ເຊກອງ ປະເມີນຜົນການຈັດຕັ້ງປະຕິບັດແຜນຜັງເມືອງ ແລະ ສໍາຫຼວດຄວາມຕ້ອງການດ້ານໂຄງລ່າງພື້ນຖານ

ທ່ານ ສົມພອນ ສາຍເຊກອງ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອປະຕິບັດຕາມແນວທາງນະໂຍ ບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ຕອບສະໜອງຄວາມຮຽກຮ້ອງຕອງການ ໃນການຂະຫຍາຍຕົວຂອງຕົວເມືອງໃຫ້ສົມຄູ່ກັບການປະຕິບັດໜ້າທີ່ວຽກງານຕົວຈິງ ໂດຍສະເພາະແມ່ນການລົງມາເກັບກໍາຂໍ້ມູນ ການປະເມີນຜົນການຈັດຕັ້ງປະຕິບັດແຜນຜັງເມືອງ ແລະ ສໍາຫຼວດຄວາມຕ້ອງການດ້ານໂຄງລ່າງພື້ນຖານທີ່ຈໍາເປັນຂອງບັນດາຕົວເມືອງພາຍໃນແຂວງເຊກອງ ເພື່ອແນໃສ່ການພັດທະນາພື້ນຖານໂຄງລ່າງ ໂດຍສະເພາະ ວຽກງານຄຸ້ມຄອງຜັງເມືອງຢູ່ເທສະບານແຂວງ, ເມືອງ, ບ້ານ ແລະ ເຂດທີ່ມີການວາງແຜນຜັງເມືອງໃຫ້ໄດ້ຮັບການພັດທະນາຕົວເມືອງໃຫ້ມີຄວາມສວຍງາມ, ເປັນລະບຽບຮຽບຮ້ອຍ ແລະ ຫັນເຂົ້າສູ່ລະບຽບກົດໝາຍ ເພື່ອປະຕິບັດໃຫ້ມີປະສິດທິພາບ ແລະ ປະສິດທິຜົນສູງ.

ຈາກນັ້ນ, ທ່ານ ທະວີສັກ ແພງມາລາ ວິຊາການ ກົມເຄຫາ-ຜັງເມືອງ ໄດ້ນໍາສະເໜີການປະເມີນຜົນ ການຈັດຕັ້ງປະຕິບັດແຜນຜັງເມືອງ ແລະ ການສໍາຫຼວດພື້ນຖານໂຄງລ່າງຂອງເມືອງ ໂດຍໃຊ້ແບບຟອມໃນການເກັບຂໍ້ມູນ ຊຶ່ງເນື້ອໃນຂອງການປະເມີນ ປະກອບມີ: ຂໍ້ມູນພື້ນຖານດ້ານເສດຖະກິດ-ສັງຄົມ, ຂໍ້ມູນແຜນຜັງຕົວເມືອງ, ຜົນໄດ້ຮັບຂອງການຈັດຕັ້ງປະຕິບັດແຜນຜັງ, ກໍາລັງຄວາມສາມາດຂອງການລົງທຶນ ແລະ ສໍາຫຼວດໂຄງລ່າງພື້ນຖານທີ່ຈໍາເປັນຂອງຕົວເມືອງ ເປັນຕົ້ນ ໃນສະພາບປັດຈຸບັນຂອງເມືອງມີຄວາມຫຍຸ້ງຍາກດ້ານໃດແດ່?, ທາງດ້ານໂຄງລ່າງພື້ນຖານ? (ຄວາມຈໍາເປັນໃນການແກ້ໄຂ, ປັບປຸງ, ກໍ່ສ້າງໃໝ່ມີຫຍັງແດ່ ທີ່ເປັນພື້ນຖານ?), ໃຫ້ຈັດລຽງບຸລິມະສິດ ຕາມຄວາມເໝາະສົມຂອງຕົວເມືອງດັ່ງກ່າວ?. ຈາກນັ້ນບັນດາຜູ້ເຂົ້າຮ່ວມໄດ້ຖອດຖອນບົດຮຽນ, ປຶກສາຫາລື ແລະ ແລກປ່ຽນຄໍາຄິດຄໍາເຫັນ ເພື່ອເກັບກໍາຂໍ້ມູນຕື່ມໃສ່ແບບຟອມ ເພື່ອຮັບປະກັນໃຫ້ຖືກຕ້ອງ ແລະ ແທດເໝາະກັບຄວາມເປັນຈິງ. ຂ່າວ: ພຸດທະສອນ