 |
ໃນການພົບປະ, ຜູ້ນຳຂອງທັງສອງຝ່າຍລາວ ແລະ ສະຫະພາບເອີຣົບຕ່າງກໍສະແດງຄວາມປິຕິຍິນດີທີ່ໄດ້ພົບປະກັນໃນຄັ້ງນີ້ ຊຶ່ງເປັນຂີດໝາຍອັນສຳຄັນປະກອບສ່ວນເຂົ້າໃນການສືບຕໍ່ຮັດແໜ້ນແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີທີ່ມີຢູ່. ພ້ອມນີ້, ສອງຝ່າຍກໍໄດ້ສະແດງຄວາມຍິນດີ, ຕີລາຄາສູງ ແລະ ຊົມເຊີຍເປັນຢ່າງຍິ່ງຕໍ່ການພົວພັນຮ່ວມມື ລະຫວ່າງ ສປປ ລາວ ແລະ ອີຢູ ໃນໄລຍະຜ່ານມາ ຊຶ່ງ ຜູ້ນຳລາວ ແລະ ອີຢູໄດ້ແລກປ່ຽນການຢ້ຽມຢາມ ແລະ ພົບປະກັນປົກກະຕິ. ພິເສດໃນປີ 2025 ນີ້ ເປັນປີທີ່ມີຄວາມໝາຍສໍາຄັນທາງດ້ານປະຫວັດສາດແຫ່ງການສ້າງຕັ້ງສາຍພົວພັນທາງການທູດລະຫວ່າງ ສປປ ລາວ ແລະ ອີຢູ ຄົບຮອບ 50 ປີ (21 ພະຈິກ 1975). ສອງຝ່າຍມີແຜນຈະຈັດງານສະເຫຼີມສະຫຼອງຮ່ວມກັນລວມທັງການກະກຽມກອງປະຊຸມຄະນະກຳມາທິການຮ່ວມລາວ-ອີຢູ ຄັ້ງທີ 12 ທີ່ບຣຸກແຊນ ຊຶ່ງຄັ້ງນີ້ຝ່າຍອີຢູຈະເປັນເຈົ້າພາບໃນປີ 2026 ເພື່ອທົບທວນຄືນຜົນການຈັດຕັ້ງປະຕິບັດວຽກງານຮ່ວມມືສອງຝ່າຍໃນຂົງເຂດການຕ່າງໆໃນໄລຍະຜ່ານມາ ແລະ ການວາງທິດທາງແຜນການຮ່ວມມືໃນຕໍ່ໜ້າ.
ພ້ອມນີ້, ຜູ້ນຳຂອງທັງສອງຝ່າຍລາວ ແລະ ສະຫະພາບເອີຣົບ ໄດ້ຢືນຢັນ ແລະ ສະແດງຄວາມມຸ່ງໝັ້ນນຳກັນວ່າຈະສືບຕໍ່ຮັກສາການພົວພັນແຫ່ງມິດຕະພາບ ແລະ ການຮ່ວມມືອັນດີງາມທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ. ພ້ອມກັນນີ້, ສອງຝ່າຍໄດ້ລົງເລິກປຶກສາຫາລືການພົວພັນຮ່ວມມືລະຫວ່າງ ສປປ ລາວ ແລະ ອີຢູ ທີ່ໄດ້ຮັບຜົນສໍາເລັດໃນຫຼາຍດ້ານ ແລະ ປຶກສາຫາລືຂົງເຂດທີ່ມີຄວາມສົນໃຈຮ່ວມກັນຄື: ການປ່ຽນແປງສະພາບດິນຟ້າອາກາດ, ພະລັງງານສະອາດ ແລະ ເສດຖະກິດສີຟ້າ, ການສຶກສາ, ການລົງທຶນ ແລະ ວຽກງານສາທາລະນະສຸກ ແລະ ເຫັນດີສືບຕໍ່ຮັດ ແໜ້ນການພົວພັນຮ່ວມມື ແລະ ສະໜັບສະໜູນຊຶ່ງກັນ ແລະ ກັນໃນຂອບຫຼາຍຝ່າຍເປັນຕົ້ນໃນຂອບອາຊຽນ ຊຶ່ງໃນປີ 2027 ນີ້ກໍຈະເປັນປີຄົບຮອບ 50 ປີແຫ່ງການພົວພັນອາຊຽນ-ອີຢູ. ນອກນີ້, ຍັງໄດ້ປຶກສາຫາລືການສະໜັບສະໜູນ ສປປ ລາວ ໃນການເປັນປະທານກອງປະຊຸມທົບທວນຄືນຄັ້ງທີ 3 ຂອງສົນທິ ສັນຍາວ່າດ້ວຍການເກືອດຫ້າມລະເບີດລູກຫວ່ານ ຊຶ່ງຈະຈັດຂຶ້ນໃນເດືອນກັນຍາ 2026 ທີ່ນະຄອນຫຼວງວຽງຈັນ ແລະ ການສະໜັບສະໜູນ ສປປ ລາວ ອອກຈາກສະຖານະພາບປະເທດດ້ອຍພັດທະນາໃນປີ 2026.
(ຂ່າວ: ກຕທ)
ຄໍາເຫັນ