 |
ໃນພິທີ, ສະຫາຍ ພູວຽງ ພົງສະຫວັດດີ ໄດ້ຂຶ້ນເຜີຍແຜ່ຜົນສໍາເລັດກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດສະໄໝທີ IX; ເຜີຍແຜ່ຂໍ້ຕົກລົງວ່າດ້ວຍການປະກາດໃຊ້ກົດລະບຽບຊາວໜຸ່ມ ປະຊາຊົນປະຕິວັດລາວສະໄໝທີ IX; ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການບົງຕົວແຕ່ງຕັ້ງຄະນະບໍລິຫານງານສະຫະພັນຊາວໜຸ່ມລາວ ສະໄໝທີ I ແລະ ມະຕິກອງປະຊຸມໃຫຍ່ສະຫະພັນຊາວໜຸ່ມລາວ ສະໄໝທີ I. ຈາກນັ້ນ, ສະຫາຍ ບຸນອູ້ມ ລາດຊະວົງ ຄະນະປະຈໍາ ຮອງເລຂາຄະນະບໍລິຫານງານຊາວໜຸ່ມ ຄອສພ ໄດ້ຂຶ້ນຜ່ານຂໍ້ຕົກລົງວ່າດ້ວຍການຍຸບເລີກຄະນະຊາວໜຸ່ມ ແລະ ໜ່ວຍຊາວໜຸ່ມໃນຂົງເຂດສື່ມວນຊົນ; ຜ່ານຂໍ້ຕົກລົງວ່າດ້ວຍການສ້າງຕັ້ງໜ່ວຍຊາວໜຸ່ມຂຶ້ນກັບຄະນະຊາວໜຸ່ມ ຄອສພ ໂດຍເຫັນດີແຕ່ງຕັ້ງຄະນະຊາວໜຸ່ມຮາກຖານ ແລະ ໜ່ວຍຊາວໜຸ່ມຂົງເຂດສື່ມວນຊົນທີ່ຂຶ້ນກັບຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຄອສພ ມີຄື: ຄະນະຊາວໜຸ່ມຮາກຖານໂທລະພາບແຫ່ງຊາດລາວ (ທຊລ) ປະກອບມີ 5 ໜ່ວຍຄື: ໜ່ວຍຊາວໜຸ່ມລາຍການ ທຊລ 1, ທຊລ 3, ໜ່ວຍຊາວໜຸ່ມຂ່າວ ທຊລ, ໜ່ວຍຊາວໜຸ່ມບໍລິການ ທຊລ, ໜ່ວຍຊາວໜຸ່ມເຕັກນິກ ທຊລ; ຄະນະຊາວໜຸ່ມຮາກຖານວິທະຍຸກະຈາຍສຽງແຫ່ງຊາດລາວປະກອບມີ 3 ໜ່ວຍຂຶ້ນກັບຄື: ໜ່ວຍຊາວໜຸ່ມບໍລິຫານ, ຂ່າວ ແລະ ລາຍການ ວສລ, ໜ່ວຍຊາວໜຸ່ມເຕັກນິກການສຽງ-ໄອທີ ແລະ ເຄື່ອງສົ່ງ ວສລ, ໜ່ວຍຊາວໜຸ່ມພາສາຕ່າງປະເທດ ແລະ ຊົນເຜົ່າ ວສລ; ໜ່ວຍຊາວໜຸ່ມກົມສື່ມວນຊົນ; ໜ່ວຍຊາວໜຸ່ມສໍານັກຂ່າວສານປະເທດລາວ ແລະ ໜ່ວຍຊາວໜຸ່ມພາສາຕ່າງປະເທດ; ຜ່ານມະຕິຕົກລົງຂອງສູນກາງຊາວໜຸ່ມປະຊາຊົນປະຕິວັດລາວ ສະບັບເລກທີ 1045./ສຊປລ, ລົງວັນທີ 17 ທັນວາ 2025 ວ່າດ້ວຍການແຕ່ງຕັ້ງເພີ່ມເຕີມຄະນະບໍລິຫານງານຊາວໜຸ່ມປະຊາຊົນປະຕິວັດລາວ ຄອສພ ສະໄໝທີ V ຈໍານວນ 8 ສະຫາຍ; ຜ່ານຂໍ້ຕົກລົງວ່າດ້ວຍການບົ່ງຕົວແຕ່ງຕັ້ງເລຂາ, ຮອງເລຂາ, ຄະນະຊາວໜຸ່ມຮາກຖານ, ຄະນະໜ່ວຍຊາວໜຸ່ມ ທີ່ຂຶ້ນກັບຄະນະບໍລິຫານງານຊາວໜຸ່ມ ຄອສພ.
 |
ພ້ອມນັ້ນ, ຜ່ານຂໍ້ຕົກລົງວ່າດ້ວຍການແບ່ງຄວາມຮັບຜິດຊອບພາຍໃນຄະນະບໍລິຫານງານຊາວໜຸ່ມ ຄອສພ ສະໄໝທີ V. ສະຫາຍ ສອນໄພ ບົວຄໍາໄຊ ຮອງເລຂາຄະນະບໍລິຫານງານຊາວໜຸ່ມ ຄອສພ ໄດ້ຂຶ້ນຜ່ານແຜນພັດທະນາວຽກງານຊາວໜຸ່ມ ຄອສພ2026-20230. ຈາກນັ້ນ, ສະຫາຍ ນາງ ສຸພາພອນ ເທບວິໄລ ຮອງເລຂາຄະນະບໍລິຫານງານຊາວໜຸ່ມ ຄອສພ ໄດ້ຂຶ້ນຜ່ານຂໍ້ຕົກລົງວ່າດ້ວຍການອະນຸມັດໃຫ້ສະມາຊິກຊາວໜຸ່ມທີ່ພົ້ນກະສຽນການເປັນສະມາຊິກຊາວໜຸ່ມປະຊາຊົນປະຕິວັດລາວ. ໂອກາດນີ້, ສະຫາຍ ພູວຽງ ພົງສະຫວັດດີ, ສະຫາຍ ບຸນອູ້ມ ລາດຊະວົງ ໄດ້ມອບໃບຍ້ອງຍໍໃຫ້ຄະນະບໍລິຫານງານຊາວໜຸ່ມ ຄອສພ ສະໄໝທີ IV ແລະ ສະມາຊິກຊາວໜຸ່ມ ທີ່ພົ້ນກະສຽນການເປັນສະມາຊິກຊາວໜຸ່ມປະຊາຊົນ ປະຕິວັດລາວ ຈໍານວນ 26 ສະຫາຍ ຍິງ 4 ສະຫາຍ.
 |
ໃນໂອກາດນີ້, ສະຫາຍ ນາງ ວິລະວອນ ພັນທະວົງ ໄດ້ໃຫ້ກຽດໂອ້ລົມ ເພື່ອເປັນທິດຊີ້ນໍາໃຫ້ຄະນະບໍລິຫານງານຊາວໜຸ່ມ ຄອສພ ກໍຄືສະມາຊິກຊາວໜຸ່ມສືບຕໍ່ເອົາໃຈໃສ່ໃນການຈັດຕັ້ງປະຕິບັດແຜນພັດທະນາວຽກງານຊາວໜຸ່ມໃນ 5 ປີໃນຕໍ່ໜ້າໃຫ້ປະກົດຜົນເປັນຈິງ.
ຂ່າວ-ພາບ: ວັນເພັງ
ຄໍາເຫັນ