ກຸ່ມບໍລິສັດທາງລົດໄຟແຫ່ງຊາດຈີນ ຈຳກັດແຈ້ງໃຫ້ຮູ້ວ່າ: ມາຮອດວັນທີ 2 ທັນວາ 2023, ທາງລົດໄຟລາວ-ຈີນ ໄດ້ເປີດບໍລິການຄົບຮອບ 2 ປີ ຊຶ່ງລວມທັງໝົດແລ້ວໄດ້ຂົນສົ່ງຜູ້ໂດຍສານ 24 ລ້ານ 2 ແສນເທື່ອຄົນ, ຂົນສົ່ງສິນຄ້າ 29 ລ້ານ 1 ແສນໂຕນ ຊຶ່ງໄດ້ເສີມຂະຫຍາຍບົດບາດທີ່ເປັນຊ່ອງທາງຄຳດ້ານການຂົນສົ່ງນັບມື້ນັບພົ້ນເດັ່ນຂຶ້ນ.
ນັບແຕ່ເປີດດຳເນີນງານສອງປີຜ່ານມາ, ທາງລົດໄຟລາວ-ຈີນ ຊາວງຜ່ານພາຍໃນປະເທດຈີນໄດ້ເປີດຂະບວນລົດໄຟໂດຍສານ 51 ຖ້ຽວຕໍ່ມື້, ມື້ສູງສຸດໄດ້ຂົນສົ່ງຜູ້ໂດຍສານ 83.000 ເທື່ອຄົນ ແລະ ຂົນສົ່ງຜູ້ໂດຍສານທັງໝົດ 20,46 ລ້ານເທື່ອຄົນ. ຂະບວນລົດໄຟໂດຍສານທີ່ແລ່ນຕາມທາງລົດໄຟ ຊ່ວງຜ່ານພາຍໃນປະເທດລາວໄດ້ຈາກ 4 ຖ້ຽວຕໍ່ມື້ໃນຕອນເລີ່ມຕົ້ນເພີ່ມຂຶ້ນເປັນ 10 ຖ້ຽວຕໍ່ມື້ໃນປັດຈຸບັນ, ມື້ສູງສຸດໄດ້ຂົນສົ່ງຜູ້ໂດຍສານ 10.197 ເທື່ອຄົນ ແລະ ຂົນສົ່ງຜູ້ໂດຍສານທັງໝົດ 3,74 ລ້ານເທື່ອຄົນ. ນັບແຕ່ເປີດດຳເນີນງານຂະບວນລົດໄຟໂດຍສານສາກົນໃນວັນທີ 13 ເມສາ 2023 ເປັນຕົ້ນມາ, ໄດ້ຂົນສົ່ງຜູ້ໂດຍສານຂ້າມຊາດທັງໝົດ 95.000 ກວ່າເທື່ອຄົນຈາກ 72 ປະເທດ ແລະ ເຂດແຄວ້ນ. ຜະລິດຕະພັນທີ່ຂົນສົ່ງຕາມຂະບວນລົດໄຟຂ້າມຊາດກໍໄດ້ເພີ່ມຂຶ້ນຢ່າງບໍ່ຢຸດຢັ້ງ, ການຂົນສົ່ງສິນຄ້າຕາມຂະບວນລົດໄຟຂົນສົ່ງສິນຄ້າສາກົນ “ຈີນ-ເອີຣົບ+ສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ຕາມສະຖານີທີ່ກຳນົດໄວ້, ເວລາທີ່ກຳນົດໄວ້ ແລະ ຖ້ຽວລົດທີ່ກຳນົດໄວ້ໄດ້ໄປເຖິງ 12 ປະເທດໃນການຮ່ວມກັນສ້າງ “ໜຶ່ງແລວ ໜຶ່ງເສັ້ນທາງ” ເຊັ່ນ: ລາວ, ໄທ, ຫວຽດນາມ ແລະ ມຽນມາ ເປັນຕົ້ນ, ພ້ອມທັງ 31 ແຂວງ (ເຂດປົກຄອງຕົນເອງ ແລະ ນະຄອນ) ຂອງຈີນ. ຕັ້ງໜ້າຄົ້ນຄວ້າຮູບແບບການຂົນສົ່ງສາກົນຕ່າງໆເຊັ່ນ: ຂະບວນລົດໄຟຂົນສົ່ງສິນຄ້າສາກົນ “ຈີນ-ເອີຣົບ+ສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ເປັນຕົ້ນ, ເຮັດໃຫ້ການຂົນສົ່ງສິນຄ້າຈາກລາວ ແລະ ໄທໄປເຖິງບັນດາປະເທດເອີຣົບໂດຍກົງໄດ້ໃຊ້ເວລາພຽງ 15 ວັນເທົ່ານັ້ນ.
ການຂົນສົ່ງສິນຄ້າຂອງທາງລົດໄຟລາວ-ຈີນຈາກ 10 ກວ່າຊະນິດໃນໄລຍະຫາກໍ່ເປີດດຳເນີນງານເຊັ່ນ: ຢາງພາລາ, ປຸ໋ຍເຄມີ ແລະ ສັບພະສິນຄ້າເພີ່ມຂຶ້ນເປັນ 2.700 ກວ່າຊະນິດໃນປັດຈຸບັນເຊັ່ນ: ເຄື່ອງເອເລັກໂຕຣນິກ, ຜະລິດຕະພັນຜະລິດໄຟຟ້າດ້ວຍແສງຕາເວັນ, ໂທລະຄົມ ແລະ ລົດເປັນຕົ້ນ ຊຶ່ງໄດ້ນຳເອົາການພັດທະນາຂອງເຂດເສດຖະກິດຕ່າງໆເຊັ່ນ: ເຂດເສດຖະກິດກວມລວມໄຊເຊດຖາ, ເຂດເສດຖະກິດພິເສດບໍ່ເຕ່ນເປັນຕົ້ນ. ພາກສ່ວນທາງລົດໄຟລາວ-ຈີນ ໄດ້ຕັ້ງໜ້າຮ່ວມມືກັນ ໃນຂະແໜງການທ່ອງທ່ຽວ, ໄດ້ເປີດເສັ້ນທາງທ່ອງທ່ຽວຫຼາຍສາຍຢູ່ລະຫວ່າງນະຄອນຄຸນໝິງກັບນະຄອນຫຼວງວຽງຈັນ.
ໃນຂະນະດຽວກັນ, ທາງລົດໄຟລາວ-ຈີນ ຍັງໄດ້ອອກແຮງອົບຮົມຜູ້ມີຄວາມຮູ້ຄວາມສາມາດດ້ານທາງລົດໄຟໃຫ້ແກ່ປະເທດລາວ, ພະນັກງານລາວ 800 ກວ່າຄົນຂອງບໍລິສັດທາງລົດໄຟລາວ-ຈີນໃນນັ້ນມີ 90% ຂຶ້ນໄປໄດ້ມີຕຳແໜ່ງງານແລ້ວ, ໄດ້ເຂົ້າຮ່ວມການດຳເນີນງານຂອງທາງລົດໄຟລາວ-ຈີນ ແລະ ກາຍເປັນຜູ້ມີຄວາມຮູ້ຄວາມສາມາດດ້ານເຕັກນິກທາງລົດໄຟຮຸ່ນທຳອິດຂອງປະເທດລາວ.
ນັກຂ່າວ: ຫຼຽວຈືຢູ ບັນນາທິການ: Yang Chunmei
ຄໍາເຫັນ