“ ຊາວໜຸ່ມກອງທັບ ເດັດດ່ຽວອາດຫານ ນຳໜ້າ ສາມັກຄີ ມີວິໃນ ແລະ ປະດິດສ້າງ ”

ຄືດັ່ງພວກເຮົາຮູ້ນຳກັນແລ້ວວ່າ: ກອງທັບປະຊາຊົນລາວ ມີທາດແທ້ ແລະ ມູນເຊື້ອອັນດີງາມຂອງຕົນຄື: ມີທາດແທ້ ແມ່ນກອງທັບຂອງປະຊາຊົນ, ເກີດຈາກປະຊາຊົນ, ໂດຍປະປະຊາຊົນ, ເພື່ອປະຊາຊົນ; ຊຶ່ງພັກປະຊາຊົນປະຕິວັດລາວເປັນຜູ້ກໍ່ຕັ້ງ,ນຳພາ ແລະ ສຶກສາອົບຮົມ; ແມ່ນພາຫະນະອັນແຫຼມຄົມຂອງພັກ; ມູນເຊື້ອອັນສະຫງ່າງາມຂອງກອງທັບປະຊາ ຊົນລາວ ແມ່ນຄວາມສະຫຼຽວສະຫຼາດ, ຄວາມສາມາດປະດິດສ້າງໃນການສູ້ຮົບ ແລະ ສູ້ຮົບມີໄຊ ໂດຍໄດ້ຮັບການທົດສອບຈາກພຶດຕິກຳແຫ່ງການຕໍ່ສູ້ປະຕິວັດອັນຍາວນານ. ນັບແຕ່ກອງຮ້ອຍລາດສະວົງ ( ຊຶ່ງເປັນຕົ້ນກຳເນີດກອງທັບປະຊາຊົນລາວໃນປັດຈຸບັນ) ໄດ້ຮັບການສ້າງຕັ້ງຂຶ້ນໃນວັນທີ 20 ມັງກອນ 1949 ຢູ່ເຂດທີ່ໝັ້ນແຂວງຫົວພັນ ໂດຍແມ່ນປະທານໄກສອນ ພົມວິຫານເປັນຜູ້ກໍ່ຕັ້ງ, ທັງເປັນຜູ້ນຳພາ-ບັນຊາໂດຍກົງ. ຈາກນັ້ນກໍໄດ້ເຕົ້າ ໂຮມກຳລັງປະກອບອາວຸດໃນຂອບເຂດທົ່ວປະເທດເຂົ້າເປັນກອງທັບລາວອິດສະຫຼະ.

ຊຶ່ງເປັນເຫດການທີ່ມີຄວາມໝາຍຄວາມສຳຄັນອັນໃຫຍ່ຫຼວງທາງດ້ານການເມືອງ ແລະ ປະຫວັດສາດຂອງຊາດລາວເຮົາ, ເປັນບາດລ້ຽວປະ ຫວັດສາດໜ້າໃໝ່ແຫ່ງການຕໍ່ສູ້ກູ້ຊາດ ໂດຍມີກອງທັບເປັນຫຼັກແຫຼ່ງຂອງການປະຕິວັດໃນການຕໍ່ສູ້ກັບຈັກກະພັດຜູ້ຮຸກຮານ ແລະ ລູກມືຂາຍຊາດ.

ພາຍຫຼັງໄດ້ຮັບການສ້າງຕັ້ງຂຶ້ນ ກອງທັບກໍໄດ້ຜະເຊີນໜ້າກັບສັດຕູໂຕຮ້າຍກາດທີ່ມີກໍາລັງແຮງເໜືອກວ່າ ນັບທັງດ້ານກໍາລັງພົນ ແລະ ອາວຸດຍຸດໂທປະກອນທີ່ທັນສະໄໝກວ່າ, ແຕ່ດ້ວຍນໍ້າໃຈຮັກຊາດອັນສູງສົ່ງ, ການສືບທອດມູນເຊື້ອພິລະອາດຫານບໍ່ຍອມຈໍານົນຂອງບັນພະບຸລຸດ ແລະ ເຊື້ອຊາດລາວ, ກອງທັບເຮົາໄດ້ດໍາເນີນການຕໍ່ສູ້ຢ່າງພິລະອາດຫານ, ເດັດດ່ຽວໜຽວແໜ້ນ ແລະ ຍາດໄດ້ໄຊຊະນະເປັນກ້າວໆມາ, ກ້າວໄປສູ່ການສະ ຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ.

ສະຫາຍ ພັນເອກ ຫົງທອງ ສີຊານົນ ໃຫ້ຮູ້ຕື່ມວ່າ: ປັດຈຸບັນ, ຜ່ານຍ່ານທາງ 77 ປີແຫ່ງການກໍ່ຕັ້ງ, ສູ້ຮົບມີໄຊ ແລະ ເຕີບໃຫຍ່ຂະຫຍາຍຕົວ ພາຍໃຕ້ການນຳພາອັນປີຊາສາມາດ ສະຫຼາດສ່ອງໃສຂອງພັກປະຊາຊົນປະຕິວັດລາວ, ກອງທັບປະຊາຊົນລາວ ໄດ້ກາຍເປັນກຳລັງຫຼັກແຫຼ່ງໃນການປົກປັກຮັກສາໝາກຜົນຂອງການປະຕິ ວັດ ແລະ ສ້າງສາພັດທະນາປະເທດຊາດ, ກອງທັບປະຊາຊົນລາວໄດ້ປັບປຸງພັດທະນາຕົນເອງໃຫ້ກາຍເປັນກອງ ທັບທີ່ມີແບບແຜນ ແລະ ທັນສະໄໝ, ສືບທອດເສີມຂະຫຍາຍໄດ້ທາດແທ້ ແລະ ມູນເຊື້ອອັນດີງາມຂອງຕົນໄດ້ຢ່າງສົມກຽດ ແລະ ພັດທະນາກ້າວຂຶ້ນຢ່າງບໍ່ຢຸດຢັ້ງ.

ເນື່ອງໃນໂອກາດວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 77 ປີ ( 20 ມັງກອນ 1949-

20 ມັງກອນ 2026 ) ທີ່ຈະໝູນວຽນມາເຖິງໃນມໍ່ໆນີ້, ສະຫາຍ ພັນເອກ ຫົງທອງ ສີຊານົນ ຕາງໜ້າພະນັກ ງານ, ສະມາຊິກຊາວໜຸ່ມໃນທົ່ວກອງທັບ ສະແດງຄວາມເຄົາລົບ ແລະ ຮູ້ບຸນຄຸນຢ່າງສູງ ຕໍ່ການນໍາພັກ-ລັດ, ຄະນະນຳກະຊວງປ້ອງກັນປະເທດ, ຄະນະນຳກົມໃຫຍ່ການເມືອງກອງທັບ, ຄະນະພັກ-ຄະນະບັນຊາ, ພະນັກງານປະຕິວັດອາວຸໂສ-ບຳນານ ແລະ ຄະນະນຳສູນກາງ ຊປປລ ອວຍພອນໄຊອັນປະເສີດໃຫ້ບັນດາທ່ານ ຈົ່ງມີສຸຂະ ພາບແຂງ ມີຜົນສຳເລັດໃນທຸກໜ້າທີ່ວຽກງານອັນມີກຽດຂອງທ່ານ, ສືບຕໍ່ຊີ້ນຳ-ນຳພາກອງທັບ, ຂະບວນການວຽກງານຊາວໜຸ່ມກອງທັບໃຫ້ມີຄວາມກ້າວໜ້າຂະຫຍາຍຕົວກ້າວຂຶ້ນຢ່າງບໍ່ຢຸດຢັ້ງ.