ຜ່ານການຈັດຕັ້ງປະຕິບັດຈັກເກັບລາຍຮັບໝົດປີ 2025 ສາມາດປະຕິບັດໄດ້ 634,652 ລ້ານກີບ, ເທົ່າກັບ 159.46% ຂອງແຜນການປີ, ເພີ່ມຂຶ້ນ 59.46% ຫຼື ເປັນເງິນ ເທົ່າກັບ 236,652 ລ້ານກີບ. ສົມທຽບໃສ່ໄລຍະດຽວກັນຂອງປີຜ່ານມາ 357,161 ລ້ານກີບ, ເທົ່າກັບ 177.69% ເພີ່ມຂຶ້ນ 77.69% ຫຼື ເທົ່າກັບ 277,490 ລ້ານກີບ. ລາຍຮັບສ່ວນຫຼາຍແມ່ນໄດ້ຈາກ ການສົ່ງອອກແຮ່ທາດຕ່າງໆ, ການນໍາເຂົ້ານໍ້າມັນເຊື້ອໄຟ, ເຄື່ອງອຸປະໂພກ-ບໍລີໂພກ, ຄ່າທໍານຽມຕ່າງໆ ແລະ ສິນຄ້າໃນໝວດອື່ນໆ ແຕ່ກວມເອົາອັດຕາສ່ວນໜ້ອຍ.
ທ່ານ ສຸພັດ ສຸແສງໄທ ກ່າວຕື່ມວ່າ: ດ້ານຂໍ້ສະດວກໃນການຈັດຕັ້ງປະຕິບັດແຜນການຈັດເກັບລາຍຮັບໃນປີຜ່ານມາຍ້ອນມີການຊີ້ນໍາ-ນໍາພາຂອງຄະນະພັກ, ຄະນະດ່ານ ນັບແຕ່ສາຍຕັ້ງກົມພາສີກໍຄືກະຊວງການເງິນອຳນາດການປົກຄອງທ້ອງຖິ່ນຕ່າງໆ ກໍໄດ້ໃຫ້ການຊີ້ນຳ ແລະ ອຳນວຍຄວາມສະດວກໃຫ້ການຮ່ວມມືໃນການຈັດຕັ້ງປະຕິບັດໜ້າທີ່ວິຊາສະເພາະຂອງຂະແໜງພາສີ ເພືອເຮັດຕາມພາລະບົດບາດສິດ ແລະ ໜ້າທີ່ຂອງຕົນໃນການຈັດເກັບລາຍຮັບໃຫ້ປະສົບຜົນສຳເລັດຕາມລະດັບຄາດໝາຍ ແລະ ລື່ນຄາດໝາຍ, ຍ້ອນມີກົດໝາຍ ແລະ ລະບຽບການ, ບັນດານິຕິກໍາຕ່າງໆໃນແຕ່ລະໄລຍະເປັນບ່ອນອີງໃນການຈັດຕັ້ງປະຕິບັດ, ຍ້ອນມີອຸປະກອນເຄື່ອງມືທີ່ທັນສະໄໝ ຊຶ່ງເປັນສິ່ງທີ່ອໍານວຍຄວາມສະດວກໃຊ້ເຂົ້າໃນການບໍລິການດ້ານວຽກງານວິຊາສະເພາະ, ຍ້ອນມີພະນັກງານທີ່ມີຄວາມຮູ້, ຄວາມສາມາດ ແລະ ມີການພັດທະນາໃນການນໍາໃຊ້ເຄື່ອງມືທີ່ທັນສະໄໝເຂົ້າໃສ່ວຽກງານທີ່ຕົນຮັບຜິດຊອບ ບວກໃສ່ກັບຄວາມຫ້າວຫັນ, ບຸກບືນຂອງພະນັກງານ ຈິ່ງເຮັດໃຫ້ວຽກງານປະສົບຜົນສໍາເລັດເປັນຢ່າງດີ.
ດ້ານຂໍ້ຫຍຸ້ງຍາກ ພື້ນຖານໂຄງລ່າງຂອງດ່ານພວກເຮົາຍັງບໍ່ທັນສະດວກ, ໂດຍສະເພາະດ່ານພວກເຮົາຍັງບໍ່ທັນມີສາງກວດກາສິນຄ້າ (ສາງຫົ່ມ) ຍັງເປັນສາງກາງແປນ ຊຶ່ງມີຄວາມຫຍຸ້ງຍາກໃນການກວດກາສິນຄ້າ ແລະ ການເກັບມ້ຽນສິນຄ້າ, ລະບົບໄຟຟ້າຢູ່ດ່ານຍັງບໍ່ທັນສົມບູນ ຊຶ່ງພາໃຫ້ລະບົບສັນຍານຕິດຂັດໄປນໍາກັນ, ເຮັດໃຫ້ການບໍລິການຊັກຊ້າ, ເສຍເວລາ, ການດໍາເນີນການດ້ານວຽກງານພາສີມີການສະຫງັກ ເພື່ອລໍຖ້າການແກ້ໄຂ, ລະບົບເສັ້ນທາງຄົມມະນາຄົມຍັງບໍ່ສະດວກ, ມີການເປ່ເພ ໂດຍສະເພາະໄລຍະທາງຈາກທ່າແຂກມາຫາຈຸດຊາຍແດນ ແມ່ນກໍາລັງກໍ່ສ້າງໃໝ່.
ສໍາລັບໃນປີ 2026 ສະເພາະດ່ານພາສີສາກົນນາເພົ້າ: ໄດ້ຮັບຕົວເລກມອບໝາຍຈາກ ກະຊວງການເງິນ, ກົມພາສີ ຈໍານວນ 643,209,000,000 ກີບ, ເພີ່ມຂຶ້ນ 61.61% ຂອງປີຜ່ານມາ ຫຼື ເທົ່າກັບ 245,209,000,000 ກີບ.
(ຂ່າວ-ພາບ: ແດງສະຫວັດ ແສນພານິດ)
ຄໍາເຫັນ