 |
ໃນໂອກາດດັ່ງກ່າວ, ທ່ານ ສີຈິ້ນຜິງ ໄດ້ສະເໜີຂໍ້ສະຫຼຸບສຳຄັນທີ່ວ່າ “ບໍ່ມີສຸຂະພາບທົ່ວປວງຊົນ ກໍຈະບໍ່ມີຄວາມອີ່ມໜຳສຳລານຮອບດ້ານ” ແລະ ຍັງໄດ້ຮຽກຮ້ອງຕື່ມອີກວ່າ ໃຫ້ຊຸກຍູ້ຫັນເອົາຈຸດສຸມຂອງວຽກງານສາທາລະນະສຸກ ແລະ ຊັບພະຍາກອນສາທາລະນະສຸກລົງສູ່ຮາກຖານ.
ສະຖານທີ່ປິ່ນປົວຂັ້ນຮາກຖານເປັນພື້ນຖານຂອງລະບົບບໍລິການປິ່ນປົວ ແລະ ສາທາລະນະສຸກຂອງຈີນ ທັງເປັນແນວປ້ອງກັນສາຍທຳອິດແຫ່ງການປົກປ້ອງສຸຂະພາບຂອງປະຊາຊົນ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພພັກກອມມູນິດຈີນ ເມື່ອປີ 2012 ເປັນຕົ້ນມາ, ທ່ານ ສີຈິ້ນຜິງ ໄດ້ລົງເຄື່ອນໄຫວຢ້ຽມຢາມທົ່ວປະເທດຈີນແຕ່ເໜືອຮອດໃຕ້, ໃນນັ້ນ ສະຖານທີ່ປິ່ນປົວຂັ້ນຮາກຖານເຊັ່ນ: ສຸກສາລາບ້ານຊົນນະບົດ ແລະ ອື່ນໆ ເປັນຈຸດສຸມທີ່ເພິ່ນເອົາໃຈໃສ່ມາໂດຍຕະຫຼອດ.
ທ້າຍປີ 2012, ທ່ານ ສີຈິ້ນຜິງ ໄດ້ແຂ່ງອາກາດທີ່ໜາວຈັດຕິດລົບ 10 ກວ່າອົງສາ, ຝ່າລົມແຮງ ແລະຫິມະໄປຮອດບ້ານລົ້ວຖົວວ່ານ ເມືອງຟູ້ຜິງ ແຂວງເຫີເປີຍ. ຢູ່ໃນເຮືອນຂອງພໍ່ຕູ້ ຖັງຣົງປິ່ນ ຊາວບ້ານຜູ້ທຸກຍາກ, ທ່ານ ສີຈິ້ນຜິງ ໄດ້ສອບຖາມພໍ່ຕູ້ກ່ຽວກັບສະພາບການປິ່ນປົວ, ການໃຊ້ຢາ ແລະການເຂົ້າເຖິງລະບົບຮ່ວມມືປະກັນສຸຂະພາບຊົນນະບົດແບບໃໝ່ ພ້ອມທັງຈັບຂວດຢາມາເບິ່ງຢ່າງລະອຽດ.
ປີ 2016, ສູນກາງພັກຄອມມູນິດຈີນ ແລະລັດຖະບານຈີນ ໄດ້ຈັດກອງປະຊຸມສາທາລະນະສຸກ ແລະສຸຂະພາບທົ່ວປະເທດຄັ້ງທຳອິດ ນັບແຕ່ຕົ້ນສະຕະວັດທີ 21 ເປັນຕົ້ນມາ. ທ່ານ ສີຈິ້ນຜິງ ໄດ້ກ່າວຄຳປາໄສໃນກອງປະຊຸມ ໂດຍກຳນົດຢ່າງຈະແຈ້ງກ່ຽວກັບທິດທາງວຽກງານສາທາລະນະສຸກ ແລະສຸຂະພາບຂອງພັກໃນຍຸກໃໝ່ຄື: “ຖືຂັ້ນຮາກຖານເປັນຈຸດສຸມ, ຖືການປະຕິຮູບ ແລະປະດິດສ້າງເປັນແຮງຂັບເຄື່ອນ, ຖືການປ້ອງກັນເປັນຫຼັກ, ໃຫ້ຄວາມສຳຄັນເທົ່າທຽມກັນຕໍ່ຢາພື້ນເມືອງຈີນ ແລະຢາຫຼວງ, ຈັດເອົາການຮັກສາສຸຂະພາບເຊື່ອມໂຍງເຂົ້າໃນນະໂຍບາຍທຸກຢ່າງ, ປະຊາຊົນສ້າງສາຮ່ວມກັນ ແລະຊົມໃຊ້ຮ່ວມກັນ”.
ຈາກການຫັນຈຸດສຸມຂອງວຽກງານສາທາລະນະສຸກ, ຊັບພະຍາກອນສາທາລະນະສຸກລົງສູ່ຮາກຖານ ຮອດການຖືຂັ້ນຮາກຖານເປັນຈຸດສຸມ, ແມ່ນໄດ້ສອດຫ້ອຍເປັນຫຼັກການອັນຊັດເຈນຄື: ເຮັດທຸກສິ່ງຢາງເພື່ອສຸຂະພາບຂອງປະຊາຊົນ.
ເມື່ອເປີດເບິ່ງແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 15 ຂອງຈີນຈະເຫັນໄດ້ວ່າ: ເນື້ອໃນກ່ຽວກັບ “ການເລັ່ງສ້າງສາປະເທດຈີນທີ່ມີສຸຂະພາບ” ໄດ້ຖືກຈັດເປັນພາກໜຶ່ງສະເພາະ, ໃນນີ້ໄດ້ລະບຸເປັນການສະເພາະວ່າ: “ຈັດຕັ້ງປະຕິບັດໂຄງການເສີມສ້າງການປິ່ນປົວ ແລະສາທາລະນະສຸກຂັ້ນຮາກຖານ, ເພີ່ມທະວີການຮັບປະກັນການດຳເນີນງານຂອງສະຖານທີ່ປິ່ນປົວຂັ້ນເມືອງ ແລະ ຂັ້ນຮາກຖານ.”
ນັບມາຮອດທ້າຍປີ 2025, ຈຳນວນສະຖານທີ່ປິ່ນປົວຂັ້ນຮາກຖານຂອງຈີນ ໄດ້ເພີ່ມຈາກ 970,000 ແຫ່ງຂຶ້ນເປັນ 1,055,000 ແຫ່ງ, ອາຍຸຍືນຕາມຄາດໝາຍສະເລ່ຍຕໍ່ຫົວຄົນບັນລຸເຖິງ 79,25 ປີ. ນັບແຕ່ປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 14 ເປັນຕົ້ນມາ, ປະລິມານການກວດພະຍາດ ແລະ ປິ່ນປົວຄົນເຈັບຂອງສະຖານທີ່ປິ່ນປົວຂັ້ນຮາກຖານຂອງຈີນ ໄດ້ກວມຍອດປະລິມານການກວດພະຍາດ ແລະປີ່ນປົວຄົນເຈັບໃນທົ່ວປະເທດຮັກສາຢູ່ໃນ50% ຂຶ້ນໄປມາໂດຍຕະຫຼອດ.
 |
ປີ 2025, ປະລິມານການບໍລິການຄົນເຈັບພາຍນອກຂອງໂຮງໝໍຕາແສງຊື້ເຢ້ແຂວງຈ່ຽງຊູ ໄດ້ບັນລຸເຖິງ 67,000 ເທື່ອຄົນ, ເພີ່ມຂຶ້ນຫຼາຍກວ່າ 50% ເມື່ອທຽບໃສ່ປີ 2014, ການເລືອກໃຊ້ບໍລິການກວດພະຍາດຄັ້ງທຳອິດຢູ່ສະຖານທີ່ປິ່ນປົວຂັ້ນຮາກຖານ ບັນລຸເຖິງ 84%, ລະດັບຄວາມເພິ່ງພໍໃຈຕໍ່ການບໍລິການຂອງຄົນເຈັບບັນລຸຫຼາຍກວ່າ 95%.
ຈາກໂຮງໝໍເທິງເກາະດອນນ້ອຍຮອດສະຖານທີ່ປິ່ນປົວຂັ້ນຮາກຖານທີ່ປົກຄຸມທົ່ວປະເທດ ຕະຫຼອດຮອດຕາໜ່າງເຄືອຂ່າຍປົກປ້ອງສຸຂະພາບປະຊາກອນ 1.4 ຕື້ກວ່າຄົນ, ການເຄື່ອນໄຫວເຮັດວຽກຂອງທ່ານ ສີຈິ້ນຜິງ ໄດ້ເປັນການທົດສອບປະສິດທິຜົນຂອງມາດຕະການຫັນຊັບພະຍາກອນສາທາລະນະສຸກລົງສູ່ຮາກຖານ, ທັງສົ່ງມອບຄວາມອົບອຸ່ນທີ່ຖືປະຊາຊົນເປັນສິ່ງສຳຄັນກວ່າໝູ່.
ໂດຍ: ວິທະຍຸ, ໂທລະພາບສູນກາງຈີນ (CMG)
ຄໍາເຫັນ