ທພລ ມອບ-ຮັບປ້າຍລະດົມການຊໍາລະພັນທະອາກອນຜ່ານລະບົບທະນາຄານ

ພິທີມອບ-ຮັບປ້າຍລະດົມການຊໍາລະພັນທະອາກອນເຂົ້າງົບປະມານຂອງລັດຜ່ານລະບົບທະນາຄານລະຫວ່າງທະນາຄານພັດທະນາລາວ (ທພລ) ສາຂາແຂວງເຊກອງ ແລະ ຫ້ອງການໆເງິນເມືອງລະມາມໄດ້ຈັດຂຶ້ນໃນວັນທີ 27 ຕຸລານີ້ຊຶ່ງມີທ່ານ ພອນປະເສີດ ຈະເລີນພອນ ຫົວໜ້າທະນາຄານພັດທະນາລາວ ສາຂາແຂວງເຊກອງໄດ້ນໍາເອົາປ້າຍຈໍານວນ 4 ປ້າຍມູນຄ່າ 12 ລ້ານກີບ ມອບໃຫ້ຫ້ອງການໆເງິນເມືອງລະມາມ ກ່າວຮັບໂດຍ ທ່ານ ຄໍາປານ ພິມມະເສນ ວ່າການຫົວໜ້າຫ້ອງການໆເງິນເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ພອນປະເສີດ ຈະເລີນພອນ ກ່າວວ່າ: ການມອບ-ຮັບຄັ້ງນີ້ ເພືື່ອເປັນການຜັນຂະຫຍາຍເນື້ອໃນກອງປະຊຸມເປີດຂະບວນການເສຍພັນທະອາກອນ, ຄ່າທໍານຽມທາງ, ພາສີີ ແລະອື່ນໆຜ່ານລະບົບທັນສະໄໝ, ໂດຍສະເພາະຜ່ານລະບົບການບໍລິການຂອງ ທພລ ຊຶ່ງປ້າຍດັ່ງກ່າວມີເນື້ອໃນໂຄສະນາກ່ຽວກັບຜະລິດຕະພັນຂອງ ທພລ, ການໃຫ້ບໍລິການຊຳລະພັນທະອາກອນ ແລະ ການບໍລິການອື່ນໆຜ່ານລະບົບທະນາຄານ ທັງນີ້ເພື່ອລະດົມບັນດາຫົວໜ່ວຍທຸລະກິດຕ່າງໆຊໍາລະພັນທະອາກອນຕ່າງໆເຂົ້າງົບປະມານຜ່ານລະບົບທັນສະໄໝຂອງທພລ ສາຂາແຂວງເຊກອງ ເປັນການສະໜັບສະໜູນການເກັບລາຍຮັບຕ່າງໆເຂົ້າງົບປະມານຂອງແຂວງໃຫ້ມີຄວາມເຂັ້ມແຂງ, ໂປ່ງໃສ, ທັນສະໄໝ ແລະຍຸຕິທໍາເຮັດໃຫ້ການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2023ໄດ້ຮັບຜົນສໍາເລັດຕາມລະດັບຄາດໝາຍ.
    ໂອກາດນີ້, ທ່ານ ຄໍາປານ ພິມມະເສນ ໄດ້ກ່າວສະແດງຄວາມຂອບໃຈ ແລະຊົມເຊີຍຕໍ່ ທພລ ສາຂາແຂວງເຊກອງທີ່ສ້າງເງື່ອນໄຂອໍານວຍຄວາມສະດວກໃນການຄຸ້ມຄອງ ແລະການຊໍາລະພັນທະອາກອນຜ່ານລະບົບທັນສະໄໝ ເພືື່ອຫຼຸດຜ່ອນຂອດ-ຂັ້ນຕອນຕ່າງໆໃນການເຄື່ອນໄຫວຈັດເກັບລາຍຮັບທັງເປັນການປະຢັດເວລາ ແລະຄ່າໃຊ້ຈ່າຍຕ່າງໆຂອງຜູ້ປະກອບການທັງນີ້ເພື່ອຮັບປະກັນການຮົ່ວໄຫຼຂອງລາຍຮັບເຂົ້າງົບປະມານແຫ່ງລັດຕື່ມອີກ.
ຂ່າວ-ພາບ:ພຸດທະສອນ