ສໍາລັບ ທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ; ແມ່ນວັນທີ່ປະຊາຊົນລາວບັນດາເຜົ່າ ໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງ; ທັງເປັນວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນາຖາວອນ.
ຕະຫຼອດໄລຍະເວລາ 49 ປີຜ່ານມາ ພາຍໃຕ້ການນໍາພາຂອງພັກປປ ລາວ ຂອງພວກເຮົາໄດ້ມີການພັດທະນາດີຂຶ້ນ ບໍ່ວ່າຈະເປັນດ້ານເສດຖະກິດ,ພື້ນຖານໂຄງລ່າງ,ຖະໜົນຫົນທາງ,ໂຮງຈັກ-ໂຮງງານ,ໂຮງຮຽນ,ໂຮງໝໍ ແລະ ອື່ນໆ ໄດ້ມີການກໍ່ສ້າງປັບປຸງໃໝ່ ແລະ ມີການຂະຫຍາຍຕົວຢ່າງແຂງແຮງ,ຄວາມທຸກຍາກຂອງປະຊາຊົນ ໄດ້ຮັບການແກ້ໄຂ,ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນເປັນກ້າວໆ.
ສໍາລັບ ແຂວງບໍລິຄໍາໄຊ ເວົ້າລວມ,ເວົ້າສະເພາະເມືອງປາກຊັນຂອງພວກເຮົາ ໂດຍລວມທົ່ວເມືອງ ຍັງສືບຕໍ່ມີຄວາມສະຫງົບໂດຍພື້ນຖານ,ເສດຖະກິດຂະຫຍາຍຕົວຕໍ່ເນື່ອງ,ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ;ການຈັດເກັບລາຍຮັບເຂົ້າງົບປະມານໃນປີ 2024 ມາຮອດປັດຈຸບັນ,ສາມາດຈັດຕັ້ງປະຕິບັດໄດ້ລື່ນແຜນການ, ການພັດທະນາພື້ນຖານໂຄງລ່າງ ກໍໄດ້ຮັບການເອົາໃຈໃສ່ ເປັນຕົ້ນການກໍ່ສ້າງເສັ້ນທາງສາມາດເຂົ້າເຖິງທຸກບ້ານ ແລະທຽວໄດ້ຕະຫຼອດປີ, ພິເສດ ເມືອງພວກເຮົາໄດ້ນໍາພາ, ປຸກລະດົມສັງຄົມ, ປະຊາຊົນ ສ້າງທາງເບຕົງເສີມເຫຼັກຢູ່ບັນດາບ້ານທີ່ມີເງື່ອນໄຂດ້ວຍແຮງງານຂອງພໍ່ແມ່ປະຊາຊົນເອງ, ປັດຈຸບັນ ທົ່ວເມືອງປາກຊັນ ສ້າງທາງເບຕົງໄດ້ 17 ເສັ້ນ, ມີລວງຍາວ 4,629 ແມັດ ມູນຄ່າ 3.29 ຕື້ກີບ,ວຽກງານການແກ້ໄຂຄວາມທຸກຍາກ ກໍໄດ້ເອົາໃຈໃສ່ ຕໍ່ເຕີມເຮືອນໃຫ້ຄອບຄົວທຸກຍາກ ສາມາດຈັດຕັ້ງປະຕິບັດໄດ້ ຈໍານວນ 8 ຄອບຄົວ, ມູນຄ່າການກໍ່ສ້າງທັງໝົດ 266,600,000 ກີບ (ສ່ວນແຮງງານແມ່ນປະຊາຊົນພາຍໃນບ້ານເປັນຜູ້ຊ່ວຍ) ປັດຈຸບັນມີຄອບຄົວທຸກຍາກ 30 ຄອບຄົວ ເທົ່າກັບ 0.29%, ສິ່ງທີ່ກ່າວມາຂ້າງເທິງນັ້ນ,ແມ່ນຜົນງານຈໍານວນໜຶ່ງ ທີ່ອົງຄະນະພັກເມືອງຍາດມາໄດ້ ໃນການຈັດຕັ້ງປະຕິບັດມະຕິ VII ຂອງອົງຄະນະພັກແຂວງ, ອົງຄະນະພັກເມືອງວາງອອກທັງເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ແລະ ຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 49 ປີ.
ໃນໂອກາດທີ່ມີຄວາມໝາຍ-ຄວາມສໍາຄັນນີ້ ຂ້າພະເຈົ້າຂໍຈາລຶກບຸນຄຸນຂອງບັນດາທ່ານບັນພະບູລຸດ, ປະຊາຊົນບັນດາເຜົ່າ ທີ່ໄດ້ເສຍສະຫຼະຊີວິດເລືອດເນື້ອ ເພື່ອກອບກູ້ເອົາຜືນແຜ່ນດິນອັນແສນຮັກມາໃຫ້ປະຊາຊົນລາວ ຈົນເຖິງທຸກວັນນີ້ ແລະ ຂໍຖືເອົາໂອກາດນີ້,ອວຍພອນບັນດາທ່ານ ການນໍາພັກ-ລັດ, ພະນັກງານ-ລັດຖະກອນ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ຈົ່ງມີພະລານາໄມສົມບູນ, ມີຄວາມຜາສຸກໃນຊີວິດສ່ວນຕົວ ແລະ ຄອບຄົວ, ມີຜົນສໍາເລັດໃນໜ້າທີ່ວຽກງານຂອງບັນດາທ່ານທຸກປະການ. ນໍ້າໃຈວັນຊາດທີ 2 ທັນວາ ໝັ້ນຍືນ!
ຄໍາເຫັນ