ໄດ້ຮັບຜົນຜະລິດເຂົ້າໄດ້ທັງໝົດ 17,784 ໂຕນ ທຽບໃສ່ປີຜ່ານມາເພີ່ມຂຶ້ນ 38 ໂຕ່ນ.
ຕາມການໃຫ້ສໍາພາດຂອງທ່ານ ແສງສະໄໝ ພະໄຊວໍຣະວົງ ຮອງຫົວໜ້າຫ້ອງການກະສິກໍາ ແລະ ປ່າໄມ້ເມືອງບໍລິຄັນ ໃນວັນທີ 20 ພະຈິກນີ້ ໃຫ້ຮູ້ວ່າ: ຫ້ອງການກະສິກໍາ ແລະ ປ່າໄມ້ເມືອງ ເວົ້າລວມ ເວົ້າສະເພາະໜ່ວຍງານປູກຝັງ ໄດ້ເກັບກໍາຂໍ້ມູນການເກັບກ່ຽວເຂົ້ານາປີ ປະຈໍາປີ 2024 ນີ້ໃນທົ່ວເມືອງ ແມ່ນໄດ້ປະຕິບັດສໍາເລັດແລ້ວ ສະເລ່ຍຜົນໄດ້ຮັບແມ່ນ 3,8ໂຕນ ຕໍ່ແຮັກຕ່າ ເນື້ອທີ່ນາໃນປີນີ້ເພີ່ມຂຶ້ນ 10 ຮຕ ພາຍໃນເມືອງແມ່ນສາມາດມີເຂົ້າກຸ້ມກີນຕະຫຼອດປີ. ນອກຈາກການຜະລິດເຂົ້າກິນໃນຄອບຄົວແລ້ວ ຍັງໄດ້ຊຸກຍູ້ຂະບວນການຜະລິດເຂົ້າຂາຍເປັນສີນຄ້າໄດ້ 3 ກຸ່ມ ໃນ 3 ບ້ານຄື: ບ້ານຫົວນາ, ບ້ານນາລ້ອງ ແລະ ບ້ານຜາເມືອງ ມີທັງໝົດ 156 ຄອບຄົວ ເນືອທີ່ນາ 163 ຮຕ ແລະ ຍັງມີກຸ່ມຜະລິດແນວພັນເຂົ້າ 2 ກຸ່ມຄື: ບ້ານຫົວນາ, ບ້ານນາລ້ອງ ມີ 40 ຄອບຄົວ ສະເລ່ຍການຜະລິດແນວພັນເຂົ້າໄດ້ 21 ໂຕນ ປະກອບມີເຂົ້າເຫຼືອງຄໍາ, ເຂົ້າ 450 ປີ ແລະ ເຂົ້າອື່ນໆອີກຈໍານວນໜຶ່ງ.
ສິ່ງທ້າທາຍ ແລະ ຜົນກະທົບ ໃນການຜະລິດເຂົ້າໃນປີ 2024ນີ້ ແມ່ນໄພນໍ້າຖ້ວມ, ພະຍາດຈາກຜົນຂອງນໍ້າຫຼາຍເກີນ ແລະ ຍັງມີອັດຕາການລົງທືນສູງເຊັ່ນວ່າ: ການກຽມພື້ນທີ່ ແລະ ການໃສ່ຝຸ່ນກໍເປັນສາເຫດໜຶ່ງທີ່ສົ່ງຜົນກະທົບຕໍ່ການຜະລິດຂອງປະຊາຊົນອີກດ້ວຍ.
ທ່ານຍັງໃຫ້ຮູ້ຕື່ມວ່າ: ໃນຕໍ່ໜ້າ ທາງຫ້ອງການກະສິກໍາ ແລະ ປ່າໄມ້ເມືອງ ຈໍາເປັນທີ່ຈະຕ້ອງໄດ້ແຕ່ງຕັ້ງພະນັກງານວິຊາການ ເພື່ອລົງສົມທົບຊຸກຍູ້ຂະບວນການຜະລິດເຂົ້ານາແຊງໃນປີ 2025 ໃຫ້ໄດ້ 200 ກ່ວາຮຕ.
(ຂ່າວ-ພາບ: ກົວຊົ່ງ)
ຄໍາເຫັນ