ກໍາມະການໂຄສະນາ-ຂ່າວສານ ມີພາລະບົດບາດ ເປັນເສນາທິການໃຫ້ປະທານ ເພື່ອຄົ້ນຄວ້າການໂຄສະນາຜ່ານສື່ມວນຊົນ ແລະ ລາຍງານຂ່າວສານກ່ຽວກັບການຈັດງານໃຫ້ມີລັກສະນະປຸກລະ ດົມຄວາມສາມັກຄີ, ການມີສ່ວນຮ່ວມເປັນເຈົ້າພາບທີ່ດີ, ການມີນໍ້າໃຈນັກກິລາ, ການຊຸກຍູ້ຮ່ວມຊົມ ໃຫ້ໄດ້ບັນຍາກາດມ່ວນຊື່ນ ໄມຕີຈິດທີ່ດີ (ກ່ອນ, ດໍາເນີນ ແລະ ຫຼັງ); ສ້າງແຜນການເຄື່ອນໄຫວວຽກກຳມະການ ແລະ ແຜນງົບຂອງຕົນເພື່ອສະເໜີຂັ້ນເທິງພິຈາລະນາ; ຮັບຜິດຊອບຄົ້ນຄວ້າ ແລະ ແຈ້ງລາຍລະອຽດໃຫ້ບັນດາອົງການສື່ມວນຊົນພາກລັດ, ເອກະຊົນ ແລະ ຕ່າງປະເທດ (ທາງອອນລາຍ) ທີ່ຕ້ອງການເຂົ້າຮ່ວມເຄື່ອນໄຫວເອົາຂ່າວງານມະຫະກຳກິລາແຫ່ງຊາດ ຄັ້ງທີ XII ເພື່ອມາລົງທະບຽນອອກບັດຮັບໃຊ້; ຈັດຕັ້ງສູນຂ່າວພາຍໃນ ແລະ ຕ່າງປະເທດ ພ້ອມທັງສະໜອງອຸປະກອບອໍານວຍຄວາມສະດວກຢ່າງຄົບຊຸດ ສໍາລັບນັກຂ່າວຢູ່ສະໜາມກິລາແຫ່ງຊາດ; ກຽມພະນັກງານຄຸ້ມຄອງສື່ມວນຊົນພາຍໃນ ແລະ ຕ່າງປະເທດ ເພື່ອອໍານວຍຄວາມສະດວກ ແລະ ປະສານງານ ໃຫ້ນັກຂ່າວທີ່ເຂົ້າຮ່ວມ; ສ້າງລາຍການຕາຕະລາງການຖ່າຍທອດສົດທາງໂທລະພາບ-ວິທະຍຸພິທີເປີດ-ປິດ ແລະ ບາງປະເພດກິລາ ຮ່ວມກັບກຳມະການກອງເລຂາແຫ່ງຊາດ ແລະ ກຳມະການເຕັກນິກຈັດການແຂ່ງຂັນ; ຈັດແບ່ງນັກຂ່າວປະຈຳແຕ່ລະຈຸດຢູ່ສະໜາມແຂ່ງຂັນກິລາ ເພື່ອຕິດຕາມລາຍງານຂ່າວອອກທາງໂທລະພາບ, ວິທະຍຸ, ໜັງສືພິມ ແລະ ອອນລາຍ ໄລຍະດໍາເນີນການແຂ່ງຂັນ; ບັນທຶກພາບນຶ່ງ ແລະ ວິດີໂອ ລວມທັງຂໍ້ມູນງານກິລາທັງໝົດເພື່ອສໍາເນົາ; ອອກແບບໂຄງຮ່າງງານວາງສະແດງຮູບພາບ, ຄັດເລືອກຮູບພາບ ເພື່ອນໍາສະເໜີຜ່ານປະທານຈັດງານພິຈາລະນາ; ຈັດກອງປະຊຸມຂ່າວປະຈໍາວັນ ທີ່ສູນຂ່າວພາຍໃນ (MPC) ໃນໄລຍະດໍາເນີນງານ ເພື່ອລາຍງານວຽກແຕ່ລະໜ່ວຍງານ ແລະ ປຶກສາຫາລື ວຽກທີ່ຍັງຄົງຄ້າງ; ສະຫຼຸບລາຍງານວຽກກຳມະການໂຄສະນາ-ຂ່າວສານ ໃຫ້ແກ່ກຳມະການກອງເລຂາແຕ່ລະໄລຍະເປັນປົກກະຕິ ລວມທັງການໃຊ້ຈ່າຍດ້ານງົບປະມານ; ປະຕິບັດພາລະໜ້າທີ່ອື່ນໆ ຕາມການມອບໝາຍຂອງປະທານຈັດງານ.
ວຽກທີ່ໄດ້ຈັດຕັ້ງປະຕິບັດຜ່ານມາ: ໄດ້ແນະນໍາໃຫ້ບັນດາອົງການສື່ມວນຊົນ ທົ່ວປະເທດຊ່ວຍກັນໂຄສະນາໂລໂກ້, ສັດນໍາໂຊກ, ຄໍາຂວັນ ແລະ ການກະກຽມນັກກິລາຂອງແຂວງຕົນອອກແຕ່ລະສໍານັກຂ່າວທັງສູນກາງ ແລະ ທ້ອງຖິ່ນ ຢ່າງເປັນຂະບວນການ ແລະ ຕໍ່ເນື່ອງ; ໄດ້ນໍາສົ່ງຮ່າງແຜນວຽກ, ແຜນຄົນ ແລະ ແຜນງົບປະມານ ຂອງກໍາມະການໂຄສະນາ-ຂ່າວສານ ສົ່ງໃຫ້ກອງເລຂາ ເພື່ອພິຈາລະນາອະນຸມັດ; ປະທານຮັບຮອງເຊັນຂໍ້ຕົກລົງວ່າດ້ວຍການແຕ່ງຕັ້ງອະນຸກຳມະການຝ່າຍຕ່າງໆ ຂອງກໍາມະການໂຄສະນາ-ຂ່າວສານ ເພື່ອຮັບໃຊ້ງານມະຫະກຳກິລາແຫ່ງຊາດ ຄັ້ງທີ XII ທີ່ ນວ; ໄດ້ກຳນົດຈຸດທີ່ຕັ້ງສູນຂ່າວ ຢູ່ສະໜາມກິລາແຫ່ງຊາດ ຫຼັກ 16 ປະກອບມີ 3 ຫ້ອງຄື: 1 ຫ້ອງຖະແຫຼງຂ່າວ, 2 ຫ້ອງປະຈຳນັກຂ່າວ. ການວາງສະແດງຮູບພາບ ແມ່ນຈັດຢູ່ສະໜາມກິລາແຫ່ງຊາດ ຫຼັກ 16; ສໍາເລັດການຜ່ານແຜນງົບປະມານຂະແໜງສື່ມວນຊົນ ນໍາກໍາມະການກອງເລຂາ ແລະ ກໍາມະການເສດຖະກິດ-ລະດົມທຶນ ປັດຈຸບັນລໍຖ້າຄໍາເຫັນຮອງຮັບຈາກປະທານຈັດງານ ກ່ອນດໍາເນີນຂໍຖອນ; ຈັດຄະນະສື່ມວນຊົນສໍາພາດກຳມະການທຸກຝ່າຍ ປັດຈຸບັນໄດ້ສໍາພາດ ກໍາມະການກອງເລຂາ, ກຳມະການເຕັກນິກ ແລະ ກຳມະການເສດຖະກິດ-ລະດົມທຶນ; ຈັດຄະນະສື່ມວນຊົນຕິດຕາມການແລ່ນທວນໄຟຢູ່ 9 ຕົວເມືອງ ແລະ ປັດຈຸບັນດໍາເນີນໄປແລ້ວ 4 ເມືອງຄື: ເມືອງສັງທອງ, ເມືອງສີໂຄດຕະບອງ, ເມືອງຈັນທະບູລີ ແລະ ເມືອງ ສີສັດຈະນາກ; ສັງລວມແບບຟອມລົງທະບຽນອອກບັດຮັບໃຊ້ ກຳມະການໂຄສະນາ-ຂ່າວສານ ແລະ ນັກຂ່າວ ພາຍໃນ ແລະ ຕ່າງປະເທດທັງໝົດ ສົ່ງໃຫ້ໜ່ວຍ ອອກບັດບໍ່ເກີນວັນທີ 31 ຕຸລາ 2025.
ທ່ານ ສົມສະຫວາດ ພົງສາ ຍັງໄດ້ລາຍງານຕື່ມວ່າ: ສໍາລັບແຜນການຈັດຕັ້ງປະຕິບັດໃນຕໍ່ໜ້າ ຈະສືບຕໍ່ໂຄສະນາໂລໂກ້, ສັດນໍາໂຊກ, ຄໍາຂວັນ, ນັກກິລາ ແລະ ອື່ນໆ ທີ່ຕິດພັນກັບການກະກຽມໃຫ້ແກ່ງານ ມະຫະກຳກິລາແຫ່ງຊາດ ຄັ້ງທີ XII ທີ່ ນວ; ສືບຕໍ່ຈັດຄະນະສື່ມວນຊົນສໍາພາດອີກ 8 ກຳມະການ ແລະ ແລ່ນທວນໄຟອີກ 5 ຕົວເມືອງ; ສົມທົບກັບກຳມະການເປີດ-ປິດ ແລະ ກຳມະການແລ່ນທວນໄຟ ເພື່ອຄົ້ນຄວ້າດ້ານເນື້ອໃນ ແລະ ຮູບການໂຄສະນາ ແຫ່ຂະບວນຢູ່ແຕ່ລະເມືອງ ຕາມການສະເໜີຂອງກອງເລຂາ; ສືບຕໍ່ປະສານກັບກຳມະການກອງເລຂາ ແລະ ກຳມະການເສດຖະກິດ-ລະດົມທຶນ ໃນການຈັດຊື້-ຈັດຈ້າງ ອຸປະກອນໃສ່ສູນຂ່າວ ແລະ ຄ່າແຮງງງານກຳມະການໂຄສະນາ ໃຫ້ໄດ້ກ່ອນການເປີດງານ; ສືບຕໍ່ປະສານສົມທົບກັບກອງເລຂາ ເພື່ອເລັ່ງບູລະນະຫ້ອງຖະແຫຼງຂ່າວ ແລະ ຫ້ອງສູນຂ່າວ ໃຫ້ທັນຕິດຕັ້ງອຸປະກອນ ແລະ ອິນເຕີເນັດໃສ່; ສືບຕໍ່ການອອກບັດຮັບໃຊ້ ໃຫ້ແກ່ກຳມະການໂຄສະນາ-ຂ່າວສານ ແລະ ນັກຂ່າວທຸກທ່ານ ໃຫ້ໄດ້ຮັບກ່ອນງານເປີດ. ວຽກທີ່ຮີບດ່ວນ: ໜ່ວຍງານຖ່າຍທອດສົດ ແລະ ໜ່ວຍງານວາງສະແດງຮູບພາບ ຮີບຮ້ອນຜ່ານແຜນວຽກ ແລະ ແຜນ ງົບປະມານນໍາກໍາມະການກອງເລຂາ ແລະ ກຳມະການເສດຖະກິດ ເພື່ອນໍາສະເໜີຮັບຮອງຈາກ ປະທານ. ດັ່ງນັ້ນ, ຈຶ່ງໄດ້ລາຍງານມາຍັງທ່ານເພື່ອຮັບຊາບ ແລະ ຂໍທິດຊີ້ນໍາໃນການຈັດຕັ້ງປະຕິບັດດ້ວຍ. (ຂ່າວ: ວັນເພັງ, ພາບ: ຂປລ)
ຄໍາເຫັນ