຖະບານ ຂອງ ທ່ານ ກິຊິດະ ຟູມິໂອະ ໃນໄລຍະຜ່ານມາອັນໄດ້ເປັນການປະກອບສ່ວນເຮັດໃຫ້ ການພົວພັນ ແລະ ການຮ່ວມມື ລາວ-ຍີ່ປຸ່ນ ສືບຕໍ່ໄດ້ຮັບການຊຸກຍູ້ສົ່ງເສີມ ແລະ ພັດທະນາຂຶ້ນຢ່າງຕໍ່ເນື່ອງ ພາຍໃຕ້ການເປັນຄູ່ຮ່ວມຍຸດທະສາດ ຊຶ່ງກະຊວງການຕ່າງປະເທດລາວ ແລະ ຍີ່ປຸນ ຈະສືບຕໍ່ເຮັດວຽກຮ່ວມກັນຢ່າງໃກ້ຊິດເພື່ອສົ່ງເສີມການຮ່ວມມືເພື່ອການພັດທະນາສາຍພົວພັນສອງປະເທດ ລາວ-ຍີ່ປຸ່ນ ໃຫ້ແຕກດອກອອກຜົນຍິ່ງຂຶ້ນ, ສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.ພ້ອມນັ້ນ, ລັດຖະບານ ສປປ ລາວສະແດງຄວາມຍິນດີທີ່ເຫັນວ່າ ການລົງທຶນຂອງພາກທຸລະກິດຍີ່ປຸ່ນ ຢູ່ ສປປ ລາວ ແມ່ນມີທ່າອ່ຽງເພີ່ມຂຶ້ນຕໍ່ເນື່ອງ, ໂດຍສະເພາະການລົງທຶນດ້ານກະສິກຳ, ອຸດສາຫະກຳປຸງແຕ່ງ ແລະ ການບໍລິການ ຊຶ່ງແມ່ນການລົງທຶນທີ່ມີຄຸນນະພາບສູງ ແລະ ໄດ້ປະກອບສ່ວນສຳຄັນໃນການສ້າງອາຊີບໃຫ້ແກ່ປະຊາຊົນລາວ, ໃນນັ້ນ ກໍສະເໜີໃຫ້ ທ່ານນາຍົກລັດຖະມົນຕີ ກິຊິດະ ຟູມິໂອະ ພິຈາລະນາຊຸກຍູ້ພາກທຸລະກິດຂອງຍີ່ປຸ່ນ ໄປດຳເນີນທຸລະກິດຢູ່ ສປປ ລາວ ຫຼື ຮ່ວມມືກັບພາກທຸລະກິດຂອງ ສປປ ລາວ ເພີ່ມຂຶ້ນໃນຊຸມປີຕໍ່ຫນ້າ, ເສີມຂະຫຍາຍການຮ່ວມມືດ້ານຕ່າງໆທີ່ສອງຝ່າຍມີທ່າແຮງຮ່ວມກັນ ເປັນຕົ້ນ ດ້ານເສດຖະກິດ, ການຄ້າ, ການລົງທຶນ ແລະ ການທ່ອງທ່ຽວ ອັນຈະເປັນການນໍາໃຊ້ທ່າແຮງບົ່ມຊ້ອນການເຊື່ອມໂຍງ ແລະ ເຊື່ອມຈອດກັບຂົງເຂດ ແລະ ພາກພື້ນຂອງ ສປປ ລາວ ດ້ານການຂົນສົ່ງ ໃຫ້ເກີດປະໂຫຍດສູງສຸດ, ລວມທັງການຊຸກຍູ້ສົ່ງເສີມການຈັດຕັ້ງປະຕິບັດສົນທິສັນຍາທາງອາກາດສອງຝ່າຍ ລາວ-ຍີ່ປຸ່ນ ໃຫ້ເປັນຮູບປະທໍາເທື່ອລະກ້າວ.ໃນຂະນະດຽວກັນ, ທ່ານນາຍົກລັດຖະມົນຕີ ກິຊິດະ ຟູມິໂອະ ສະແດງຄວາມຍິນດີຈະຊຸກຍູ້ໃຫ້ສອງຝ່າຍ ເຮັດວຽກຮ່ວມກັນໃຫ້ຫລາຍຂຶ້ນ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ກໍຄື ການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ໃຫ້ສືບຕໍ່ປະກົດຜົນເປັນຈິງ ແລະ ນຳເອົາຜົນປະໂຫຍດສູງສຸດມາສູ່ປະຊາຊົນສອງປະເທດ ຍີ່ປຸ່ນ-ລາວ ໃນຕໍ່ຫນ້າ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ຕາງຫນ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນ ຕະຫຼອດໄລຍະຜ່ານມາ, ຊຶ່ງມີປະສິດທິຜົນສູງ ແລະ ແທດເຫມາະກັບຄວາມຮຽກຮ້ອງຕ້ອງການຕົວຈິງໃນການພັດທະນາເສດຖະກິດ-ສັງຄົມ ຂອງ ສປປ ລາວ. ພ້ອມນີ້, ກໍສະແດງຄວາມຂອບໃຈຕໍ່ການສະໜັບສະໜູນຊ່ວຍເຫຼືອ ສປປ ລາວ ໃນການກະກຽມເປັນປະທານອາຊຽນ ປີ 2024 ແລະ ສະແດງຄວາມຫວັງວ່າ ສປປ ລາວ ຈະໄດ້ເປັນກຽດຕ້ອນຮັບ ນາຍົກລັດຖະມົນຕີ ກິຊິດະ ຟູມິໂອະ ພ້ອມດ້ວຍຄະນະຜູ້ແທນຂັ້ນສູງຍີ່ປຸ່ນ ໃນການໄປຢ້ຽມຢາມ ສປປ ລາວ.
ໃນວັນດຽວກັນນີ້, ຄະນະຜູ້ແທນລາວ ຍັງໄດ້ພົບປະເຮັດວຽກກັບ ພະນະທ່ານ ໂມເຕງິ ໂທຊິມິດຊຶ (MOTEGIToshimitsu) ເລຂາທິການພັກເສລີປະຊາຊທິປະໄຕຍີ່ປຸ່ນ (ພັກ LDP) ອະດີດລັດຖະມົນຕີຕ່າງປະເທດຍີ່ປຸ່ນ ຊຶ່ງສອງຝ່າຍ ໄດ້ຕີລາຄາສູງຕໍ່ການພົວພັນຮ່ວມມືໃນສາຍພັກ ລະຫວ່າງ ພັກປະຊາຊົນປະຕິວັດລາວ ແລະ ພັກເສລີປະຊາທິປະໄຕຍີ່ປຸ່ນ (ພັກ LDP) ໃນຊຸມປີຜ່ານມາ ແມ່ນໄດ້ມີການພົວພັນ ແລະ ຮ່ວມມືກັນຢ່າງໃກ້ຊິດ, ມີການສະໜັບສະໜູນຊຶ່ງກັນ ແລະ ກັນເປັນຢ່າງດີລວມທັງໄດ້ມີການແລກປ່ຽນການຢ້ຽມຢາມຊຶ່ງກັນ ແລະ ກັນ ເປັນແຕ່ລະໄລຍະ, ໃນນັ້ນ ຝ່າຍລາວ ສະແດງຄວາມຂອບໃຈ ມາຍັງ ພັກ LDP ກໍຄືລັດຖະບານຍີ່ປຸ່ນ ທີ່ໄດ້ຊ່ວຍ ສປປ ລາວ ໃນການຍົກລະດັບຂີດຄວາມສາມາດການນໍາພາ ໃຫ້ແກ່ການນໍາຂັ້ນສູງລາວໃນໄລຍະຜ່ານມາ ແລະ ສະເໜີໃຫ້ສືບຕໍ່ພິຈາລະນາຊ່ວຍເຫຼືອຕື່ມອີກໃນຊຸມປີຕໍ່ໜ້າ.
ຂ່າວ-ພາບ: ກະຊວງການຕ່າງປະເທດ