ທະນາຄານແຫ່ງ ສ ປປ ລາວ ສາຂາພາກເໜືອ ແຂວງຫຼວງພະບາງ ໄດ້ເຄື່ອນໄຫວຕິດຕາມຊຸກຍູ້ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບຢູ່ເມືອງຫົງສາ ແຂວງໄຊຍະບູລີໃນວັນທີ 15 ທັນວາຜ່ານມາ,ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານຮ່ວມຂອງທ່ານ ຈັນເພັງ ອູ່ທອງຄຳ ຮອງເຈົ້າເມືອງຫົງສາ ຜູ້ຊີ້ນຳວຽກງານເສດຖະກິດ ແລະ ທ່ານ ສຸກັນ ຈັນທະວົງ ຫົວໜ້າສາຂາທະນາຄານແຫ່ງ ສປປລາວ ພາກເໜືອ ແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ຮັບຟັງການລາຍງານສະພາບເສດຖະກິດຂອງເມືອງໂດຍຫຍໍ້ ແລະ ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ຕິດພັນກັບພາລະບົດບາດ, ສິດ ແລະ ໜ້າທີ່ຂອງຄະນະຊີ້ນຳ ແລະ ອະນຸກຳມະການຕິດຕາມ, ກວດກາການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ແລະ ສົ່ງເສີມການນຳໃຊ້ເງິນກີບຂັ້ນເມືອງ. ຈາກນັ້ນ,ຕາງໜ້າທະນາຄານແຫ່ງ ສ ປປ ລາວ ສາຂາພາກເໜືອໄດ້ເຜີຍແຜ່ແຈ້ງການຂອງທ່ານເຈົ້າແຂວງໄຊຍະບູລີ ເລກທີ 41, ລົງວັນທີ 20 ມີນາ 2023 ເລື່ອງການຊຳລະ ແລະ ຮັບຊຳລະຄ່າສິນຄ້າ, ບໍລິການ ແລະ ຄ່າອື່ນໆ ເປັນເງິນກີບຂອງນັກລົງທຶນທັງພາຍໃນ ແລະ ຕ່າງປະເທດ ແລະ ການນຳໃຊ້ບັນຊີເງິນຝາກສະເພາະ, ການລາຍງານຂໍ້ມູນລາຍຮັບຈາກການສົ່ງອອກສິນຄ້າ ແລະ ບໍລິການ;ເຜີຍແຜ່ນິຕິກຳຄຸ້ມຄອງເງິນຕາຕ່າງປະເທດກ່ຽວກັບການນຳເຂົ້າ-ສົ່ງອອກສິນຄ້າ ແລະ ການບໍລິການ ສະບັບເລກທີ 677, ລົງວັນທີ 24 ກໍລະກົດ 2022 ຂອງທະນາຄານແຫ່ງ ສ ປປ ລາວ; ເຜີຍແຜ່ແຈ້ງການຂອງທະນາຄານແຫ່ງ ສປປ ລາວ ເລື່ອງການນຳເງິນສົດເຂົ້າ-ອອກສປປ ລາວ ເລກທີ 14 ລົງວັນທີ 13 ກໍລະກົດ 2023; ເຜີແຜ່ຄຳສັ່ງຂອງນາຍົກລັດຖະມົນຕີ ສະບັບເລກທີ 10, ລົງວັນທີ 14 ກໍລະກົດ 2023 ວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ແລະ ເຜີຍແຜ່ກົດໝາຍ ວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງປີ 2022). ກອງປະຊຸມໄດ້ຮ່ວມກັນຄົ້ນຄວ້າ, ປະກອບຄໍາຄິດຄຳເຫັນເພື່ອປຶກສາຫາລືວຽກງານຄຸ້ມຄອງເງິນຕາຕ່າງປະເທດໃຫ້ມີຄວາມຖືກຕ້ອງ, ສອດຄ່ອງກັບສະພາບເສດຖະກິດໃນປັດຈຸບັນ ແລະ ເຫັນດີເປັນເອກະພາບໃນການຄຸ້ມຄອງເງິນຕາຕ່າງປະເທດໃຫ້ເຂົ້າສູ່ລະບົບ, ການສຳລະສະສາງກັບຕ່າງປະເທດ, ການຕິດຕາມລາຍຮັບຈາກການສົ່ງອອກສິນຄ້າໄປຕ່າງປະເທດ, ການຕິດຕາມກະແສເງິນຕາໄຫຼເຂົ້າຈາກນັກລົງທຶນຕ່າງປະເທດ ແລະ ວຽກງານຕິດຕາມການຊຳລະ-ຮັບຊຳລະ, ການຕິດປະກາດ ແລະ ໂຄສະນາ, ບໍລິການສິນຄ້າ ແລະ ເກັບຊື້ຜົນຜະລິດກະສິກຳນຳປະຊາຊົນເປັນສະກຸນເງິນກີບ. ລົງທະບຽນຜູ້ນຳເຂົ້າ-ສົ່ງອອກສິນຄ້າ ເພື່ອອອກໃບຢັ້ງຢືນເປີດບັນຊີເງິນຝາກສະເພາະ, ການນຳລາຍຮັບຈາກການສົ່ງອອກສິນຄ້າໄປຕ່າງປະເທດ ແລະ ນຳເຂົ້າ ສປປ ລາວ ຜ່ານລະບົບທະນະຄານໃຫ້ຄົບຖ້ວນ. ຈາກນັ້ນໄດ້ເຊັນບົດບັນທຶກຮ່ວມກັນລະຫວ່າງພາກລັດ ແລະ ພາກທຸລະກິດ ເພື່ອຈັດຕັ້ງປະຕິບັດໃຫ້ມີຄວາມຖືກຕ້ອງໃນຕໍ່ໜ້າຢ່າງມີປະສິດທິຜົນ.
ຂ່າວ-ພາບ: ກິດຕິສັກ ບົວໄລ
ຄໍາເຫັນ