ຕິດຕາມແຜນພັດທະນາເສດຖະກິດ-ສັງຄົມ ແຜນງົບປະມານເເຫ່ງລັດຂອງເເຂວງ ກ່ຽວກັບໂຄງການລົງທຶນຂອງລັດ

ໃນກອງປະຊຸມ, ທ່ານ ກົງເພັດ ແກ້ວບົວພາ ກໍາມະການພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ ໄດ້ລາຍງານກ່ຽວກັບຈຸດປະສົງ, ພ້ອມທັງມີຄໍາເຫັນກ່າວເປີດກອງປະຊຸມຍ່າງເປັນທາງການ ໃນນີ້ ທ່ານ ນາງ ຄໍາພູ ນ້ອຍມະນີສັກ ກໍາມະການປະຈໍາພັກເມືອງ ຮອງປະທານຄະນະກໍາມະການປົກຄອງເມືອງ ຜູ້ຊີ້ນໍາຂົງເຂດວັດທະນະທໍາ-ສັງຄົມ ໄດ້ຂຶ້ນລາຍງານ ກ່ຽວກັບສະພາບລວມຂອງເມືອງ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ໂຄງການລົງທຶນຂອງລັດ ຢູ່ພາຍໃນເມືອງນາແລ ຊຶ່ງເປັນເມືອງນາແລ ມີເນື້ອທີ່ທັງ ໝົດ 1,719.34 ກິໂລຕາເເມັດ, ສະເລ່ຍຄວາມໜາແໜ້ນຂອງປະຊາກອນແມ່ນ 15 ຄົນ/ກິໂລຕາເເມັດ ເຂດພູດອຍກວມເອົາ 98%, ປະກອບມີ 57 ບ້ານແບ່ງອອກເປັນ 4 ຕາແສງ; ມີ 4,837 ຄົວເຮືອນ, ມີປະຊາກອນ 25,865 ຄົນ; ຍິງ 12,914 ຄົນ, ໃນປີຜ່ານນມາເສດຖະກິດໄດ້ຮັບການຂະຫຍາຍຕົວຕໍ່ເນື່ອງ ໃນລະດັບ 1.22% ຕໍ່ປີ, ສະເລ່ຍລາຍຮັບຕໍ່ຫົວຄົນໄດ້ 31 ລ້ານກ່ວາກີບ ທຽບໃສ່ປີ 2024 ເພີ່ມຂຶ້ນ 5 ລ້ານກີບ, ຄຸ້ມຄອງລາຍຮັບ-ປະຕິບັດລາຍຈ່າຍຕາມລະບຽບການ ແລະ ກົດໝາຍ; ໃນ 9 ເດືອນຜ່ານມາ ສາມາດຂຸດຄົ້ນລາຍຮັບເຂົ້າງົບປະມານທັງໝົດ 3,427,567,862 ກີບ ເທົ່າກັບ 63.09% ຂອງແຜນການປີ, ປະຕິບັດລາຍຈ່າຍ 49,324,338,387 ກີບ ເທົ່າກັບ 87.86%; ທົ່ວເມືອງມີເນື້ອທີ່ສວນຢາງພາລາ 4,612 ເຮັກຕາ, ໃນນີ້: ປາດຢາງແລ້ວ 3,450 ກວ່າເຮັກຕາ, 5 ເດືອນຜ່ານມາ ໄດ້ຜົນຜະລິດນໍ້າຢາງທັງໝົດ 1,289 ໂຕນ; ເຄື່ອງປ່າຂອງດົງ 115 ໂຕນ ມີຕະຫຼາດ 1 ແຫ່ງ, ທົ່ວເມືອງມີໂຮງງານອຸດສາຫະກໍາປຸງແຕ່ງ ແລະ ຫັດຖະກໍາຈໍານວນ 6 ແຫ່ງ; 9 ເດືອນຜ່ານມາ ລວມຍອດພະລິດຕະພັນ ອຸດສາຫະກຳປຸງແຕ່ງພາຍໃນບັນລຸໄດ້ 880 ລ້ານກວ່າກີບ, ມູນຄ່າຈໍລະຈອນສິນຄ້າບັນລຸໄດ້ 36 ຕື້ກວ່າກີບ, ທົ່ວເມືອງມີຫົວໜ່ວຍວິສາຫະກິດທັງໝົດ 224 ຫົວໜ່ວຍ ມູນຄ່າທຶນຈົດທະບຽນ 48.87 ຕື້ກີບ, ໃນນັ້ນ ຕ່າງປະເທດ ມີ 11 ຫົວໜ່ວຍ (ແຂວງອອກທະບຽນ) ແລະ ທົ່ວເມືອງມີບ້ານພົ້ນທຸກ 54 ບ້ານ, ມີຄອບຄົວພົ້ນທຸກ 5,112 ຄອບຄົວ ເທົ່າກັບ 98.36%; ບ້ານທຸກຍັງມີ 3 ບ້ານ, ຄອບຄົວທຸກຍາກ 258 ຄອບຄົວ ເທົ່າກັບ 29.8%; ມີຄອບຄົວພັດທະນາ 3,358 ຄອບຄົວ ເທົ່າກັບ 70.35% ຂອງຄອບຄົວທັງໝົດ ກອງປະຊຸມຜູ້ເຂົ້າຮ່ວມຕາງໜ້າເເຕ່ລະຂະເເໜງການໄດ້ພັດປ່ຽກັນຂຶ້ນມີຄໍາເຫັນຕໍ່ບົດລາຍງານ ຍົກບັນຫາສໍາຄັນທີ່ຍັງຄົງຄ້າງໃນເເຕ່ລະໜ້າທີ່ວຽກງານມາພິຈາລະນາໂດຍສະເພາະວຽກງານພື້ນຖານໂຄງລ່າງ, ການສຶກສາ, ລາຍຮັບງົບປະມານອື່ນໆ ຍ່າງສົມເຫດສົມຜົນ ໃນໂອກາດທີ່ເຂົ້າຮ່ວມກອງປະຊຸມ ທ່ານ ກົງເພັດ ແກ້ວບົວພາ ກໍາມະການພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 3 ແຂວງຫຼວງນໍ້າທາ, ຮອງປະທານສະພາປະຊາຊົນແຂວງໄດ້ມີຄໍາເຫັນໂອ້ລົມ ຊຶ່ງທ່ານໄດ້ສະເເດງຄວາມຊົມເຊີຍຕໍ່ຄະນະພັກເມືອງ ແລະ ຄະນະຮັບຜິດຊອບຫ້ອງການທີ່ກ່ຽວຂ້ອງທີ່ຈັດຕັ້ງປະຕິບັດໜ້າທີ່ວຽກງານທີ່ພັກລັດຂັ້ນເທິງມອບໝາຍໃຫ້ສໍາເລັດ ເປັນຕົ້ນ, ການພັດທະນາເມືອງນາເເລ ແມ່ນໄດ້ດີຕະຫຼອດມາ ທ່ານຍັງເນັ້ນໜັກບາງວຽກງານທີ່ຍັງຄົງຄ້າງ ເເມ່ນຈະຕ້ອງສືບຕໍ່ພ້ອມທັງເເກ້ໄຂ້ໃຫ້ສໍາເລັດ, ເຮັດວຽກເປັນໝູ່ຄະນະ, ມີຄວາມສາມັກຄີຍ່າງກົມກຽວຕາມສາຍຕັ້ງ ສາຍຂວາງ. (ຂ່າວ: ອຸດົມສຸກ ວັນສະໝອນ)