ສໍາລັບຜູ້ອອກແຮງງານລາວ ກໍມີສິ່ງທ້າທາຍຫຼາຍດ້ານ ຄືກັນກັບຜູ້ອອກແຮງງານຢູ່ໃນບັນດາປະເທດຕ່າງໆໃນທົ່ວໂລກ ແລະ ອາຊຽນ ຊຶ່ງສະແດງອອກໃນສະຖິຕິປີ 2024 ມີຈຳນວນຜູ້ອອກແຮງງານລາວທີ່ໄປອອກແຮງງານຢູ່ຕ່າງປະເທດທັງໝົດ 97,965 ຄົນ ຍິງ 52,827; ໃນນັ້ນ, ໄປອອກແຮງງານຢູ່ປະເທດໄທ 91,682 ຄົນຍິງ 50,306 ຄົນ; ໄປອອກແຮງງານຢູ່ຍີ່ປຸ່ນ 671 ຄົນ ຍິງ 243 ຄົນ; ໄປເກົາຫຼີອອກແຮງງານປະຈໍາ EPS 1,540 ຄົນ ຍິງ 141 ຄົນ; ອອກແຮງງານຕາມລະດູການ 4,072 ຄົນ ຍິງ 12,137 ຄົນ; ສະຖິຕິ 3 ເດືອນ ຕົ້ນປີ 2025 ມີຜູ້ອອກແຮງງານລາວໄປອອກແຮງງານຢູ່ຕ່າງປະເທດລວມທັງໝົດ 76,664 ຄົນ ຍິງ 42,553 ຄົນ; ໃນນັ້ນ, ມີຜູ້ອອກແຮງງານລາວທີ່ໄປອອກແຮງງານຢູ່ປະເທດໄທມີ 73,311 ຄົນ ຍິງ 41,569 ຄົນ; ໄປອອກແຮງງານຢູ່ປະເທດຍີ່ປຸ່ນມີ 267 ຄົນ ຍິງ 105 ຄົນ; ໄປເກົາຫຼີ 3,086 ຄົນ ຍິງ 879 ຄົນ ຊຶ່ງມີທັງໄປອອກແຮງງານປະຈໍາ 518 ຄົນ ຍິງ 220 ຄົນ; ໄປອອກແຮງງານຕາມລະດູການ 2,568 ຄົນ ຍິງ 659 ຄົນ ອີງຕາມຂໍ້ມູນຈາກກະຊວງແຮງງານ ແລະ ສະຫວັດດີການສັງຄົມ.
ສະຫະພັນກຳມະບານລາວໄດ້ຮ່ວມກັບຄະນະກຳມະການແຮງງານແຫ່ງຊາດ ໄດ້ແກ້ໄຂຂໍ້ຂັດແຍ່ງດ້ານແຮງງານ, ທວງເງິນຄ່າແຮງງານໃຫ້ຜູ້ອອກແຮງງານ; ໄດ້ຄົ້ນຄວ້າ ແລະ ນໍາສະເໜີປັບປຸງຄ່າແຮງງານຂັ້ນຕໍ່າໃຫ້ແກ່ຜູ້ອອກແຮງງານລາວໄດ້ທັງໝົດ 10 ຄັ້ງ ໂດຍເລີ່ມຈາກ 26,000 ກີບຂຶ້ນມາເປັນ 1,600,000 ກີບ, ເລີ່ມຈັດຕັ້ງປະຕິບັດແຕ່ວັນທີ 1 ຕຸລາ 2023 ເປັນຕົ້ນມາ; ນອກຈາກນັ້ນ, ກໍໄດ້ສະເໜີເງິນອຸດໜູນຄ່າຄອງຊີບໃຫ້ແກ່ຜູ້ອອກແຮງງານທີ່ມີລາຍໄດ້ຕໍ່າ 900,000 ກີບຕໍ່ຄົນຕໍ່ເດືອນ ຊຶ່ງລວມທັງຄ່າແຮງງານ ແລະ ເງິນອຸດໜູນເປັນ 2,500,000 ກີບຕໍ່ຄົນຕໍ່ເດືອນ ເລີ່ມປະຕິບັດແຕ່ວັນທີ 1 ຕຸລາ 2024 ເປັນຕົ້ນມາ. ຂ່າວ: ພູວັນ
ຄໍາເຫັນ