 |
ກອງປະຊຸມໄດ້ເປັນເອກະພາບສູງຕໍ່ການຕີລາຄາດ້ານດີ-ຜົນສໍາເລັດທີ່ຍາດມາໄດ້ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ III ອົງຄະນະພັກກະຊວງການເງິນ, ການຈັດຕັ້ງປະຕິບັດແຜນພັດທະນາຂະແໜງການເງິນ 5 ປີ ແລະ ບົດສໍາຫຼວດການນໍາພາລວມຂອງອົງຄະນະພັກກະຊວງ ສະໄໝທີ III ທີ່ໄດ້ເສີມຂະຫຍາຍຄວາມສາມັກຄີເປັນປຶກແຜ່ນ, ເດັດດ່ຽວໜຽວແໜ້ນ ແລະ ມີຄວາມຕັດສິນໃຈສູງພ້ອມກັນຜ່ານຜ່າຄວາມຫຍຸ້ງຍາກຕ່າງໆ, ນໍາພາທົ່ວຂະແໜງ ການເງິນປະຕິບັດຕາມພາລະບົດບາດຂອງຕົນ, ເດີນຕາມແນວທາງຂອງພັກ, ປະຕິບັດພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກ ກໍຄືສອງໜ້າທີ່ຍຸດທະສາດໃນພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດ, ກອງປະຊຸມໄດ້ພ້ອມກັນຄົ້ນຄວ້າ, ປະກອບຄໍາເຫັນພິຈາລະນາຢ່າງເລິກເຊິ່ງ ແລະ ເປັນເອກະສັນກັນຮັບຮອງເອົາບົດລາຍງານການ ເມືອງ, ແຜນພັດທະນາຂະແໜງການເງິນ 5 ປີ ແຕ່ນີ້ເຖິງປີ 2030. ພ້ອມກັນນັ້ນ, ກໍໄດ້ໃຊ້ສິດປະຊາ ທິປະໄຕເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່ (ຊຸດທີ IV) ຊຶ່ງມີຜູ້ອອກສະໝັກທັງໝົດ 29 ສະຫາຍ, ເລືອກໄດ້ 25 ສະຫາຍ ໃນນີ້ກອງປະຊຸມຄັ້ງປະຖົມມະລືກໄດ້້ເປັນເອກະສັນເລືອກເອົາສະຫາຍ ສັນຕິພາບ ພົມວິຫານ ເປັນເລຂາຄະນະບໍລິຫານງານພັກ, ສະຫາຍ ນາງ ພອນວັນ ອຸທະວົງ ເປັນຮອງເລຂາ ແລະ ເລືອກເອົາສະຫາຍ ພູວົງ ຈິດຕະວົງ ເປັນປະທານກວດກາພັກ.
 |
ໂອກາດນີ້, ສະຫາຍ ສອນໄຊ ສີພັນດອນ ໄດ້ມີຄໍາເຫັນໂອ້ລົມສະແດງຄວາມຍ້ອງຍໍຊົມເຊີຍຕໍ່ຜົນສຳເລັດກອງປະຊຸມ ພ້ອມທັງຮຽກຮ້ອງມາຍັງຄະນະບໍລິຫານງານພັກກະຊວງການເງິນເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກພະນັກງານຢູ່ໃນສອງຂະແໜງການເງິນ ເພີ່ມຄວາມຮັບຜິດຊອບເດັດຂາດ ແລະ ເປັນເຈົ້າການສູງຂຶ້ນ, ຮຽກຮ້ອງໃຫ້ຂະແໜງແຜນການ-ການລົງທຶນ ແລະ ການເງິນຖືເອົາວຽກງານດັ່ງກ່າວເປັນວຽກບູລິມະສິດຕົ້ນຕໍໃນການຜັນຂະຫຍາຍເຂົ້າສູ່ວຽກງານຕົວຈິງຂອງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດໃນຊຸມປີຕໍ່ໜ້າ, ໃຫ້ຂະແໜງ ການເງິນເປັນຂະແໜງການມະຫາພາກ ພາຍຫຼັງການປັບປຸງກົງຈັກການຈັດຕັ້ງແລ້ວ ແລະ ຍັງເປັນເສົາຫຼັກໃນການຂັບເຄື່ອນວຽກງານຕ່າງໆຂອງລັດຖະບານ; ປັບປຸງການສ້າງແຜນໃນໄລຍະໃໝ່ໃຫ້ແທດຕົວຈິງຫຼາຍຂຶ້ນ ແລະ ມີວິທະຍາສາດ, ປະຕິຮູບການລົງທຶນຂອງລັດໃຫ້ມີການຫັນປ່ຽນໃໝ່ໂດຍສະເພາະການຈັດລຽງບຸລິມະສິດ ແລະ ໂຄງການທີ່ຮີບດ່ວນ, ຈໍາເປັນ ແລະ ໃຫ້ປະໂຫຍດແກ່ສັງຄົມ, ມີປະສິດທິຜົນ ແລະ ເຫັນຜົນໄວທາງດ້ານເສດຖະກິດທີ່ແທ້ຈິງ ຄຽງຄູ່ກັບການຈໍາກັດໂຄງການທີ່ບໍ່ມີປະສິດທິຜົນ ກໍເພື່ອບໍ່ສ້າງໜີ້ສະສົມເພີ່ມຂຶ້ນ. ເພີ່ມທະວີຮ່ວມມືກັບສາກົນ, ຮ່ວມມືລາວ-ຫວຽດນາມ ແລະ ຮ່ວມມືລາວ-ຈີນ ການຮ່ວມມືຫຼາຍຝ່າຍ, ສອງຝ່າຍ ແລະ ຂອບຮ່ວມມືຕ່າງໆ ໃຫ້ເອົາໃຈໃສ່ແຕ່ຫົວທີວຽກງານປະເມີນຜົນໂຄງການລົງທຶນໃນແຕ່ລະໄລຍະ, ເລັ່ງໃສ່ການຕິດຕາມ-ກວດກາເປັນປົກກະຕິ ແລະ ຕ້ອງມີມາດຕະການແກ້ໄຂຢ່າງເຂັ້ມງວດ ເລັ່ງຄົ້ນຄວ້າສ້າງ ຫຼື ປັບປຸງບັນດານິຕິກໍາຕ່າງໆ ໃນການຄຸ້ມຄອງລາຍຮັບ-ລາຍຈ່າຍງົບປະມານແຫ່ງລັດຜ່ານກະຊວງການເງິນປະຕູດຽວ ແລະ ວຽກງານອື່ນໆ.
ຂ່າວ-ພາບ: ບຸນອູ້ມ
ຄໍາເຫັນ