 |
ການຊຸກຍູ້ຂະບວນການຄວາມທັນສະໄໝແບບຈີນ, ການປະດິດສ້າງດ້ານວິທະຍາສາດເຕັກໂນໂລຊີເປັນເສັ້ນທາງທີ່ຕ້ອງເດີນຜ່ານ. ໃນປີ 2026 ຊຶ່ງເປັນປີເລີ່ມຕົ້ນປະຕິບັດແຜນການ 5 ປີ ຄັ້ງທີ 15, ທຸກຂະແໜງການປະກົດມີກະແສຟອງການປະດິດສ້າງຢ່າງບໍ່ຢຸດຢັ້ງ ຊຶ່ງສະແດງໃຫ້ເຫັນຢ່າງມີຊີວິດຊີວາເຖິງເສດຖະກິດພັດທະນາຢ່າງມີຄຸນນະພາບສູງ.
1, ອຸດສາຫະກຳດັ້ງເດີມມີການປັບປຸງໃໝ່ຍົກລະດັບສູງຂຶ້ນ
ອຸດສາຫະກຳດັ້ງເດີມຂອງຈີນກວມອຸດສາຫະກຳການຜະລິດຫຼາຍກວ່າ 80%, ເປັນພື້ນຖານຂອງລະບົບອຸດສາຫະກຳທັນສະໄໝ.
ຈີນໄດ້ກຳແໜ້ນຄວາມຕ້ອງການຂອງຕະຫຼາດ, ເພີ່ມທະວີການປະດິດສ້າງດ້ານວິທະຍາສາດເຕັກໂນໂລຊີ, ອຸດສາຫະກຳດັ້ງເດີມໄດ້ເກີດມີພະລັງຊີວິດຊີວາອັນໃໝ່ຢ່າງຕໍ່ເນື່ອງ. ຍົກເອົາອຸດສາຫະກຳການຜະລິດເຮືອເປັນຕົວຢ່າງ: ຫົກເດືອນຕົ້ນປີນີ້, ອຸດສາຫະກຳການຜະລິດເຮືອຂອງຈີນໄດ້ສ້າງສະຖິຕິໃໝ່ເປັນປະຫວັດສາດໃນດ້ານ 3 ຕົວຊີ້ວັດຫຼັກຄື: ປະລິມານການຜະລິດ, ປະລິມານໃບສັ່ງຊື້ໃໝ່ ແລະ ປະລິມານໃບສັ່ງຊື້ທີ່ມີຢູ່ແລ້ວ ຊຶ່ງສືບຕໍ່ນຳໜ້າໃນຕະຫຼາດໂລກ. ຈາກການຜະລິດກ່ຳປັ່ນສິນຄ້າພຽງຢ່າງດຽວກ້າວໄປສູ່ກຸ່ມອຸດສາຫະກຳກ່ຳປັ່ນລະດັບສູງທີ່ມີຄວາມຫຼາກຫຼາຍ, ອຸດສາຫະກຳການຜະລິດເຮືອຂອງຈີນກຳລັງເປີດຂະບວນການໃໝ່ແຫ່ງການມຸ່ງໜ້າສູ່ການບັນລຸເປົ້າໝາຍຢ່າງອາດຫານ.
 |
ມູນຄ່າເພີ່ມຂອງອຸດສາຫະກຳການຜະລິດຈີນໄດ້ກວມເອົາເກືອບ 30% ຂອງທົ່ວໂລກ, ຄອງອັນດັບໜຶ່ງຂອງໂລກຢ່າງໝັ້ນທ່ຽງເປັນເວລາ 16 ປີລຽນຕິດ; ລວມຍອດຜະລິດຕະພັນພາຍໃນ ຫຼື GDP ຂອງເຂດພັດທະນາອຸດສາຫະກຳເຕັກນິກຂັ້ນສູງແຫ່ງຊາດ 179 ແຫ່ງບັນລຸຫຼາຍກວ່າ 20,000 ຕື້ຢວນ, ກຳລັງການແຂ່ງຂັນໃນສາກົນຂອງກຸ່ມອຸດສາຫະກຳການຜະລິດທັນສະໄໝແຫ່ງຊາດ 80 ແຫ່ງໄດ້ຍົກສູງຂຶ້ນຢ່າງຕໍ່ເນື່ອງ… ຂີດຄວາມສາມາດການຜະລິດທີ່ກ້າວກະໂດດຂຶ້ນຢ່າງບໍ່ຢຸດຢັ້ງ ໄດ້ສະທ້ອນໃຫ້ເຫັນເຖິງຈີນໃນຖານະເປັນປະເທດໃຫຍ່ກຳລັງຢວ່າງບາດກ້າວອັນເດັດດ່ຽວຢ່າງບໍ່ລົດລະ ໄປສູ່ການເພິ່ງຕົນແອງ ແລະ ສ້າງຄວາມເຂັ້ມແຂງດ້ວຍຕົນເອງດ້ານເຕັກໂນໂລຊີສຳຄັນຕົ້ນຕໍ.
2, ອຸດສາຫະກຳຈະເລີນໃໝ່ພັດທະນາຢ່າງຟົດຟື້ນ
ອຸດສາຫະກຳຈະເລີນໃໝ່ເປັນຂໍກຸນແຈສຳຄັນ ເພື່ອເລັ່ງສ້າງກຳລັງການ ຜະລິດໃນຄຸນນະພາບໃໝ່, ເປັນສິ່ງຄ້ຳຊູອັນສຳຄັນໃນການຊຸກຍູ້ການຫັນປ່ຽນ ແລະ ຍົກລະດັບເສດຖະກິດ.
ເດືອນກໍລະກົດປີນີ້, ຈະຫຼວດສົ່ງຍານ “ສາງເຈີ່ງ 10 B” ໄດ້ປະສົບຜົນສຳເລັດຢ່າງຈົບງາມ ໃນການປະຕິບັດພາລະກິດເກັບຄືນທ່ອນຈະຫຼວດຫຼັງຈາກຍິງສົ່ງດາວທຽມຂຶ້ນສູ່ອະວະກາດເປັນຄັ້ງທຳອິດ ຊຶ່ງເປັນຂີດໝາຍສະແດງໃຫ້ເຫັນວ່າ: ເຕັກໂນໂລຊີການນຳໃຊ້ຈະຫຼວດຫຼາຍເທື່ອຂອງຈີນໄດ້ຮັບການບຸກທະລຸທີ່ສຳຄັນຍິ່ງ; ຫົກເດືອນຕົ້ນປີນີ້, ປະລິມານການຜະລິດຫຸ່ນຍົນອຸດສາຫະກຳໄດ້ເພີ່ມຂຶ້ນ 28% ເມື່ອທຽບໃສ່ໄລຍະດຽວກັນຂອງປີກາຍ; ຢາປະດິດສ້າງໃໝ່, ພືດກະສິກຳສາຍພັນໃໝ່ ແລະ ໝາກຜົນດ້ານວິທະຍາສາດເຕັກໂນໂລຊີຈຳນວນໜຶ່ງ ໄດ້ນຳເອົາຜົນປະໂຫຍດມາສູ່ປະຊາຊົນຈຳນວນຫຼວງຫຼາຍຢ່າງທົ່ວເຖິງ…ອຸດສາຫະກຳເສົາຄ້ຳທີ່ຈະເລີນໃໝ່ຂອງຈີນໄດ້ພັດທະນາຢ່າງຟົດຟື້ນ, ເພີ່ມແຮງຂັບເຄື່ອນໃໝ່ອັນເຂັ້ມແຂງເຂົ້າໃນການກໍ່ສ້າງລະບົບອຸດສາຫະກຳທັນສະໄໝ.
3. ວາງແຜນລ່ວງໜ້າຂອງອຸດສາຫະກຳລ້ຳຍຸກ
ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 15 ຂອງຈີນ ໄດ້ວາງແຜນຢ່າງເປັນລະບົບກ່ຽວກັບການພັດທະນາອຸດສາຫະກຳລ້ຳຍຸກ, ກຳນົດຢ່າງຈະແຈ້ງໃຫ້ເລັງໃສ່ນຳພາການພັດທະນາຂົງເຂດຈຸດສຸມໃນອະນາຄົດ, ກໍ່ສ້າງລະບົບບົ່ມເພາະສ້າງຕ່ອງໂສ້ອຸດສາຫະກຳລ້ຳຍຸກແບບຄົບວົງຈອນ, ຊຸກຍູ້ການພັດທະນາວິທະຍາສາດເຕັກໂນໂລຊີຄວັນຕຳ (quantum technology) ອຸດສາຫະກຳການຜະລິດຊີວະພາບ, ພະລັງງານໄຮໂດຣເຈນ ແລະ ພະລັງງານປະຕິກິລິຍາລວມຕົວ, ເຕັກໂນໂລຊີການເຊື່ອມຕໍ່ສະໝອງມະນຸດກັບຄອມພິວເຕີ, ປັນຍາປະດິດປະສານກາຍະພາບ, ເຕັກນິກການສື່ສານເຄື່ອນທີ່ລຸ້ນທີ 6 ແລະ ອື່ນໆໃຫ້ກາຍເປັນຈຸດເຕີບໂຕໃໝ່ດ້ານເສດຖະກິດ.
 |
ປະລິມານການດາວໂຫຼດແບບຈຳລອງປັນຍາປະດິດແບບເປີດ ທີ່ຈີນຜະລິດ ເປັນອັນດັບໜຶ່ງຂອງໂລກ; ມູນຄ່າອຸດສາຫະກຳແກນກາງດ້ານປັນຍາປະດິດບັນລຸ 1,200 ຕື້ຢວນ, ກຳລັງຕົວຈິງສັງລວມດ້ານປັນຍາປະດິດໄດ້ເຂົ້າສູ່ແຖວໜ້າຂອງໂລກ…ການພັດທະນາອຸດສາຫະກຳລ້ຳຍຸກ ໄດ້ຮັບການບຸກທະລຸໃໝ່ຢ່າງບໍ່ຢຸດຢັ້ງ, ຈະກະຕຸ້ນແຫຼ່ງພະລັງແຮງຂັບເຄື່ອນການພັດທະນາກຳລັງການຜະລິດໃນຄຸນນະພາບໃໝ່ ໃຫ້ເກີດມີຊີວິດຊີວາຕື່ມອີກ ເພື່ອສ້າງຕົວຂັບເຄື່ອນທີ່ເຂັ້ມແຂງອັນໃໝ່ຫຼາຍກວ່າເກົ່າ ເພື່ອຊຸກຍູ້ການສ້າງສາຄວາມທັນສະໄໝແບບຈີນ.
ໂດຍ: ວິທະຍຸ, ໂທລະພາບສູນກາງຈີນ (CMG)
ຄໍາເຫັນ