ພະແນກການເງິນ ແຂວງອຸດົມໄຊ ຍົກລະດັບວຽກງານການເງິນ ກ້າວສູ່ດີຈີຕອນ

ການຝຶກອົບຮົມຄັ້ງນີ້, ເພື່ອສ້າງຄວາມເຂັ້ມແຂງໃຫ້ແກ່ບຸກຄະລາກອນດ້ານການເງິນ ໃຫ້ມີທັກສະ ແລະ ຄວາມຊຳນານງານໃນການນຳໃຊ້ເຄື່ອງມືທີ່ທັນສະໄໝ ເຂົ້າໃນການປະຕິບັດໜ້າທີ່ວຽກງານຕົວຈິງ. ຊຶ່ງລະບົບ LIFMIS ນີ້ ຖືເປັນລະບົບຫຼັກທີ່ຈະເຂົ້າມາມີບົດບາດໃນການຄຸ້ມຄອງຂໍ້ມູນຂ່າວສານການເງິນພາກລັດ ເພື່ອໃຫ້ມີຄວາມເປັນເອກະພາບໃນຂອບເຂດທົ່ວແຂວງ ແລະ ທົ່ວປະເທດ. ໃນໄລຍະຝຶກອົບຮົມ, ຜູ້ເຂົ້າຮ່ວມໄດ້ຮຽນຮູ້ ແລະ ຝຶກປະຕິບັດຕົວຈິງໃນຫຼາຍຫົວຂໍ້ສຳຄັນ ເປັນຕົ້ນ: ການນຳໃຊ້ລະບົບ Smart Cash ເຂົ້າໃນການບໍລິຫານງົບປະມານ ເພື່ອເພີ່ມຄວາມຄ່ອງຕົວໃນການຈັດຕັ້ງປະຕິບັດ, ການວາງແຜນງົບປະມານ ແລະ ການບັນທຶກລາຍຮັບ-ລາຍຈ່າຍ ຜ່ານລະບົບດີຈີຕອນ ທີ່ມີຄວາມຊັດເຈນ ແລະ ສາມາດຕິດຕາມໄດ້ຕະຫຼອດເວລາ. ນອກຈາກນີ້, ຍັງໄດ້ທົດສອບການນຳໃຊ້ເຄື່ອງມືລາຍງານຂໍ້ມູນການເງິນ ເພື່ອຮັບປະກັນການສັງລວມຕົວເລກໃຫ້ມີຄວາມຖືກຕ້ອງຕາມຫຼັກການບັນຊີ ແລະ ທັນກັບກຳນົດເວລາ. ການຫັນປ່ຽນຈາກການເຮັດວຽກແບບເດີມ ໄປສູ່ການນຳໃຊ້ລະບົບດີຈີຕອນໃນຄັ້ງນີ້ ຈະຊ່ວຍໃຫ້ການຄຸ້ມຄອງການເງິນພາກລັດຂອງແຂວງອຸດົມໄຊມີຄວາມວ່ອງໄວ, ໂປ່ງໃສ ແລະ ສາມາດກວດສອບໄດ້ໃນທຸກຂັ້ນຕອນ. ທີ່ສຳຄັນແມ່ນຈະຊ່ວຍຫຼຸດຜ່ອນຂັ້ນຕອນທີ່ຫຍຸ້ງຍາກ, ປ້ອງກັນການຮົ່ວໄຫຼຂອງງົບປະມານ ແລະ ເປັນການຍົກສູງປະສິດທິພາບໃນການບໍລິຫານລັດ ຕາມທິດທາງການຫັນເປັນທັນສະໄໝ ຂອງກະຊວງການເງິນ ວາງອອກ, ແນໃສ່ເຮັດໃຫ້ການຈັດເກັບລາຍຮັບ ແລະ ການຄຸ້ມຄອງລາຍຈ່າຍງົບປະມານແຫ່ງລັດ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.

(ຂ່າວ: ແສງອາທິດ)