 |
ກອງປະຊຸມພົບປະກັັນຄັ້ງນີ້, ທ່ານຜູ້ອຳນວຍການ ທນບ ໄດ້ລາຍງານສະພາບການໂດຍຫຍໍ້ ກ່ຽວກັບ ທນບ ເປັນທະນາຄານສະເພາະກິດ, ປະກອບສ່ວນແກ້ໄຂຄວາມທຸກຍາກ ໃຫ້ປະຊາຊົນບັນດາເຜົ່າ ດ້ວຍການຄຸ້ມຄອງ ແລະ ນຳແຫຼ່ງທຶນນະໂຍບາຍລັດຖະບານ ເພື່ອປ່ອຍສິນເຊື່ອໃຫ້ປະຊາຊົນຜູ້ທຸກຍາກ ດ້ວຍອັດຕາດອກເບ້ຍ ຕາມນະໂຍບາຍ ຂອງລັດຖະບານ ກຳນົດອອກ ໃນແຕ່ລະໄລຍະ, ເພື່ອສຸມໃສ່ຊີ້ນຳຮອບດ້ານໃນການເຄື່ອນໄຫວວຽກງານ ການສະໜອງສິນເຊື່ອໃຫ້ປະຊາຊົນໄດ້ນໍາໃຊ້ເຂົ້າໃນເປົ້າໝາຍ ມີການຂະຫຍາຍຕົວ; ພ້ອມກັນນັ້ນ, ກໍຍົກໃຫ້ເຫັນກົນໄກຄຸ້ມຄອງ ຂອງພາກລັດ, ກົນໄກບໍລິຫານການເຄື່ອນໄຫວ ແລະ ການດຳເນີນງານ ຂອງ ທນບ ໃນໄລຍະຜ່ານມາ.
ທນບ ໄດ້ສະໜອງສິນເຊື່ອ ເຂົ້າໃນ 3 ເປົ້າໝາຍຕົ້ນຕໍ ຄື: ເມືອງເປົ້າໝາຍ ລຶບລ້າງຄວາມທຸກຍາກ, ຈຸດສຸມ (ລັດຖະບານ ແລະ ທ້ອງຖິ່ນ) ແລະ ບ້ານ 3 ສ້າງ, ໃນໄລຍະຜ່ານມາ ໄດ້ປະກອບສ່ວນດ້ານທຶນຮອນເຂົ້າໃນການຜະລິດຂອງປະຊາຊົນ ເພື່ອແກ້ໄຂຊີວິດການເປັນຢູ່ ຂອງປະຊາຊົນໃນຊົນນະບົດ ກໍ່ຄືທ້ອງຖິ່ນຕ່າງໆໃນຂອບເຂດທົ່ວປະເທດ ມີທັງໝົດ 148 ເມືອງ. ໃນນັ້ນ, ມີເມືອງພົ້ນທຸກ 63 ເມືອງ, ເມືອງທຸກຍາກທັງໝົດ 85 ເມືອງ, ສິນເຊື່ອຂອງ ທນບ ເຂົ້າເຖິງທັງໝົດ 143 ເມືອງ ເປັນເມືອງທຸກຍາກ 74 ເມືອງ, ບ້ານທົ່ວປະເທດທັງໝົດ 8,424 ບ້ານ, ສິນເຊື່ອ ທນບ ເຂົ້າເຖິງທັງໝົດ 5,231 ບ້ານ, ບ້ານທຸກ 1,711 ບ້ານ ແລະ ຄອບຄົວທົ່ວປະເທດມີທັງໝົດ 1,238,168 ຄອບຄົວ, ຄອບຄົວທຸກຍາກທັງໝົດ 266,268 ຄອບຄົວ, ສິນເຊື່ອຂອງ ທນບ ເຂົ້າເຖິງທັງໝົດ 286,135 ຄອບຄົວ (ເປັນຄອບຄົວທຸກຍາກ 43,596 ຄອບຄົວ).
ສໍາລັບທິດທາງ-ແຜນການໃນຕໍ່ໜ້າ ແມ່ນການຫັນເປັນທະນາຄານພັດທະນາຊົນນະບົດ (ທພບ) ຄາດຄະເນຈະໄດ້ເປີດເປັນທາງການພາຍໃນບໍ່ດົນນີ້, ພາຍຫຼັງໄດ້ຮັບການສ້າງຕັ້ງເປັນ ທພບ ໄດ້ມີການກຳນົດວິໄສທັດຮອດປີ 2035 ແລະ ແຜນຍຸດທະສາດຮອດປີ 2030 ຄື: ຈະສ້າງ ທພບ ໃຫ້ເປັນທະນາຄານແຖວໜ້າ ທີ່ໃຫ້ການບໍລິການທາງດ້ານການເງິນ ແລະ ສະໜັບສະໜູນການພັດທະນາຊົນນະບົດແບບທົ່ວເຖິງ ຊຶ່ງເປັນຮາກຖານ ໃນລະບົບເສດຖະກິດ ຂອງປະເທດ ໃຫ້ມີຄວາມຍືນຍົງ ດັ່ງຄຳຂວັນທີ່ວ່າ: “ພ້ອມກັນພັດທະນາ ເພື່ອຄວາມໝັ້ນຄົງ ແລະ ຍືນຍົງ”.
ທ່ານຜູ້ອຳນວຍການ ທນສ ຫວຽດນາມ ໄດ້ແຈ້ງໃຫ້ຮູ້ເຖິງພາລະບົດບາດ, ໜ້າທີ່, ການເຄື່ອນໄຫວ ແລະ ກົນໄກຕ່າງໆ ໃນ 23 ປີ ຜ່ານມານີ້, ທຶນສິນເຊື່ອນະໂຍບາຍ ໄດ້ຊ່ວຍເຫຼືອຫຼາຍກວ່າ 7 ລ້ານຄົວເຮືອນ ໃຫ້ຫຼຸດພົ້ນຈາກຄວາມທຸກຍາກ, ສ້າງວຽກເຮັດງານທຳໃຫ້ຜູ້ອອກແຮງງານເກືອບ 7.6 ລ້ານຄົນ ຈາກກອງທຶນແຮງງານແຫ່ງຊາດ, ຊ່ວຍເຫຼືອຜູ້ອອກແຮງງານເກືອບ 167,000 ຄົນ ໄປອອກແຮງງານ ທີ່ມີກຳນົດຢູ່ຕ່າງປະເທດ, ສ້າງວຽກເຮັດງານທຳໃຫ້ຜູ້ທີ່ພົ້ນໂທດຫຼາຍກວ່າ 13,000 ຄົນ, ສະໜັບສະໜູນນັກຮຽນ-ນັກສຶກສາຫຼາຍກວ່າ 4 ລ້ານຄົນໃຫ້ກູ້ຢືມເງິນ ເພື່ອການສຶກສາ, ຊື້ຄອມພິວເຕີ ແລະ ອຸປະກອນການຮຽນທາງອອນໄລນ໌ຫຼາຍກວ່າ 90 ພັນເຄື່ອງ, ຊ່ວຍເຫຼືອນັກຮຽນ, ນັກສຶກສາປະລິນຍາໂທ ແລະ ນັກຄົ້ນຄວ້າວິທະຍາສາດ, ເຕັກໂນໂລຊີ, ວິສະວະກຳ ແລະ ຄະນິດສາດເກືອບ 800 ຄົນ, ໃຫ້ກູ້ຢືມເງິນກໍ່ສ້າງໂຄງການນ້ຳສະອາດ ແລະ ສຸຂະອະນາໄມສິ່ງ ແວດລ້ອມຊົນນະບົດເກືອບ 21.4 ລ້ານໂຄງການ, ກໍ່ສ້າງເຮືອນຢູ່ເກືອບ 734 ພັນຫຼັງ ໃຫ້ຄົນທຸກຍາກ ແລະ ເປົ້າໝາຍນະໂຍ ບາຍອື່ນໆ, ສະໜັບສະໜູນທຶນ ເພື່ອຊື້/ເຊົ່າເຮືອນ ເກືອບ 60 ພັນຫຼັງ, ຊ່ວຍເຫຼືອວິສາຫະກິດຫຼາຍກວ່າ 1,500 ແຫ່ງ, ກູ້ຢືມເງິນ ເພື່ອຈ່າຍເງິນເດືອນໃຫ້ຜູ້ອອກແຮງງານ 1.2 ລ້ານຄົນ...;
 |
ຈາກການສະໜັບສະໜູນຊ່ວຍເຫຼືອຕ່າງໆ ຮ່ວມກັບທຸກຂັ້ນ, ທຸກຂະແໜງການ ແລະ ທ້ອງຖິ່ນ, ໄດ້ຈັດຕັ້ງປະຕິບັດໂຄງການເປົ້າໝາຍແຫ່ງຊາດ ກ່ຽວກັບການຫຼຸດຜ່ອນຄວາມທຸກຍາກແບບໝັ້ນຄົງໄດ້ຢ່າງສຳເລັດຜົນ, ຮັບປະກັນຄວາມໝັ້ນຄົງທາງສັງຄົມ ແລະ ການກໍ່ສ້າງຊົນນະບົດໃໝ່. ຈາກນັ້ນ, 2 ທ່ານຜູ້ອໍານວຍການ ທນບ ຂອງລາວ ແລະ ທນສ ຂອງຫວຽດນາມ ກໍ່ໄດ້ລົງນາມໃນ MOU ໂດຍການເຂົ້າເປັນສັກຂີພະຍານ ຂອງຄະນະນໍາຂອງ 2 ທະນາຄານ, ຊຶ່ງທັງ 2 ຝ່າຍ ໄດ້ເຫັນດີ ເປັນເອກະພາບໃນການຮ່ວມມື ແລະ ແລກປ່ຽນປະສົບການ ໃນບັນດາຂົງເຂດວຽກງານສິນເຊື່ອ; ວຽກງານລະດົມທຶນ ແລະ ບໍລິຫານທຶນ; ຜະລິດຕະພັນບໍລິການຂອງ ທນສ ຫວຽດນາມ; ວຽກງານເຕັກໂນໂລຊີຂໍ້ມູນຂ່າວສານ ແລະ ບັນດາຫົວຂໍ້ອື່ນໆ ຕາມຄວາມຕ້ອງການຕົວຈິງ ທີ່ເກີດຂຶ້ນໃນຂະ ບວນການປະຕິບັດໜ້າທີ່ຂອງທັງ 2 ຝ່າຍ.
ຮູບແບບການຮ່ວມມື: ແຕ່ໄລຍະປີ 2026-2027, ທນສ ຫວຽດນາມ ຈະຊ່ວຍເຫຼືອ ທນບ ໃນວຽກງານຝຶກອົບ ຮົມໃຫ້ແກ່ຄະນະນຳ ແລະ ພະນັກງານຂອງ ທນບ, ຈັດຕັ້ງບັນດາຄະນະຜູ້ແທນມາຢ້ຽມຢາມ ຊຶ່ງກັນ ແລະ ກັນ, ຮຽນຮູ້ປະສົບການໃຫ້ພະນັກງານການນຳຂອງ ທນບ ລາວ. ທັງ 2 ຝ່າຍຈະຈັດກອງປະຊຸມຕີລາຄາກາງສະໄໝ, ຕີລາຄາທ້າຍສະໄໝ ກ່ຽວກັບວຽກງານປະຕິບັດໂຄງການຮ່ວມມືຢ່າງລະອຽດໃນໄລຍະປີ 2026 ຫາ 2027 ລະຫວ່າງ ທນບ ລາວ ແລະ ທນສ ຫວຽດນາມ ຢູ່ ສປປ ລາວ.
(ຂ່າວ: ລັດສະໝີ ດວງຊັດຈະ)
ຄໍາເຫັນ