 |
ຕາມບົດລາຍງານຂອງຄະນະກຳມະການຄຸ້ມຄອງໄພພິບັດຂັ້ນແຂວງ ເລກທີ 264, ລົງວັນທີ 21 ເມສາ 2026ໃຫ້ຮູ້ວ່າ: ທົ່ວແຂວງສາລະວັນ ໄດ້ເກີດມີອັກຄີໄພ (ໄຟໄໝ້ເຮືອນ) 5 ຄັ້ງ, ໃນນັ້ນເກີດຂຶ້ນຢູ່ບ້ານບຶງໄຊ ແລະ ບ້ານໜອງບົວ ຂອງເມືອງສາລະວັນ 2 ຄັ້ງ, ບ້ານພິນເຊ ແລະ ບ້ານກາເລງເມືອງສະໝ້ວຍ ແລະ ເມືອງຕະໂອ້ຍ 1 ຄັ້ງ, ໃນຈໍານວນ 13 ຫຼັງຄາເຮືອນ, ສົ່ງຜົນກະທົບຊີວິດການເປັນຢູ່ໃນ 14 ຄອບຄົວ ມູນຄ່າເສຍຫາຍ 1,746 ລ້ານກີບ ແລະ ໄດ້ຮັບຜົນກະທົບຈາກພາຍຸລະດູຮ້ອນ ຈໍານວນ 19 ບ້ານ, ໃນ 5 ຕົວເມືອງ ຄື: ເມືອງຕຸ້ມລານ 2 ບ້ານ, ເມືອງຄົງເຊໂດນ 3 ບ້ານ, ເມືອງວາປີ 1 ບ້ານ, ລະຄອນເພັງ 8 ບ້ານ ແລະ ເມືອງສະໝ້ວຍ 5 ບ້ານ ເຮັດໃຫ້ເຮືອນປະຊາຊົນ ໄດ້ຮັບຄວາມເສຍຫາຍທັງໝົດ 143 ຫຼັງຄາເຮືອນ ມູນຄ່າເສຍຫາຍປະມານ 411 ລ້ານກີບ ແລະ ເກີດເຫດການຟ້າຜ່າຢູ່ບ້ານອີເລີງເມືອງເລົ່າງາມ ຊຶ່ງເປັນເຫດການທີ່ໜ້າສະຫຼົດໃຈເຮັດໃຫ້ເດັກນ້ອຍເສຍຊີວິດ 2 ລາຍ.
ພາຍຫຼັງເກີດເຫດ, ຄະນະກໍາມະການຄຸ້ມຄອງໄພພິບັດແຂວງສາລະວັນ ກໍໄດ້ສົມທົບກັບເມືອງ ພ້ອມດ້ວຍກຳລັງ ປກຊ, ຊາວໜຸ່ມ ແລະ ຂະແໜງການທີ່ກ່ຽວຂ້ອງໄດ້ຮີບຮ້ອນລົງພື້ນທີ່ເພື່ອຊ່ວຍເຫຼືອຄອບຄົວທີ່ໄດ້ຮັບຜົນກະທົບຈາກໄພພິບັດຕ່າງໆ ເພື່ອກອບກູ້ເອົາຊີວິດ ແລະ ຊັບສິນ ຂອງປະຊາຊົນ, ທັງໄດ້ເລັ່ງໃຫ້ການຊ່ວຍເຫຼືອໃນການເກັບມ້ຽນສິ່ງຂອງ, ສ້ອມແປງທີ່ຢູ່ອາໄສ ແລະ ຕິດຕາມຊ່ວຍເຫຼືອເບື້ອງຕົ້ນ ພ້ອມທັງໃຫ້ກໍາລັງໃຈຜູ້ທີ່ໄດ້ຮັບຜົນກະທົບ.
 |
ປັດຈຸບັນ, ໄດ້ມອບເຄື່ອງອຸປະໂພກ-ບໍລິໂພກ ແລະ ເງິນສົດເພື່ອຊ່ວຍເຫຼືອໃນການສ້ອມແປງເຮືອນຢ່າງຮີບດ່ວນ ແລະ ຟື້ນຟູຊີວິດການເປັນຢູ່ໃຫ້ກັບມາເປັນປົກກະຕິໂດຍໄວ. ຕໍ່ກັບສະພາບການດັ່ງກ່າວ, ແຈ້ງເຕືອນໃຫ້ພໍ່ແມ່ປະຊາຊົນຈົ່ງມີສະຕິລະວັງຕົວ ແລະ ຕິດຕາມສະພາບອາກາດເນື່ອງຈາກຍັງຢູ່ໃນໄລຍະ ທີ່ມີຄວາມສ່ຽງເຫດພາຍຸລະດູຮ້ອນ ເພື່ອກຽມພ້ອມຮັບມືໄດ້ທັນການ.
(ຂ່າວ: ວິໄລວອນ ສິດທິໄຊ)
ຄໍາເຫັນ