ທ່ານ ສະຫວັນຄອນ ຣາຊມຸນຕຣີ ເນັ້ນໃຫ້ສື່ມວນຊົນ ເອົາໃຈໃສ່ເສີມຂະຫຍາຍບົດຮຽນການລາຍງານຂ່າວສີຂຽວ

ທ່ານ ສະຫວັນຄອນ ຣາຊມຸນຕຣີ ໄດ້ມີຄໍາເຫັນວ່າ: ຍ້ອນມີແນວທາງນະໂຍບາຍຂອງພັກ ທີ່ມີຄວາມສອດຄ່ອງກັບວິໄສທັດ, ການພັດທະນາແບບສີຂຽວ ແລະ ຍືນຍົງ ໄດ້ເປີດໂອກາດໃຫ້ມີການຮ່ວມມືກັບອົງການສາກົນ ເພື່ອຍົກລະດັບຄວາມຮູ້, ຄວາມສາມາດ, ເສີມສ້າງທັກສະ ແລະ ບົດຮຽນທີ່ດີຈາກຕ່າງປະເທດມາພັດທະນາວຽກງານຂອງສື່ມວນຊົນລາວ ໃນທົ່ວປະເທດ ໂດຍສະເພາະພາຍໃຕ້ໂຄງການ GAMCIL ເປັນໜຶ່ງໂຄງການທີ່ມີຄວາມສຳຄັນຫຼາຍ ແລະ ໄດ້ຮ່ວມກັນນຳພາຈັດຕັ້ງປະຕິບັດຢ່າງມີໝາກຜົນ, ມີຜົນສຳເລັດເປັນກ້າວໆ ກ່ຽວກັບການລາຍງານຂ່າວບັນຫາສີຂຽວ ເປັນຕົ້ນ: ການພັດທະນາແບບຍືນຍົງ, ຄວາມສະເໝີບົດບາດຍິງ-ຊາຍ, ພັດທະນາສີຂຽວ ເປັນມິດກັບສິ່ງແວດລ້ອມ. ຊຶ່ງວຽກງານດັ່ງກ່າວ ຈະມີຜົນສຳເລັດ ໄດ້ຮຽກຮ້ອງໃຫ້ບັນດາສື່ມວນຊົນ ທີ່ເຂົ້າຮ່ວມ ໄດ້ປະຕິບັດພາລະບົດບາດຂອງຕົນ, ມີຄວາມຮັບຜິດຊອບຕໍ່ໜ້າທີ່, ຕໍ່ສັງຄົມ ກໍຄືປະເທດຊາດ, ສ່ອງແສງໃຫ້ເຫັນເຖິງຄວາມມຸ່ງມາດປາດຖະໜາ ແນວທາງນະໂຍບາຍຂອງພັກ ໃນການຂັບເຄື່ອນພັດທະນາແບບຍືນຍົງ ໂດຍນຳໃຊ້ບົດຮຽນຂອງໂຄງການ GAMCIL ທີ່ມີຊ່ຽວຊານຈາກຕ່າງປະເທດ ມາຖ່າຍທອດຄວາມຮູ້, ບົດຮຽນ ແລະ ປະສົບການ. ນອກນັ້ນ, ກໍຕ້ອງສືບຕໍ່ຜັນຂະຫຍາຍໃຫ້ກັບຄູ່ຮ່ວມງານ, ເພື່ອນຮ່ວມງານໃນການປະຕິບັດໜ້າທີ່ວຽກງານດັ່ງກ່າວ ໃຫ້ນັບມື້ນັບມີປະສິດທີພາບ ເພື່ອການພັດທະນາສີຂຽວ ແລະ ຍືນຍົງ ໃນ ສປປ ລາວ.

ກິດຈະກຳດັ່ງກ່າວ, ໄດ້ຈັດຂຶ້ນໃນທ້າຍອາທິດຜ່ານມານີ້, ໂດຍມີ ທ່ານ ນາງ ບົວຄໍາ ດວງປັນຍາ ຫົວໜ້າໂຄງການ GAMCIL ອົງການແຄຣ໌ ນານາຊາດ ປະຈຳລາວ, ພ້ອມດ້ວຍຄະນະຜູ້ປະສານງານຂັ້ນສູນກາງ, ແຂວງຈໍາປາສັກ ແລະ ຜູ້ອຳນວຍຄວາມສະດວກຂອງໂຄງການ GAMCIL ຈາກນະຄອນຫຼວງວຽງຈັນ, ແຂວງຫຼວງພະບາງ ແລະ ພະນັກງານໂຄງການ ເຂົ້າຮ່ວມ.

(ຂ່າວ-ພາບ: ວິໄລວອນ ສິດທິໄຊ)