ຄໍາມ່ວນ ປະກອບຄໍາເຫັນໃສ່ຮ່າງເອກະສານສໍາຄັນຂອງພັກ

ກອງປະຊຸມຄັ້ງນີ້, ໄດ້ປະກອບຄໍາເຫັນຕໍ່ຮ່າງບົດສຳຫຼວດການນໍາພາລວມ ຂອງຄະນະບໍລິຫານງານສູນກາງພັກ ສະໄໝທີ XI, ຮ່າງກົດລະບຽບພັກປະຊາຊົນ ປະຕິວັດລາວ ສະໄໝທີ XII, ຮ່າງໂຄງການດຳເນີນງານ ຂອງຄະນະບໍລິຫານງານພັກແຂວງຄໍາມ່ວນ, ຮ່າງມະຕິຕົກລົງ ວ່າດ້ວຍລະບອບ ແລະ ແບບແຜນວິທີເຮັດວຽກ ຂອງຄະນະບໍລິຫານງານພັກແຂວງ, ຄະນະປະຈໍາພັກແຂວງຄໍາມ່ວນ, ພ້ອມນີ້ ຍັງໄດ້ຮັບຟັງບົດລານງານກ່ຽວກັບການຄົ້ນຄວ້າ ສັບຊ້ອນ, ຈັດວາງ ແລະ ແບ່ງໜ້າທີ່ຄວາມຮັບຜິດຊອບການນໍາພາ-ຊີ້ນໍາ ວຽກງານຢູ່ແຕ່ລະຂົງເຂດ ແລະ ບັນດາເມືອງ ໃຫ້ບັນດາສະຫາຍໃນຄະນະບໍລິຫານງານພັກແຂວງ ສະໄໝທີ XI.

ໂອກາດກ່າວເປີດກອງປະຊຸມ, ສະຫາຍ ວັນໄຊ ພອງສະຫວັນ ໄດ້ຊີ້ນໍາໃຫ້ບັນດາສະຫາຍໃນຄະນະບໍລິຫານງານພັກແຂວງ ເອົາໃຈໃສ່ເຊີດຊູຄວາມຮັບຜິດຊອບໃນການຄົ້ນຄວ້າ ປະກອບຄໍາເຫັນໃສ່ບັນດາຮ່າງເອກະສານຕ່າງໆໃຫ້ເລິກເຊິ່ງ ເພື່ອຄວາມເປັນເອກະພາບ ທັງເປັນບ່ອນອີງໃຫ້ແກ່ການຈັດຕັ້ງ, ການເຄື່ອນໄຫວຂອງພັກ ໃນຕະຫຼອດໄລຍະ 5 ປີຕໍ່ໜ້າ ໂດຍສະເພາະບັນຫາທີ່ຕິດພັນກັບຂັ້ນທ້ອງຖິ່ນ ເພື່ອໃຫ້ມີຄວາມຖືກຕ້ອງ, ສອດຄ່ອງ ແລະ ແທດເໝາະກັບສະພາບຄວາມເປັນຈິງໃນໄລຍະປັດຈຸບັນ.

(ຂ່າວ-ພາບ: ກອງຄໍາ)