ທະນາຄານການຄ້າຕ່າງປະເທດຫວຽດນາມ ມອບອຸປະກອນການສຶກສາ-ກິລາ 

ທະນາຄານການຄ້າຕ່າງປະເທດຫວຽດນາມ ປະຈຳ ສປປ ລາວ ຈຳກັດ (Vietcombank Laos) ໄດ້ປະສານສົມທົບກັບ ອຳນາດການປົກຄອງບ້ານໂພນເພັງ ເມືອງວັງວຽງ ແຂວງວຽງຈັນ ນຳເອົາເຄື່ອງຊ່ວຍເຫຼືອປະເພດອຸປະກອນການສຶກສາ, ປຶ້ມແບບຮຽນ, ເຄື່ອງກິລາ ແລະ ນົມ ມອບໃຫ້ກັບນ້ອງໆນັກຮຽນ ໂຮງຮຽນປະຖົມສົມບູນໂພນເພັງ ບ້ານໂພນເພັງ ເມືອງວັງວຽງ ແຂວງວຽງຈັນ ລວມມູນຄ່າ 40.000.000 ກີບ. ຕາງໜ້າກ່າວມອບໂດຍ ທ່ານ ຫງວຽນ ກວາງ ມິງ ສະມາຊິກສະພາບໍລິຫານ ຜູ້ອຳນວຍການໃຫຍ່ ທະນາຄານການຄ້າຕ່າງປະເທດຫວຽດນາມ ປະຈຳ ສປປ ລາວ ຈຳກັດ ແລະ ຕາງໜ້າກ່າວຮັບໂດຍ ທ່ານ ບຸນທັນ ພົມມະລີ ຜູ້ອຳນວຍການໂຮງຮຽນປະຖົມສົມບູນໂພນເພັງ, ມີທ່ານ ກຸດຕະລີ ແກ້ວເຂັມເພັດ ຫົວ
ໜ້າຫ້ອງການສຶກສາທິການ ແລະ ກິລາເມືອງວັງວຽງ, ທ່ານ ຄໍາພາ ສີອໍາພອນ ນາຍບ້ານໂພນເພັງ ພ້ອມດ້ວຍພະນັກງານທະນາຄານ, ຄູ-ອາຈານ ແລະ ນັກຮຽນ ເຂົ້າຮ່ວມ.
  ໃນພິທີ, ທ່ານ ວິເລ ໂຄດໂຍທາ ຮອງຜູ້ອຳນວຍການໃຫຍ່ ທະນາຄານການຄ້າຕ່າງປະເທດຫວຽດນາມ ປະຈຳ ສປປ ລາວ ຈຳກັດ ກ່າວວ່າ: ການມອບເຄື່ອງຊ່ວຍເຫຼືອໃຫ້ກັບນັກຮຽນໂຮງຮຽນປະຖົມສົມບູນໂພນເພັງໃນຄັ້ງນີ້ ກໍເພື່ອເປັນການສ້າງກິດຈະກຳສະເຫຼີມສະຫຼອງວັນສ້າງຕັ້ງ ທະນາຄານການຄ້າຕ່າງປະເທດຫວຽດນາມ ປະຈຳລາວ ຈຳກັດ ຄົບຮອບ 5 ປີ (19/ ຕຸລາ 2018-19 ຕຸລາ 2023) ອີກທັງເປັນໂອກາດອັນດີທີ່ໄດ້ມີການປະກອບສ່ວນຊ່ວຍເຫຼືອນັກຮຽນໃນເຂດທ້ອງຖິ່ນ ທີ່ຍັງບໍ່ທັນມີການຊ່ວຍເຫຼືອຈາກພາກສ່ວນໃດເຂົ້າໄປເຖິງ ເພື່ອຊຸກຍູ້ການສຶກສາໃຫ້ກັບບັນດານັກຮຽນໃນເຂດບ້ານດັ່ງກ່າວ ໄດ້ມີອຸປະກອນການຮຽນທີ່ຄົບຊຸດ ຊຶ່ງໂຮງຮຽນປະຖົມສົມບູນໂພນເພັງ ບ້ານໂພນເພັງ ເປັນໂຮງຮຽນລັດ ທີ່ສ້າງຕັ້ງຂຶ້ນຕັ້ງແຕ່ປີ 1975 ໂດຍປັດຈຸບັນແມ່ນມີນັກຮຽນລວມທັງໝົດ 134 ຄົນ ລວມ 5 ຫ້ອງ ລະຫວ່າງຫ້ອງ ປ.1 - ປ.5.
ໃນໂອກາດນີ້, ທ່ານ ບຸນທັນ ພົມມະລີ  ກໍໄດ້ມອບໃບກຽດຕິຄຸນ ແລະ ກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງ ມາຍັງຄະນະນຳ ຕະຫຼອດຮອດພະນັກງານ ທະນາຄານການຄ້າຕ່າງປະເທດຫວຽດນາມ ປະຈຳ ສປປ ລາວ ຈຳກັດ ທຸກທ່ານ ທີ່ໄດ້ນຳເອົາອຸປະກອນການຮຽນ-ການສອນມາມອບໃຫ້ກັບນັກຮຽນໂຮງຮຽນປະຖົມສົມບູນໂພນເພັງຂອງພວກເຮົາໃນຄັ້ງນີ້ ແລະ ຫວັງວ່າຈະໄດ້ຮັບການຊ່ວຍເຫຼືອຈາກບັນດາທ່ານຕື່ມອີກໃນໂອກາດໜ້າ. ພິທີມອບ-ຮັບ ເຄື່ອງດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ໂຮງຮຽນດັ່ງກ່າວ.
ຂ່າວ-ພາບ: ແສງມະນີ ພິລາວົງ