ພິທີອາຣາດຖະນາໄດ້ຈັດຂຶ້ນ ໃນຕອນເຊົ້າຂອງວັນທີ່ 22 ເມສານີ້ ເລີ້ມຈາກພະເຖຣະ ໄດ້ນໍາພາຊາວພຸດທະສາສະນິກະຊົນ ກ່າວຄຳອາຣາດຖະນາອົງພະເຈົ້າໝ່ານ ຈາກຫໍພະໝ່ານ ລົງມາປະດິດສະຖານທີ່ຫໍສົງຂອງວັດຊຽງທອງ. ຈາກນັ້ນ, ໄດ້ມີພິທີແຫ່ອ້ອມພັດທະສີມມາ 3 ຮອບ ແລ້ວອັງເຊີນອົງພະເຈົ້າໝ່ານຂຶ້ນປະທັບໃນຫໍສົງ ແລະ ພະສົງ-ສາມະເນນ ໄດ້ນຳພາຊາວພຸດທະສາສະນິກະຊົນ ກ່າວຄຳຄາລະວະ ຈື່ງດຳເນີນການຫົດສົງຢ່າງເປັນທາງການ.
ທ່ານ ຄຳຕັນ ພວງສະຫວັດ ນາຍບ້ານຊຽງທອງ-ຄີລີ ໄດ້ໃຫ້ສຳພາດວ່າ: ສໍາລັບການຫົດສົງອົງພະໝ່ານ ປີນີ້ ຈະດໍາເນີນຈົນເຖີງ ຕອນແລງຂອງວັນທີ່ 26 ເມສາຈຶ່ງຈະສໍາເລັດ, ນອກຈາກການຫົດສົງອົງພະໝ່ານ ໄດ້ມີການຕັ້ງກອງບຸນ 84,000 ພະທັມມະຂັນ ປະຈໍາປີ 2025 ທີ່ວັດຊຽງທອງ ຈຶ່ງຂໍເຊີນຊວນມວນຊົນ ຊາວຫຼວງພະບາງ ພ້ອມດ້ວຍແຂກທັງພາຍໃນ ແລະ ຕ່າງປະເທດ ໄປຮ່ວມຫົດສົງອົງພະໝ່ານ ແລະ ຮ່ວມອານຸໂມທະນາບຸນ ຕາມກຳລັງສັດທາ.
ອົງພະໝ່ານ ໄດ້ສ້າງດ້ວຍ ທອງຄຳເນື້ອນົບພະເກົ້າ ຫຼື ຄຳເນື້ອເກົ້າ ເປັນຄຳທີ່ງົດງາມ ແລະ ສູງຄ່າທີ່ສຸດ ປະດັບດ້ວຍອັນຍະມະນີນົບພະເກົ້າ ນ້ຳດີທີ່ສຸດທັ້ງ 9 ສີ ບໍລິເວນເຂັມຂັດສ້ອຍສັງວານ ຊາຍໄຫວ ແລະ ເຄື່ອງຊົງທັງອົງ, ສ້າງຂຶ້ນໂດຍຄົນປະເທດພະມ້າ. ຫຼັງຈາກສ້າງແລ້ວ ຈື່ງນໍາຂຶ້ນລ່ອງແພໄປຕາມແມ່ນ້ຳຂອງ ເພື່ອກັບພະມ້າ ພໍຮອດບໍລິເວນເມືອງຫຼວງພະບາງ ອົງພະໄດ້ຢຸດ ແລະ ມຸນວົນນ້ຳ ເຮັດແບບໃດ ກໍບໍ່ສາມາດດືງແພໄປຕໍ່ໄດ້, ທະຫານພະມ້າໄດ້ດືງຢູ່ຫຼາຍທິ ແຕ່ບໍ່ເກີດຜົນ ຜູ້ອັນເຊີນໄດ້ເຮັດ ການສັກກະລະ ແລະ ຕັ້ງຈິດອະທິຖານວ່າ “ຫາກອົງພະ ມິກັບສູ່ຫົງສາວະດີ ກໍຂໍໃຫ້ທ່ານເລືອກວັດທີ່ຈະຢູ່ເຖີດ (ໃນຂະນະນັ້ນຫຼວງພະບາງມີຫຼາຍກວ່າ 100 ວັດ. ປັດຈຸບັນມີພຽງ 60 ກວ່າວັດ), ເຈົ້າອະທິການທຸກວັດໄດ້ມາອັນເຊີນ ຂຶ້ນຈາກແມ່ນ້ຳຂອງ ແຕ່ກໍບໍ່ມີວັດໃດສາມາດຍົກຂຶ້ນໄດ້ ມີພຽງເຈົ້າອະທິການວັດຊຽງທອງ ທີ່ຕັ້ງຈິດອະທິຖານ ທັນໃດນັ້ນສິ່ງທີ່ບໍ່ຄາດຝັນກໍເກີດຂຶ້ນ ໂດຍອຸ້ມອົງພະຂຶ້ນຈາກນ້ຳໄດ້ຢ່າງປະຕິຫານ ແລະ ໄດ້ອັນເຊີນເຂົ້າວັດ ທັງເຮັດການສົມໂພດຢ່າງຍິ່ງໃຫຍ່, ທັງດໍາເນີນການສ້າງ “ຫໍພະໝ່ານ” ແລະ ເກັບລ໋ອກຄວາມງົດງາມໄວ້ດ້ານຫຼັງຂອງ ພະອຸໂບສົດ ນັບແຕ່ປີພຸດທະສັກກະລາດ 2493 ຈົນມາເຖີງປັດຈຸບັນ, ຜະໜັງດ້ານຫຼັງວິຫານດ້ວຍສີບົວ ປະດັບດ້ວຍແວ່ນສີ ສະແດງເຖິງວິຖີຊີວິດຂອງຜູ້ຄົນ ມີຄວາມສວຍງາມແບບພື້ນບ້ານ ທີ່ເປັນເອກະລັກຂອງຫຼວງພະບາງ ແລະ ອັງເຊີນອອກມາພຽງ 3 ຫາ 7 ວັນ ເພື່ອຫົດສົງ ໂອກາດບຸນປີໃໝ່ລາວເທົ່ານັ້ນ, ແຕ່ຍາມໃດ ຝົນບໍ່ຕົກ ບ້ານເມືອງແຫ້ງແລ້ງ ຈະທຳການອັນເຊີນພະເຈົ້າໝ່ານ ອອກມາສົງນ້ຳ ຝົນກໍຈະຕົກຄືກັບປາຕິຫານ, ດ້ວຍເຫດນັ້ນ ໃນໂອກາດບຸນປີໃໝ່ທຸກປີ ຊາວຫຼວງພະບາງຈະມີການອັນເຊີນພະເຈົ້າໝ່ານ ລົງມາໃຫ້ປະຊາຊົນຫົດສົງນ້ຳ ແລະ ກາບໄຫ້ວເປັນປະຈຳທຸກປີ.
(ແຫຼ່ງຂ່າວ: ແຂວງຫຼວງພະບາງ)
ຄໍາເຫັນ