2 ຫົວໜ່ວຍທຸລະກິດຂອງເມືອງທຸລະຄົມໄດ້ຮັບກາໝາຍສິນຄ້າODOP

ພິທີປະກາດການນໍາໃຊ້ກາໝາຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ (ODOP) ຂອງເມືອງທຸລະຄົມ ແຂວງວຽງຈັນ ຈັດຂຶ້ນເມື່ອບໍ່ດົນມານີ້ ທີ່ເມືອງທຸລະຄົມໂດຍການເປັນປະທານຮ່ວມຂອງທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ, ທ່ານ ຄໍາເພັດ ທອງພາລິດ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງວຽງຈັນ, ມີພາກສ່ວນກ່ຽວຂ້ອງເຂົ້າຮ່ວມ.
    ທ່ານ ບົວວັນ ຊາມຸນຕີ ຫົວໜ້າຫ້ອງການອຸດສາຫະກໍາ ແລະ ການຄ້າ ເມືອງທຸລະຄົມ ໄດ້ລາຍງານວຽກງານຊຸກຍູ້ສິນຄ້າ ODOP ແຫ່ງຊາດ ໃນໄລຍະຜ່ານມາຊຶ່ງໄດ້ວາງເປົ້າໝາຍຊຸກຍູ້ 2 ຫົວໜ່ວຍທຸລະກິດໄດ້ຈັດພິທີປະກາດຮັບຮອງໃນຄັ້ງນີ້, ຈາກນັ້ນ ທ່ານ ຄໍາບູ່ ສີຈັນທອນ ອໍານວຍການໂຮງງານຜະລິດຢາສະໝຸນໄພພື້ນເມືອງລາວ ບ້ານຫາດໄຊໄດ້ລາຍງານປະຫວັດຄວາມເປັນມາຂອງຢາພື້ນເມືອງລາວ, ການຜະລິດຢາພື້ນເມືອງປົວພະຍາດຂອງໂຮງງານພື້ນເມືອງລາວ ບ້ານຫາດໄຊ, ພ້ອມທັງຮັບຟັງການລາຍງານຄວາມເປັນມາຂອງການຜະລິດນົມສາລີຫວານ ຈາກ ທ່ານ ບຸນປະເສີດ ເທບວົງສາຜູ້ອຳນວຍການໂຮງງານລາວອຸດສາຫະກໍາ ແລະ ກະສິກໍາ ຈໍາກັດ.
    ທ່ານ ພອນໄຊ ລາດຊະວົງ ຫົວໜ້າຂະແໜງສົ່ງເສີມວິສາຫະກິດ ແລະ ການຄ້າ ພະແນກອຸດສາຫະກໍາ ແລະ ການຄ້າແຂວງ ໄດ້ຂຶ້ນຜ່ານໃບອະນຸຍາດນໍາໃຊ້ກາໝາຍໜຶ່ງເມືອງໜຶ່ງຜະລິດຕະພັນແຫ່ງຊາດ ຫຼື ODOP, ໃນນັ້ນຜະລິດຕະພັນຂອງໂຮງງານຜະລິດຢາສະໝຸນໄພພື້ນເມືອງລາວປະກອບມີ  4 ລາຍການ ຄື: ຢາປິ່ນປົວກະເພາະ, ຢາປິ່ນປົວລໍາໄສ້, ຢາປິ່ນປົວມະເຮັງມົດລູກ, ຢາປິ່ນປົວກ້ອນເບົ້າ; ສໍາລັບຜະລິດຕະພັນຂອງໂຮງງານລາວອຸດສາຫະກໍາ ແລະ ກະສິກໍາຈໍາກັດ ໄດ້ຮັບກາໝາຍໜຶ່ງລາຍການ ຄື: ນົມສາລີຫວານ. ພິທີມອບໃບອະນຸຍາດນໍາໃຊ້ກາໝາຍຂອງ 2 ຫົວໜ່ວຍ ໂດຍແມ່ນ ທ່ານ ເຈົ້າເມືອງ ແລະ ທ່ານຮອງຫົວໜ້າພະແນກອຸດສາຫະກຳແລະການຄ້າແຂວງວຽງຈັນ.
ຂ່າວ-ພາບ: ເມືອງທຸລະຄົມ