ຊາວໜຸ່ມລາວ ເປັນກຳລັງແຮງອັນໃຫຍ່ຫຼວງໃນທຸກຍຸກທຸກສະໄໝ

ພາຍຫຼັງພັກກອມມູນິດອິນດູຈີນໄດ້ຮັບການສ້າງຕັ້ງຂຶ້ນໃນວັນທີ 3 ກຸມພາ 1930, ມາຮອດປີ 1932 ບັນດາໜ່ວຍພັກຢູ່ລາວ ໄດ້ຮັບເຂົ້າຢູ່ໃນຕາໜ່າງການຈັດຕັ້ງຂອງພັກກອມມູນິດອິນດູຈີນ, ປີ 1933 ໜ່ວຍພັກຮາກຖານ ແລະ ອົງການຊາວໜຸ່ມກອມມູນິດພາຍໃນໂຮງຮຽນມັດທະຍົມ "ປາວີ” ວຽງຈັນໄດ້ນໍາພານັກຮຽນປະ ມານ 50 ກວ່າຄົນບຸກເຂົ້າຫາຜູ້ອໍານວຍການໂຮງຮຽນ ເພື່ອປະທ້ວງຕໍ່ການໄລ່ນັກຮຽນອອກຈາກໂຮງຮຽນ ແລະ ທວງໃຫ້ຮັບເອົານັກຮຽນເຂົ້າຮຽນຄືນສໍາເລັດ. ປີ 1934 ຢູ່ໂຮງຮຽນການຊ່າງປາກປ່າສັກ ພາຍໃຕ້ການນໍາພາຂອງຊາວໜຸ່ມນັກຮຽນໄດ້ພ້ອມກັນທວງໃຫ້ຝ່າຍປົກຄອງເພີ່ມເບ້ຍລ້ຽງ, ໃນປີ 1934 ນີ້ເອງທົ່ວແຄວ້ນລາວໄດ້ມີສະມາຊິກພັກກອມມູນິດຈໍານວນ 32 ສະຫາຍ, ມີ 6 ໜ່ວຍພັກ; ພັກໄດ້ຂົນຂວາຍມະຫາຊົນ ແລະ ສ້າງໄດ້ສະມາຊິກຊາວໜຸ່ມກອມມູນິດ 25 ຄົນ, ສະມາຊິກຊາວໜຸ່ມນັກຮຽນ 20 ຄົນ (ຢູ່ໂຮງຮຽນການຊ່າງປາກປ່າສັກ). ຄຽງຄູ່ກັນນັ້ນ, ຢູ່ໃນຂະບວນການຕໍ່ສູ້ຕ້ານຈັກກະພັດໃນແຕ່ລະໄລຍະກໍມີກຳລັງສູ້ຮົບຂອງກອງເຈົ້າໄຊຈັກກະພັດ, ກອງເຈົ້າຟ້າປັດໃຈ, ກອງລາດຊະວົງ ແລະ ກອງກຳລັງອື່ນໆ ນັ້ນແມ່ນຊາວໜຸ່ມມາຈາກກຳລັງປະກອບອາວຸດເອີ້ນວ່າ: ຄະນະຊາວໜຸ່ມຕະລຸມບອນ ຊຶ່ງໄດ້ມີບົດບາດຕະລຸມບອນໄດ້ບໍ່ວ່າແນວໜ້າ ຫຼື ແນວຫຼັງກໍລ້ວນມີກຳລັງຂອງຊາວໜຸ່ມ. ສະນັ້ນ, ພາຍຫຼັງພັກໄດ້ດໍາເນີນກອງປະຊຸມໃຫຍ່ຄັ້ງທີ I ໄດ້ກຳນົດເອົາວັນທີ 22 ມີນາ 1955 ເປັນມື້ສ້າງຕັ້ງພັກ ຍ້ອນເຫັນໄດ້ບົດບາດຄວາມສໍາຄັນຂອງຊາວໜຸ່ມແຕ່ລະໄລຍະ ພັກຈຶ່ງໄດ້ກຳນົດເອົາວັນສ້າງຕັ້ງຄະນະຊາວໜຸ່ມໃນວັນທີ 14 ເມສາ 1955.

ຄຊປປລ ມີມູນເຊື້ອທີ່ອາດຫານກ້າແກ່ນ ແລະ ສະຫງ່າລາສີ, ທຸກຍຸກທຸກສະໄໝ ຊາວໜຸ່ມລາວແມ່ນມີບົດບາດຕັດສິນ ແລະ ເປັນກຳລັງແຮງອັນໃຫຍ່ຫຼວງໃນທຸກຍຸກທຸກສະໄໝ. ດັ່ງນັ້ນ, ຄຊປປລ ຈຶ່ງມີຄວາມສໍາຄັນຄື: ໄດ້ສ້າງຄວາມຮັບຮູ້, ຄວາມເຂົ້າໃຈ, ເຊື່ອມຊຶມ ແລະ ກຳແໜ້ນຕໍ່ມູນເຊື້ອຂອງ ຄຊປປລ ແນໃສ່ເຮັດໃຫ້ຊາວໜຸ່ມທຸກເພດ, ເຜົ່າ, ສາຂາອາຊີບມີນໍ້າໃຈຮັກຊາດອັນດູດດື່ມມີຄວາມເຊື່ອໝັ້ນຕໍ່ການນໍາພາຂອງພັກ, ມີສະ ຕິຕໍ່ການຈັດຕັ້ງ, ສະຕິສັງຄົມ ແລະ ມີຄວາມຮັບຜິດຊອບສູງ. ໄດ້ເຕົ້າໂຮມ ແລະ ປຸກລະດົມກຳລັງແຮງສັງ ລວມຂອງຊາວໜຸ່ມເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ໄດ້ຝຶກຝົນຫຼໍ່ຫຼອມຄວາມຮູ້-ຄວາມສາມາດ ແລະ ຄຸນທາດການເມືອງໃຫ້ຊາວໜຸ່ມ ແນໃສ່ກາຍເປັນຜູ້ສືບທອດພາລະກິດຂອງພັກໃນໄລຍະ ໃໝ່ ແລະ ຍາວນານ.