ວີແຄຣ໌ ໂສມສະກັດເພື່ອສຸຂະພາບຊ່ວຍບໍາລຸງຮ່າງກາຍ

ທ່ານນາງ ທິບພະຈັນ ອ່ອນມະນີ ຜູ້ອຳນວຍການໂຮງງານປຸງແຕ່ງໂສມສະກັດວີແຄຣ໌ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 27 ສິງຫາວ່າ: ໂຮງງານປຸງແຕ່ງໂສມສະກັດວີແຄຣ໌ ດຳເນີນທຸລະກິດ SME ຂະໜາດນ້ອຍແບບຄອບຄົວຕັ້ງຢູ່ບ້ານໃໝ່ຫົວເມືອງເມືອງລະມາມແຂວງເຊກອງ ໄດ້ຮັບການສ້າງຕັ້ງຂຶ້ນໃນປີ 2021 ໂດຍໄດ້ມີການຄົ້ນຄວ້າ, ທົດລອງການປຸງແຕ່ງໂສມເປັນເວລາ 2 ປີກວ່າ ແລະ ໄດ້ເຂົ້າຈົດທະບຽນວິສະຫະກິດໃນປີ 2021ໂດຍນໍາໃຊ້ວັດຖຸດິບຫຼັກຈາກໂສມທໍາມະຊາດເມືອງດາກຈຶງ ແຂວງເຊກອງເກືອບ 90% ນໍາມາປຸງແຕ່ງເປັນຜະລິດຕະພັນສໍາເລັດຮູບເພື່ອສ້າງມູນຄ່າເພີ່ມໃຫ້ກັບໂສມທຳມະຊາດໃຫ້ມີລາຄາ ແລະ ມີຄຸນຄ່າປະກອບສ່ວນສ້າງວຽກເຮັດງານທຳແກ້ໄຂຄວາມທຸກຍາກຂອງປະຊາຊົນ,ຊຶ່ງໄດ້ຮັບການຢັ້ງຢືນເປັນສິນຄ້າ “ໜຶ່ງເມືອງ ໜຶ່ງຜະລິດຕະພັນ” ໂອດັອບໃນປີ 2022ໂດຍຮັບປະກັນຄຸນນະພາບໄດ້ຕາມມາດຕະຖານຂອງກະຊວງສາທາລະນະສຸກວາງອອກ ແລະ ໄດ້ຮັບ ອຍ ໃນປີ 2023ຕິດພັນກັບແຜນພັດທະນາເສດຖະກິດ-ສັງຄົມຂອງແຂວງເຊກອງ ກໍຄືລັດຖະບານເພື່ອຊຸກຍູ້ສົ່ງເສີມການປູກ, ການຜະລິດໃຫ້ກາຍເປັນສິນຄ້າຫຼຸດຜ່ອນການນຳເຂົ້າຈາກຕ່າງປະເທດ.

ໂສມສະກັດວີແຄຣ໌ ມີສັບພະຄຸນຊ່ວຍຊະລໍຄວາມແກ່, ຢັບຢັ້ງພະຍາດເບົາຫວານ, ຊ່ວຍຜ່ອນຄາຍ, ແກ້ອາການອ່ອນເພຍ, ອາການນອນບໍ່ຫຼັບ, ປັບການໄຫຼວຽນຂອງເລືອດໃຫ້ດີຂຶ້ນ, ບຳລຸງສະໝອງ ເສີມສ້າງຄວາມຈື່ຈຳ, ຊ່ວຍແກ້ອາການເມົາຄ້າງ, ເສີມສ້າງພູມຕ້ານທານໃຫ້ຮ່າງກາຍ, ເພີ່ມສະມັດຖະພາບທາງເພດ ໂດຍມີໂສມສະກັດສູດດັ້ງເດີມ ແລະ ສູດປະສົມນ້ຳເຜິ້ງ, ໂສມແຫ້ງດາກຈືງ ແລະ ຊາສະໝຸນໄພ3ສະຫາຍ(ຫົວສິງໄຄ, ໃບເຕີຍ, ນໍ້າເຜິ້ງ) ໂດຍມີສັບພະຄຸນຊ່ວຍບໍາລຸງຮ່າງກາຍ, ໂສມສະກັດວີແຄຣ໌ ເປັນສິ່ງທີ່ພູມໃຈທີ່ສຸດສິ່ງໜຶ່ງຂອງຄອບຄົວ ກໍຄືແຂວງເຊກອງດ້ວຍແຮງສະໜັບສະໜູນຊຸກຍູ້ຈາກພາກລັດ ຈຶ່ງກາຍເປັນຜະລິດຕະພັນທີ່ສົມບູນແບບພາຍໃຕ້ຍີ່ຫໍ້ ”ວີແຄຣ໌” ເປັນເຈົ້າຂອງໂຮງງານທຳອິດໃນປະເທດລາວທີ່ນຳເອົາ’’ໂສມດາກຈືງ” ທີ່ເປັນວັດຖຸດິບທຳມະຊາດຈາກເມືອງດາກຈືງ ແຂວງເຊກອງຢູ່ທາງພາກໃຕ້ຂອງປະເທດນຳມາແປຮູບໂດຍຄົນລາວແທ້ 100%.

ທ່ານນາງ ທິບພະຈັນ ອ່ອນມະນີ ກ່າວໃຫ້ຮູ້ອີກວ່າ: ໃນໄລຍະຜ່ານມາ, ໄດ້ນໍາເອົາຜະລິດຕະພັນໂສມເຂົ້າຮ່ວມງານວາງສະແດງຢູ່ປັກກິ່ງ ສປຈີນ ແລະ ປະເທດໄທ, ປັດຈຸບັນໄດ້ວາງຈຳໜ່າຍທັງພາຍໃນ ແລະ ສົ່ງອອກໄປ ສສ.ຫວຽດນາມ, ໄທ ແລະ ມີຕົວແທນຈຳນວນໜຶ່ງ, ຊຶ່ງຜະລິດຕະພັນທີ່ໄດ້ຮັບຄວາມນິຍົມຫຼາຍທີ່ສຸດແມ່ນໂສມສະກັດວີແຄຣ໌ສູດດັ້ງເດີມຫຼືເອີ້ນວ່າໂສມກ່ອງແດງ ລາຄາເລີ່ມຕົ້ນ 50 ກຣາມ 270,000 ກີບ, ສ່ວນ 100 ກຣາມ ແມ່ນ 450,000 ກີບ.ໃນອະນາຄົດທາງໂຮງງານຈະມີການສົ່ງເສີມໃຫ້ປະຊາຊົນຫັນມາປູກໂສມແທນການປູກມັນໃຫ້ຫຼາຍຂຶ້ນຊຶ່ງເຮັດໃຫ້ມີລາຄາສູງ, ໂສມ 1 ກິລາ ລາຄາ 180,000 ກີບເພື່ອເປັນທ່າແຮງໃຫ້ແຂວງພ້ອມທັງສ້າງລາຍຮັບໃຫ້ກັບຄອບຄົວ, ຖ້າທ່ານໃດມີຄວາມສົນໃຈສາມາດເຂົ້າໄປສອບຖາມໄດ້ທີ່ເຟສບຸດ ໂສມສະກັດວີແຄຣ໌ໄດ້.