 |
ທ່ານ ນາງ ຈັນເພັດ ຈັນທະມາດ ປະທານສະຫະພັນແມ່ຍິງແຂວງ ໄດ້ຜ່ານຮ່າງບົດລາຍງານການເມືອງຂອງຜູ້ແທນກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ 8, ໂດຍໄດ້ຍົກໃຫ້ເຫັນການຈັດຕັ້ງປະຕິບັດໜ້າທີ່ວຽກງານຂອງສະຫະພັນແມ່ຍິງລາວແຕ່ລະຂັ້ນໃນຂອບເຂດທົ່ວປະເທດ, ຕະຫຼອດໄລຍະ 5 ປີຜ່ານມາ. ມີຫຼາຍໜ້າວຽກທີ່ເຮັດສໍາເລັດເປັນຕົ້ນ: ສະຫະພັນແມ່ຍິງແຕ່ລະຂັ້ນ ໄດ້ຖືສໍາຄັນວຽກງານສຶກສາອົບຮົມການເມືອງ-ແນວຄິດເປັນກົກ ເພື່ອສຶກສາອົບຮົມ ຖັນແຖວສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າຕິດພັນ ກັບການພັດທະນາແມ່ຍິງ, ການປົກປ້ອງສິດ ຜົນປະໂຫຍດອັນຊອບທຳຂອງແມ່ຍິງ ແລະ ເດັກນ້ອຍ, ການສົ່ງເສີມຄວາມກ້າວໜ້າ, ການສົ່ງເສີມຄວາມສະເໝີພາບຍິງ-ຊາຍ ແລະ ອື່ນໆ. ຈາກນັ້ນ, ໃນທີ່ປະຊຸມບັນດາຜູ້ເຂົ້າຮ່ວມໄດ້ປະກອບຄໍາເຫັນໃສ່ຮ່າງເນື້ອໃນເອກກະສານ ກອງປະຊຸມໃຫຍ່ຂອງຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ lX ບົນຫຼັກການຄວາມເປັນເອກະພາບສູງ.
 |
ທ່ານ ນາງ ບຸນນານ ບຸນນະແສງ ໄດ້ມີຄໍາເຫັນຊີ້ນໍາ ໂດຍເນັ້ນໜັກເຖິງມາດຖານຜູ້ທີ່ຈະອອກຮັບສະໝັກເປັນຄະນະລິຫານງານສູນກາງສະຫະພັນແມ່ຍິງລາວ ສະໄໝທີ IX. ເບື້ອງຕົ້ນຕ້ອງເປັນຜູ້ທີ່ມີຄຸນທາດການເມືອງໜັກແໜ້ນ, ມີຄວາມຮູ້ຄວາມສາມາດ, ມີແບບແຜນວິທີເຮັດວຽກທີ່ດີ, ມີສຸຂະພາບເຂັ້ມແຂງ, ມີຄວາມເສຍສະຫຼະ, ເປັນທີ່ເຊື່ອຖື ໄວ້ວາງໃຈຂອງມະຫາຊົນ ສາມາດຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່. ຈາກນັ້ນ, ໄດ້ດໍາເນີນການປ່ອນບັດທາບທາມເອົາບຸກຄະລາກອນ ທີ່ຈະສະມັກໃນໂຄງປະກອບຄະນະບໍລິຫານງານສູນກາງສະຫະພັນແມ່ຍິງລາວ ສະໄໝທີ IX ຮອບທີ 1 ຢ່າງເປັນປະຊາທິປະໄຕ.
(ຂ່າວ: ໄຊຈະເລີນ)
ຄໍາເຫັນ