ເຊກອງ ເຜີຍແຜ່ວຽກງານຄຸ້ມຄອງລາຍຮັບພາສີທີ່ດິນ ແລະ ນິຕິກໍາກ່ຽວຂ້ອງ

ສ່ວຍສາອາກອນແຂວງເຊກອງ ຈັດກອງປະຊຸມເຜີຍແຜ່ວຽກງານຄຸ້ມຄອງລາຍຮັບຈາກພາສີທີ່ດິນ ແລະ ນິຕິກໍາທີ່ກ່ຽວຂ້ອງ ແລະ ເພີ່ມທະວີວຽກງານການເກັບລາຍຮັບຄ່າທໍານຽມທາງ ໃນວັນທີ 9 ພະຈິກນີ້ທີ່ຫ້ອງປະຊຸມພະແນກການເງິນແຂວງ ໂດຍພາຍໃຕ້ການເປັນປະທານຂອງທ່ານ ສຸກັນ ວໍລະປັນໄຊ ຮອງຫົວໜ້າພະແນກການເງິນແຂວງ, ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນແຂວງ, ມີພະແນກຂໍ້ມູນ-ຂ່າວສານ ກົມສ່ວຍສາອາກອນ ກະຊວງການເງິນ, ບັນດາທ່ານຮອງເຈົ້າເມືອງ, ຫົວໜ້າ-ຮອງຫົວໜ້າຫ້ອງການ-ການເງິນ, ສ່ວຍສາອາກອນເມືອງ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ສຸກັນ ວໍລະປັນໄຊ ກ່າວວ່າ: ການເຜີຍແຜ່ຄັ້ງນີ້ ເພື່ອແນໃສ່ໃຫ້ບັນດາຂະແໜງການຕ່າງໆກ່ຽວຂ້ອງ ໂດຍສະເພາະຂະແໜງການເງິນ, ສ່ວຍສາອາກອນແຂວງ-ເມືອງ ມີຄວາມຮັບຮູ້ເຂົ້າໃຈ ແລະ ມີຄວາມເປັນເອກະພາບເພື່ອພ້ອມກັນຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນ, ຮັບປະກັນການເກັບລາຍຮັບເຂົ້າງົບປະມານແຫ່ງລັດ ໃຫ້ຖືກຕ້ອງ, ຄົບຖ້ວນ, ຍຸຕິທໍາ ແລະ ໂປ່ງໃສ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ໃນໄລຍະຜ່ານມາ ພັກ-ລັດຖະບານ ກໍຄື ກະຊວງການເງິນໄດ້ເອົາໃຈໃສ່ພັດທະນາລະບົບການຊໍາລະພາສີທີ່ດິນໃຫ້ສາມາດນໍາໃຊ້ໄດ້2ລະບົບຄື: ຊໍາລະຜ່ານລະບົບທະນາຄານ ໂດຍການນໍາໃຊ້ແອັບພີເຄຊັນ (Application) ຂອງບັນດາທະນາຄານທີ່ເຂົ້າຮ່ວມໃນໂຄງການ ແລະ ຊໍາລະຜ່ານປ່ອງບໍລິການຂອງຫ້ອງການສ່ວຍສາອາກອນປະຈໍານະຄອນ, ເມືອງ, ເທດສະບານ ແລະ ຫ້ອງການປົກຄອງບ້ານ ບ່ອນຕອນດິນຕັ້ງຢູ່ ຊຶ່ງໄດ້ສ້າງຄວາມສະດວກສະບາຍໃຫ້ບຸກຄົນ, ນິຕິບຸກຄົນ, ອົງການຈັດຕັ້ງຕ່າງໆ ໃນການປະຕິບັດພັນທະຂອງຕົນໃຫ້ມີຄວາມຖືກຕ້ອງ. ອັນສໍາຄັນແມ່ນເປັນການປະຕິບັດແຜນວຽກພັດທະນາຂະແໜງການເງິນໄປສູ່ທັນສະໄໝ ເພື່ອຄຸ້ມຄອງ ແລະ ຈັດເກັບລາຍຮັບໃຫ້ຖືກຕ້ອງຕາມຄວາມເປັນຈິງ ອັດທຸກຊ່ອງວ່າງການຮົ່ວໄຫຼຂອງງົບປະມານ.
ເອກະສານທີ່ນໍາມາເຜີຍແຜ່ຄັ້ງນີ້ ປະກອບມີແຈ້ງການຂອງຫ້ອງການ ກະຊວງການເງິນ ສະບັບເລກທີ 1844/ຫກ ລົງວັນທີ 10 ກໍລະກົດ 2023 ວ່າດ້ວຍການເສຍພາສີທີ່ດິນປະຈໍາປີ 2023; ຄໍາແນະນໍາຂອງກົມສ່ວຍສາອາກອນ ສະບັບເລກທີ 4191/ກສອ ລົງວັນທີ 17 ກໍລະກົດ 2023 ວ່າດ້ວຍການເສຍພາສີທີ່ດິນ ປະຈໍາປີ 2023 ແລະ ກົດໝາຍ ວ່າດ້ວຍອາກອນທີ່ດິນ ສະບັບເລກທີ 35/ສພຊ ລົງວັນທີ 17 ກໍລະກົດ 2023. ພ້ອມນີ້, ຍັງໄດ້ເຜີຍແຜ່ວຽກງານການເສຍຄ່າທໍານຽມທາງ ແລະ ແນະນໍາການບັນທຶກຂໍ້ມູນຂໍ້ມູນຕອນດິນເຂົ້າປຶ້ມສໍາມະໂນທີ່ດິນ, ບັນທຶກເຂົ້າລະບົບ TaxRISແລະ ໃບເກັບເງິນຄ່າພາສີທີ່ດິນ.
ຂ່າວ-ພາບ: ສັນຍາ