ທ່ານ ບຸນເຫຼືອ ສິນໄຊວໍຣະວົງ ຊີ້ແຈງວ່າ: ເສດຖະກິດ ຂອງ ສປປລາວ ທີ່ຕິດພັນກັບວຽກງານເງິນຕາ ມີ 3 ຈຸດພິເສດຄື: ປັດຈຸບັນປະເທດເຮົາທີ່ກຳລັງປະເຊີນຢູ່ ໃນຖານະເງິນຕາຂອງປະເທດເຮົາຍັງບໍ່ແຂງແຮງ ເນື່ອງຈາກໂຄງສ້າງພື້ນຖານທາງດ້ານເສດຖະກິດ ແລະ ການຜະລິດຂອງພວກເຮົາຍັງບໍ່ທັນສົມດູນກັບການຊົມໃຊ້ ຈຶ່ງສົ່ງຜົນກະທົບລັກສະນະແກ່ຍາວ. ໃນນັ້ນ, ຄັງເງິນແຮ່ສຳຮອງພວກເຮົາຍັງຕໍ່າຖ້າທຽບໃສ່ມາດຖານຄວາມໝັ້ນຄົງກ່ຽວກັບການກຸມການນໍາເຂົ້າ, ການສຳລະການນໍາເຂົ້າຍັງຕໍ່າ ທຽບໃສ່ກັບພັນທະຈະຕ້ອງສຳລະໜີ້ສິນຕ່າງປະເທດ ກໍຍັງຕໍ່າກວ່າມາດຕະຖານ. ສະນັ້ນ, ຈະຕ້ອງໃຊ້ເວລາ ເພື່ອສ້າງຄວາມເຂັ້ມແຂງໃຫ້ຖານະເງິນຕາຂອງປະເທດເພີ່ມຂຶ້ນຢ່າງຕໍ່ເນື່ອງ; ດຸ່ນຊຳລະເງິນຕາຕ່າງປະເທດ ກໍຄືການໃຊ້ເງິນຕາຕ່າງປະເທດ ກັບການຫາໄດ້ເງິນຕາຕ່າງປະເທດແມ່ນຂາດດຸ່ນຢ່າງຕໍ່ເນື່ອງ;ເສດຖະກິດຂອງພວກເຮົາເປັນເສດຖະກິດນໍາໃຊ້ສິນຄ້າ ແລະ ການບໍລິການນໍາເຂົ້າ 60%-70% ເຮັດໃຫ້ການເໜັງຕີງຂອງອັດຕາແລກປ່ຽນ ກະທົບໂດຍກົງຕໍ່ລາຄາສິນຄ້ານໍາເຂົ້າ.
ທ່ານ ບຸນເຫຼືອ ສິນໄຊວໍຣະວົງ ໄດ້ຊີ້ແຈງຕື່ມຕໍ່ປະເດັນອັດຕາເງິນເຟີ້ ຫຼື ການຄຸ້ມຄອງອັດຕາເງິນເຟີ້ວ່າ: ບັນຫາເງິນເຟີ້ເປັນບັນຫາທີ່ຍາກສົມຄວນໃນການຄຸ້ມຄອງ ສາເຫດມາຈາກອັດຕາແລກປ່ຽນອ້ອມຂ້າງ (ນອກລະບົບ)ຍັງມີ. ເຖິງວ່າ 5 ເດືອນ ຕົ້ນປີ 2024 ຈັງຫວະການອ່ອນຄ່າຂອງອັດຕາແລກປ່ຽນຍັງສືບຕໍ່ຢູ່ໃນຈັງຫວະທີ່ຊ້າກວ່າ ປີ 2023 ຜ່ານມາ. ໃນນັ້ນ, ບັນຫາການເພີ່ມຂຶ້ນຂອງປະລິມານເງິນ M2 (ການຄຸ້ມຄອງປະລິມານເງິນໃນຂອດຈໍລະຈອນ) ກໍຍັງຢູ່ໃນລະດັບທີ່ສູງ, ຄວາມເຊື່ອໝັ່ນຕໍ່ເສດຖະກິດຂອງພວກເຮົາຍັງບໍ່ທັນສູງ. ສຳລັບອັດຕາເງິນເຟີ້ ທຫລ ຈະສືບຕໍ່ຢ່າງຕັ້ງໜ້າ ໂດຍສະເພາະຈະຕ້ອງຄຸ້ມຄອງເງິນຕາຕ່າງປະເທດໃຫ້ມີສະຖຽນລະພາບຫຼາຍຂຶ້ນກວ່າເກົ່າ ເພື່ອເຮັດໃຫ້ບັນຫາເງິນເຟີ້ຫຼຸດລົງໄດ້. ໃນ 5 ເດືອນ ຕົ້ນປີ 2024 ອີງໃສ່ສະຖິຕິການສົ່ງອອກ, ມີສະຖິຕິເກີນດຸນສິນຄ້າ ແຕ່ມາໄລ່ເບິ່ງກະແສເງິນແລ້ວ, ບໍ່ໄດ້ເກີນດຸນ. ພ້ອມນັ້ນ, ພວກເຮົາຕ້ອງເພີ່ມການສົ່ງອອກໃຫ້ສູງ ເພື່ອເຮັດໃຫ້ກະແສເງິນຕົວຈິງໃຫ້ມັນດຸນ. ປັດຈຸບັນໄດ້ມີບໍລິສັດລົງທະບຽນແລ້ວ ມີ 3.300 ບໍລິສັດ ມີທັງບໍລິສັດນໍາເຂົ້າ-ສົ່ງອອກ. ໃນນັ້ນ, ມີ 1.178ບໍລິສັດ ໄດ້ມີແຈ້ງບັນຊີຫັນເປັນບັນຊີສະເພາະໃຫ້ ທຫລ ສາມາດຕິດຕາມຈໍານວນເງິນການນໍາເຂົ້າ-ສົ່ງອອກ. ພ້ອມນັ້ນ, ຍັງຊຸກຍູ້ໃຫ້ 3.300 ບໍລິສັດດັ່ງກ່າວນັ້ນ ຫັນບັນຊີມາເປັນບັນຊີສະເພາະ ພື່ອຕິດຕາມກວດກາການນໍາເຂົ້າ-ສົ່ງອອກທັງໝົດໃຫ້ສາມາດນໍາເງິນເຂົ້າມາໄດ້. ພ້ອມກັນນັ້ນ, ໄດ້ເພີ່ມທະວີການຄຸ້ມຄອງເງິນຕາຈາກແຫຼ່ງອື່ນ ໂດຍສະເພາະການທ່ອງທ່ຽວ ຕາມສະຖິຕິ ໃນປີ 2023 ສາມາດສ້າງແຫຼ່ງເງິນຕາເຂົ້າໃນລະບົບເສດຖະກິດ ໄດ້ເກືອບ 1 ຕື້ໂດລາ. ພ້ອມນັ້ນ, ເພື່ອສະດວກໃຫ້ແກ່ນັກທ່ອງທ່ຽວເຂົ້າມາທ່ຽວ ສປປ ລາວ ໄດ້ມີການພັດທະນາຄິວອາໂຄດ ລະຫວ່າງລາວ-ໄທ, ລາວ-ຫວຽດນາມ, ລາວ-ຈີນ. ສິ່ງສໍາຄັນໃນວັນທີ 8 ກໍລະກົດ ປີ 2024 ນີ້ ຈະເປີດຄິວອາໂຄດໄທສະແກນລາວ ເພື່ອສະດວກໃນການຈ່າຍເງິນບາດໄດ້ເລີຍ ແລະ ໃນທ້າຍເດືອນກໍລະກົດ 2024 ນີ້ ຈະເປີດຄິວອາໂຄດ ຫວຽດນາມສະແກນລາວໄດ້ ເພື່ອບໍ່ໃຫ້ໄປແລກເງິນນອກລະບົບ. ພ້ອມນີ້, ອັດຕາເງິນເຟີ້ ໃນປີ 2024 ຈະມີແນວໂນ້ມຫຼຸດລົງ. ໃນນັ້ນ, ໃນໄລຍະສັ້ນ, ໄລຍະກາງ, ໄລຍະຍາວ ທຫລ ໄດ້ເຮັດແຜນຟື້ນຟູ ຖານະເງິນຕາຕ່າງປະເທດ ພ້ອມໄດ້ສົມທົບກັບກະຊວງການເງິນເຮັດແຜນຟື້ນຟູຖານະງົບປະມານຮ່ວມກັນ ຮອດປີ 2030 ພ້ອມຈະປັບປຸງທະນາຄານນະໂຍບາຍຫັນເປັນທະນາຄານພັດທະນາຊົນນະບົດ.
(ຂ່າວ: ວັນເພັງ, ພາບ: ຕຸໄລເພັດ)
ຄໍາເຫັນ