ໂອກາດດັ່ງກ່າວ, ທ່ານປະທານປະເທດ ສະແດງຄວາມຊົມເຊີຍ ແລະ ຕີລາຄາສູງ ຕໍ່ໜາກຜົນຂອງການຮ່ວມມືຢ່າງແໜ້ນແຟ້ນ ລະຫວ່າງ ອົງການໄອຍະການສູງສຸດ ຂອງສອງປະເທດ ນັບແຕ່ມີການລົງນາມໃນບົດບັນທຶກຄວາມເຂົ້າໃຈສະບັບທໍາອິດໃນປີ 2014 ເປັນຕົ້ນມາ, ສອງອົງການໄດ້ມີການພົບປະແລກປ່ຽນຄະນະຜູ້ແທນ ເພື່ອແລກປ່ຽນບົດຮຽນນໍາກັນຢ່າງເປັນປົກກະຕິ, ພ້ອມນີ້ ສອງອົງການໄອຍະການສູງສຸດ ຍັງໄດ້ລົງນາມ ແລະ ຈັດຕັ້ງບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືສອງຝ່າຍ ສະບັບລົງວັນທີ 1 ກໍລະກົດ 2024 ໃຫ້ປະກົດຜົນເປັນຈິງໄດ້ເປັນຢ່າງດີ ຊຶ່ງສະແດງອອກມື້ນີ້ບັນດາສະຫາຍ ຈະໄດ້ພ້ອມກັນຈັດກອງປະຊຸມອົງການໄອຍະການ ລາວ-ກໍາປູເຈຍ ຄັ້ງທີ I ໃນຫົວຂໍ້ “ການຮ່ວມມືໃນການຕ້ານອາຊະຍາກໍາຂ້າມຊາດ ໂດຍສະເພາະການຄ້າຂາຍຢາເສບຕິດຢ່າງມີປະສິດທິຜົນ” ຢູ່ນະຄອນຫຼວງວຽງຈັນ ສປປ ລາວ ແລະ ໃນຄັ້ງຕໍ່ໄປ ໃນປີ 2027 ຈະໄດ້ຈັດຂຶ້ນເປັນຄັ້ງທີ 2 ທີ່ ຣາຊະອານາຈັກກໍາປູເຈຍ, ຖືເປັນບາດກ້າວທີ່ສໍາຄັນຢ່າງຍິ່ງໃນການຈັດຕັ້ງຜັນຂະຫຍາຍແຜນປະຕິບັດງານ ວ່າດ້ວຍການເປັນຄູ່ຮ່ວມມືຍຸດທະສາດຮອບດ້ານ ແລະ ໜັ້ນຄົງຍາວນານ ໃນໄລຍະປີ 2023-2027 ໃຫ້ປະກົດຜົນເປັນຈິງໃນຂົງເຂດຍຸຕິທໍາ, ເພື່ອຮ່ວມກັນໃນການແກ້ໄຂບັນຫາອາຊະຍາກໍາຂ້າມຊາດ ໂດຍສະເພາະບັນຫາຢາເສບຕິດ ຊຶ່ງເປັນສິ່ງທ້າທາຍຕໍ່ຄວາມສະຫົງບສຸກ ແລະ ການພັດທະນາຂອງສອງປະເທດ ກໍຄືຂອງພາກພື້ນເປັນຢ່າງດີ.
ລັດຖະບານ ແລະ ປະຊາຊົນລາວ ຂໍຢືນຢັນການສະໜັບສະໜູນຢ່າງເຕັມທີ່ຕໍ່ການຮ່ວມມືໃນຂົງເຂດຍຸຕິທໍາຂອງສອງປະເທດ. ຫວັງຢ່າງຍິ່ງວ່າ ສອງອົງການໄອຍະການພວກເຮົາ ຈະສືບຕໍ່ເພີ່ມທະວີການຮ່ວມມືໃຫ້ພົ້ນເດັ່ນຍິ່ງຂຶ້ນ, ເປັນເສົາຄໍ້າທີ່ເຂັ້ມແຂງ ໃນການປົກຄອງລັດດ້ວຍກົດໝາຍ, ປົກປ້ອງຜົນປະໂຫຍດຂອງລັດ ແລະ ສິດຜົນປະໂຫຍດອັນຊອບທໍາຂອງປະຊາຊົນສອງປະເທດ. ຂໍໃຫ້ສອງອົງການ ສືບຕໍ່ຮ່ວມມືແລກປ່ຽນຂໍ້ມູນຂ່າວສານ, ບົດຮຽນ ແລະ ປະສານງານກັນຢ່າງໃກ້ຊິດ ເພື່ອເຮັດໃຫ້ການສະກັດກັ້ນ ແລະ ປາບປາມອາຊະຍາກໍາຂ້າມຊາດ, ການຄ້າຢາເສບຕິດ, ການຄ້າມະນຸດ ແລະ ບັນຫາອື່ນໆ ໂດຍຜ່ານການຮ່ວມມືຍຸຕິທໍາ ໂດຍສະເພາະໃນບັນດາແຂວງທີ່ມີຊາຍແດນຕິດຈອດກັນໃຫ້ມີປະສິດທິຜົນສູງຂຶ້ນ, ປະກອບສ່ວນເຂົ້າໃນການສ້າງສັງຄົມທີ່ປົກຄອງດ້ວຍກົດໝາຍທີ່ເຂັ້ມແຂງ ແລະ ຮັບປະກັນຄວາມສະຫງົບ, ຄວາມປອດໄພ ແລະ ຄວາມເປັນລະບຽບຮຽບຮ້ອຍ ໃຫ້ແກ່ປະຊາຊົນຂອງພວກເຮົາ, ເຮັດໃຫ້ຊາຍແດນຂອງສອງປະເທດພວກເຮົາເປັນຊາຍແດນແຫ່ງສັນຕິພາບ, ການຮ່ວມມື ແລະ ຕ່າງຝ່າຍຕ່າງໄດ້ຮັບຜົນປະໂຫຍດຢ່າງແທ້ຈິງ.
ທ່ານ ນາງ ເຈຍ ລຽງ ໄດ້ສະແດງຄວາມຂອບໃຈຢ່າງສູງຕໍ່ກັບການຕ້ອນຮັບອັນອົບອຸ່ນ ຂອງ ທ່ານປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນຄັ້ງນີ້, ພ້ອມທັງໄດ້ລາຍງານການມາຢ້ຽມຢາມ ແລະ ເຮັດວຽກຢູ່ ສປປ ລາວ ຄັ້ງນີ້ ໃຫ້ທ່ານປະທານປະເທດຮັບຊາບ ເປັນຕົ້ນ ແມ່ນການຂະຫຍາຍການຮ່ວມມື ແລະ ການເຄື່ອນໄຫວວຽກງານ ອົງການໄອຍະການຂອງສອງປະເທດ ກໍາປູເຈຍ-ລາວ ໃນໄລຍະຜ່ານມາແມ່ນໄດ້ຮັບການຮ່ວມມືດີຂຶ້ນຢ່າງບໍ່ຢຸດຢັ້ງ, ສໍາຄັນແມ່ນການຜັດປ່ຽນຄະນະຜູ້ແທນຂັ້ນສູງໄປຢ້ຽມຢາມ ແລະ ແລກປ່ຽນບົດຮຽນຮ່ວມກັນ. ແນໃສ່ການພັດທະນາຂົງເຂດວຽກງານໄອຍະການຂອງສອງປະເທດໃຫ້ເຂົ້າສູ່ລວງເລິກ.
ໃນຕອນທ້າຍ, ທ່ານປະທານປະເທດ ຍັງໄດ້ອວຍພອນ ໃຫ້ທ່ານຫົວໜ້າອົງການໄອຍະການສູງສຸດປະຈໍາສານສູງສຸດ ແຫ່ງ ຣາຊະອານາຈັກ ກໍາປູເຈຍ ພ້ອມດ້ວຍຄະນະ ຈົ່ງປະສົບຜົນສໍາເລັດໜ້າທີ່ອັນສໍາຄັນ ແລະ ທ່ຽວຊົມບູລິຍະສະຖານ ທາງທໍາມະຊາດ ແລະ ປະຫວັດສາດ ຢູ່ ສປປ ລາວ ຢ່າງເພິ່ງພໍໃຈ ແລະ ເດີນທາງກັບຄືປະເທດດ້ວຍຄວາມສະຫວັດດີພາບ. ໃນຕອນແລງວັນດຽວກັນ ຫົວໜ້າອົງການໄອຍະການສູງສູດປະຈໍາສານສູງສຸດແຫ່ງ ຣາຊະອານາຈັກ ກໍາປູເຈຍ ພ້ອມຄະນະກໍໄດ້ເຂົ້າຢ້ຽມຂໍ່ານັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ທີ່ຫໍປະຊຸມແຫ່ງຊາດ
(ຂ່າວ: ແສງຈັນ)
ຄໍາເຫັນ