 |
ສະຫາຍ ຄຳແພງ ໄຊສົມແພງ ໄດ້ລາຍງານຫຍໍ້ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກຢູ່ແຂວງຫົວພັນ ແລະ ການນໍາພາ-ຊີ້ນຳວຽກງານ ຂອງຄະນະບໍລິຫານງານພັກແຂວງ ສະໄໝທີ X ຕະຫຼອດໄລຍະ 5 ປີຜ່ານມາເຫັນວ່າ: ຄະນະບໍລິຫານງານພັກແຂວງໄດ້ພ້ອມກັນເອົາໃຈໃສ່ນໍາພາ-ຊີ້ນໍາວຽກງານການເມືອງ-ແນວຄິດຂອງສະມາຊິກພັກ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ໂດຍໄດ້ຈັດຕັ້ງເຊື່ອມຊຶມ, ຜັນຂະຫຍາຍມະຕິກອງປະຊຸມຂັ້ນຕົນເປັນແຜນການ, ໂຄງການດໍາເນີນງານ ຂອງຄະນະບໍລິຫານງານພັກ; ໄດ້ຫັນເອົາແນວທາງ, ມະຕິ, ຄໍາສັ່ງຂອງພັກເພື່ອໃຫ້ເຂົາເຈົ້າ ໄດ້ຮັບຮູ້-ເຂົ້າໃຈຕໍ່ແນວທາງນະໂຍບາຍຂອງພັກ ແລະ ສາມາດຫັນເອົາມະຕິຕ່າງໆ ໄປຈັດຕັ້ງປະຕິບັດ ຢູ່ໃນຂົງເຂດວຽກງານຂອງຕົນຮັບຜິດຊອບ; ໄດ້ສຸມໃສ່ກໍ່ສ້າງ-ບໍາລຸງຍົກລະດັບພະນັກງານດ້ານວິຊາສະເພາະ, ທິດສະດີການເມືອງ-ການປົກຄອງໂດຍຕິດພັນກັບຂະບວນການວຽກງານຕົວຈິງ; ໄດ້ຈັດວາງ, ຊັບຊ້ອນ, ປັບປຸງການຈັດຕັ້ງຢູ່ບັນດາພະແນກການຂອງແຂວງ, ເມືອງຕາມຄວາມຮູ້ຄວາມສາ ມາດ-ວິຊາສະເພາະ, ໄດ້ຍ້ອງຍໍກົມກອງ-ບຸກຄົນທີ່ມີຜົນງານດີເດັ່ນໃນການປະກອບສ່ວນປົກປັກຮັກສາ ແລະ ສ້າງສາພັດທະນາປະເທດຊາດຕາມຜົນງານຕົວຈິງ.
ໃນໂອກາດນີ້, ສະຫາຍ ສະເຫຼີມໄຊ ກົມມະສິດ ກໍໄດ້ມີຄຳເຫັນໂອ້ລົມ ແລະ ໃຫ້ທິດ ຊີ້ນຳຕໍ່ກອງປະຊຸມ ເພື່ອເປັນບ່ອນອີງໃນການຄົ້ນຄວ້າພິຈາລະນາ, ນຳໃຊ້ສິດປະຊາທິປະໄຕ ບົນພື້ນຖານຫຼັກການທີ່ກຳນົດໄວ້ ເປັນຕົ້ນ: ໃຫ້ເອົາໃຈໃສ່ກຳແໜ້ນໂຄງປະກອບບຸກຄະລາກອນ ຕ້ອງປະກອບດ້ວຍເພດ-ເຜົ່າ, ທັງຮັບປະກັນໃຫ້ມີຮຸ່ນອາວຸໂສ, ຮຸ່ນກາງ, ຮຸ່ນໜຸ່ມ ແລະ ຢູ່ຕາມບັນດາຂົງເຂດຕ່າງໆ ຢ່າງສົມເຫດສົມຜົນເພື່ອຮັບປະກັນລັກສະນະສືບທອດຕໍ່ເນື່ອງ, ພ້ອມນັ້ນ, ສະຫາຍ ຍັງໄດ້ຮຽກຮ້ອງໃຫ້ຜູ້ແທນກອງປະຊຸມ ຕ້ອງມີສະຕິໃນການເລືອກຄະນະພັກຊຸດໃໝ່, ເລືອກເຟັ້ນເອົາ ບັນດາສະຫາຍທີ່ມີມາດຖານຄົບຖ້ວນ, ສືບຕໍ່ຮັກສາຄວາມສາມັກຄີພາຍໃນ ບໍ່ຄອນແຄນຕໍ່ການໂຄສະນາໃສ່ຮ້າຍປ້າຍສີ ກໍຄື ບັນດາກົນອຸບາຍຂອງບຸກຄົນທີ່ບໍ່ຫວັງດີ ໂດຍສະເພາະ ໄລຍະກະກຽມກອງປະຊຸມໃຫຍ່, ນໍາໃຊ້ຂໍ້ມູນຂ່າວສື່ສັງຄົມອອນລາຍຢ່າງມີສະຕິ, ຈໍາແນກໄດ້ຂ່າວແທ້-ຂ່າວປອມ; ຄະນະພັກແຕ່ລະຂັ້ນ ຕ້ອງສຸມໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອເຮັດໃຫ້ການດໍາເນີນກອງປະຊຸມໃຫຍ່ມີຄວາມສະຫງົບ, ກະກຽມຄວາມພ້ອມໃນທຸກດ້ານ ໃນການສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ; ຄະນະຮັບຜິດຊອບຄວບຄຸມການປ່ອນບັດຂັ້ນແຂວງ ຕ້ອງເອົາໃຈໃສ່ໃນການສະຫຼຸບ ແລະ ສັງລວມຄະແນນ ຜົນການທາບທາມຄັ້ງນີ້ ໃຫ້ມີຄວາມໂປ່ງໃສ, ຍຸຕິທຳ, ເປັນເອກະພາບສູງ.
 |
ໃນຕອນທ້າຍ, ຜູ້ເແທນກອງປະຊຸມ ກໍໄດ້ພ້ອມກັນປ່ອນບັດທາບທາມບຸກຄະລາກອນ ທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກແຂວງຫົວພັນ ສະໄໝທີXI (ຮອບທີ 3)ສໍາເລັດຕາມວາລະທີ່ກໍານົດໄວ້.
(ຂ່າວ-ພາບ: ກົມປະຊາສຳພັນ ຫສນຍ)
ຄໍາເຫັນ