ທ່ານ ແສງປະເສີດ ວິຈິດລາສີ ເລຂາໜ່ວຍພັກຮາກຖານ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງສີສັດຕະນາກ. ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງສີສັດຕະນາກ ຄັ້ງທີ VIII ຫົວຂໍ້: ການແກ້ໄຂປະກົດການຫຍໍ້ທໍ້ໃນຂົງເຂດບໍລິການທ່ອງທ່ຽວ (ຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ເມື່ອບໍ່ດົນມານີ້ວ່າ: ໃນໄລຍະ 5 ປີຜ່ານມາ ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງສີສັດຕະນາກ ກໍໄດ້ເອົາໃຈໃສ່ເຄື່ອນໄຫວ, ຄຸ້ມຄອງ, ກວດກາ ວຽກງານໃນຂົງເຂດທີ່ຕົນເອງຮັບຜິດຊອບ ໂດຍສະເພາະແມ່ນວຽກງານປະກົດການຫຍໍ້ທໍ້ຂົງເຂດບໍລິການທ່ອງທ່ຽວ ເຊັ່ນ: ບັນດາຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ເພື່ອໃຫ້ເຂົາເຈົ້າເຄື່ອນໄຫວຢ່າງຖືກຕ້ອງ ຕາມລະບຽບການ, ຜູ້ປະກອບການຫຼາຍບ່ອນກໍໄດ້ເອົາໃຈໃສ່ປະຕິບັດຕາມລະບຽບການທີ່ວາງອອກເຊັ່ນ: ການເປີດ-ປິດຮ້ານຕາມໂມງເວລາ, ການບໍ່ລະເມີດສຽງເນືອງນັນ ແລະ ອື່ນໆ, ແຕ່ກໍປາສະຈາກບໍ່ໄດ້ບາງຜູ້ປະກອບການກໍຍັງມີການລະເມີດລະບຽບການຢູ່.
5 ປີຜ່ານມາ: ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງສີສັດຕະນາກ ໄດ້ສົມທົບກັບ ຄະນະສະເພາະກິດຂັ້ນນະຄອນຫຼວງ, ຄະນະສະເພາະກິດຂັ້ນເມືອງ ເຊັ່ນ: ປກສ ເມືອງ, ປກສ ກຸ່ມ, ອົງການປົກຄອງບ້ານ ລົງຕິດຕາມກວດກາຢ່າງເປັນປົກກະຕິ ທັງນີ້ກໍເພື່ອຮັບປະກັນໃຫ້ຜູ້ປະກອບການທຸລະກິດ ຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ເຂົ້າສູ່ລະບຽບການ, ທົ່ວເມືອງສີສັດຕະນາກ ມີທຸລະກິດ ຮ້ານອາຫານ, ຮ້ານກິນດື່ມ ທັງໝົດ 114 ຮ້ານ, ໂຮງແຮມ 23 ແຫ່ງ, ເຮືອນພັກ 19 ແຫ່ງ, ຫ້ອງຄາຣາໂອເກະ 7 ແຫ່ງ ແລະ ຮ້ານບັນເທີງ ຈຳນວນ 4 ແຫ່ງ.
ຜ່ານມາໄດ້ລົງຕິດຕາມ, ກວດກາໄດ້ທັງໝົດຈຳນວນ 30 ຄັ້ງ ແລະ ໄດ້ແກ້ໄຂວຽກງານອັນຮີບດ່ວນທີ່ໄດ້ສະເໜີມາຜ່ານຈາກສາຍດ່ວນຂອງປະຊາຊົນ ຈຳນວນ 25 ຄັ້ງ ໂດຍລວມແມ່ນໄດ້ແກ້ໄຂບັນຫາສຽງເນືອງນັນ ທີ່ລົບກວນເຮືອນຂ້າງຄຽງ ແລະ ຫົວໜ່ວຍທຸລະກິດ ເປີດໃຫ້ບໍລິການກາຍໂມງເວລາ, ບັນຫາທີ່ໄດ້ພົບເຫັນໃນເວລາລົງຕິດຕາມ, ກວດກາ ໂດຍສ່ວນຫຼາຍກໍແມ່ນ ການປິດກາຍໂມງເວລາທີ່ໄດ້ກຳນົດໄວ້, ການສົ່ງສຽງເນືອງນັນ ລົບກວນຜູ້ອື່ນ ຊຶ່ງທັງໝົດເຫຼົ່ານີ້ ແມ່ນໄດ້ເຊີນມາເຮັດບົດບັນທຶກ, ສຶກສາອົບຮົມ, ກ່າວເຕືອນທັງໝົດຈຳນວນ 40 ຫົວໜ່ວຍ, ໃນນີ້ມີ ບັນດາຮ້ານທີ່ປິດກາຍໂມງເວລາມີ 13 ຫົວໜ່ວຍ, ຫົວໜ່ວຍທີ່ສົ່ງສຽງເນືອງນັນ 16 ຫົວໜ່ວຍ, ປັບໃໝ 6 ຫົວໜ່ວຍ, ສັ່ງປິດຊົ່ວຄາວ 4 ຫົວໜ່ວຍ, ຮື້ຖອນໄຟແສງສີໜ້າຮ້ານ 11 ຮ້ານ ແລະ ໄດ້ແນະນຳໃຫ້ຜູ້ປະກອບການປັບປຸງຮ້ານດ້ວຍການໃຫ້ໃສ່ແກ້ວແວ່ນ, ໃສ່ແຜ່ນກັນສຽງ ໄດ້ຈຳນວນ 8 ຮ້ານ, ຜ່ານການຈັດຕັ້ງປະຕິບັດ ການຕິດຕາມ, ກວດກາ ຮ່ວມກັບ ຄະນະສະເພາະກິດຂັ້ນເມືອງ ກໍເຫັນໄດ້ວ່າຫົວໜ່ວຍທຸລະກິດດັ່ງກ່າວ ກໍໄດ້ມີການປັບປຸງ, ປ່ຽນແປງ ສ່ວຍຫຼາຍແມ່ນປະຕິບັດໄດ້ດີ, ແຕ່ກໍຍັງມີ ຈຳນວນໜຶ່ງທີ່ຍັງຖືເບົາ, ຍັງໄດ້ມີການລະເມີດຕໍ່ລະບຽບການທີ່ວາງອອກ.
ສຳລັບທິດທາງ ແລະ ແຜນການໃນຕໍ່ໜ້າຈະສືບຕໍ່ ຄຸ້ມຄອງ, ຕິດຕາມ, ກວດກາ ແລະ ເອື້ອອຳນວຍຄວາມສະດວກໃຫ້ແກ່ຜູ້ປະກອບການຫົວໜ່ວຍທຸລະກິດດັ່ງກ່າວ ເພື່ອໃຫ້ເຂົາເຈົ້າເຄື່ອນໄຫວຖືກຕ້ອງຕາມລະບຽບການ, ສືບຕໍ່ສົມທົບກັບ ຄະນະສະເພາະກິດນະຄອນຫຼວງວຽງຈັນ ແລະ ຄະນະສະເພາະກິດຂັ້ນເມືອງ, ລົງຕິດຕາມ, ກວດກາ ແລະ ສຶກສາອົບຮົມ ບັນດາຮ້ານອາຫານ, ຮ້ານກິນດື່ມ ແລະ ຮ້ານບັນເທີງ ທີ່ຢູ່ໃນເປົ້າໝາຍ ປິດກາຍໂມງເວລາ, ສ້າງສຽງດັງເນືອງນັນ ລົບກວນປະຊາຊົນ, ຊຸມຊົນເຮືອນໃກ້ຄຽງ ເພື່ອໃຫ້ປະກົດການຫຍໍ້ທໍ້ໃນຂົງເຂດດັ່ງກ່າວໃຫ້ຫຼຸດລົງ, ຈຳກັດບັນດາຫົວໜ່ວຍທຸລະກິດ ຮ້ານກິນດື່ມ ແລະ ຮ້ານບັນເທີງ ທີ່ສະເໜີຂໍສ້າງຕັ້ງໃໝ່, ສືບຕໍ່ສະຫຼຸບ ລາຍງານຜົນງານການຈັດຕັ້ງປະຕິບັດໜ້າທີ່ວຽກງານຕົວຈິງ ໃຫ້ການນຳເມືອງ ແລະ ການນຳພະແນກ ຖວທ.ນວ, ເພື່ອຮັບຊາບ ແລະ ເພື່ອຂໍທິດຊີ້ນໍາການຈັດຕັ້ງປະຕິບັດຕາມແຕ່ລະໄລຍະ.
ຄໍາເຫັນ