ກຽມສ້າງທາງເບຕົງເສີມເຫຼັກ ແລະ ປ້ອງກັນຕາຝັ່ງເຈື່ອນທົ່ວນະຄອນຫຼວງວຽງຈັນ

ໂດຍການເປັນປະທານ ຂອງທ່ານ ສີລິລາດທົງສີນ ທອງເພັງ ປະທານຄະນະກຳມະການປົກຄອງນະຄອນຫຼວງວຽງຈັນ,ມີທ່ານ ບຸນຍະວັດ ນິຣະໄຊ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ, ມີບັນດາຜູ້ອຳນວຍການໃຫຍ່,ປະທານບໍລິສັດ,ແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ສຳລັບໂຄງການກໍ່ສ້າງເສັ້ນທາງເບຕົງເສີມເຫຼັກປະກອບມີເຂດເມືອງຈັນທະບູລີ,ເມືອງໄຊເສດຖາ,ເມືອງໄຊທານີ,ເມືອງສີໂຄດຕະບອງ,ເມືອງນາຊາຍທອງ,ເມືອງຫາດຊາຍຟອງ ແລະ ເມືອງປາກງື່ມ ນະຄອນຫຼວງວຽງຈັນ ຈຳນວນ 15 ໂຄງການ,ລວມຄວາມຍາວທັງໝົດ 93.14 ກິໂລແມັດ. ແລະ ໂຄງການ ກໍ່ສ້າງປ້ອງກັນຕາຝັງເຈື່ອນແຄມນ້ຳຂອງ ເຂດບ້ານອ່າງໃຫຍ່ ເມືອງສີໂຄດຕະບອງ ແລະ ບ້ານຖີ່ນເພຍ-ບ້ານທ່າແຂກ ເມືອງຫາດຊາຍຟອງ ນະຄອນຫຼວງວຽງຈັນ ຈຳນວນ 4 ໂຄງການ,ລວມຄວາມຍາວທັງໝົດ 3.76 ກິໂລແມັດ,ເຊິ່ງເປັນການເຊັນສັນຍາລະຫວ່າງ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ແລະ ບໍລິສັດ PSL ກໍ່ສ້າງຄົບວົງຈອນ ຈຳກັດຜູ້ດຽວ,ບໍລິສັດ ເຮືອງຈະເລີນກໍ່ສ້າງຄົບວົງຈອນ ແລະ ຂາເຂົ້າ-ຂາອອກ ຈຳກັດຜູ້ດຽວ,ບໍລິສັດ ໄຊຈະເລີນຊັບ ກໍ່ສ້າງສ້ອມແປງເຄຫາສະຖານ ຈຳກັດຜູ້ດຽວ,ບໍລິສັດວຽງວອນ ຈຳກັດຜູ້ດຽວ ແລະ ບໍລິສັດ ດາວພວນ ຈຳກັດຜູ້ດຽວ.
ສຳລັບ 2 ໂຄງການນີ້ເປັນບຸລິມະສິດຂອງລັດຖະບານ ເປົ້າໝາຍໃນ ປັບປຸງກໍ່ສ້າງເສັນທາງເພື່ອອຳນວຍຄວາມສະດວກໃນການສັນຈອນທາງບົກ ແລະ ປ້ອງກັນຕາຝັ່ງເຈື່ອນ ແລະ ໄພພິບັດ. ຖ້າໂຄງການນີ້ສຳເລັດ ມັນຈະຊ່ວຍສ້າງຄວາມໝັ້ນຄົງໃຫ້ແກ່ເນື້ອທີ່ທຳການຜະລິດ ແລະ ເຮືອນຊານຂອງປະຊາຊົນຢູ່ລຽບແຄມນ້ຳຂອງ ພ້ອມທັງເປັນການຍົກລະດັບພື້ນຖານໂຄງລ່າງໃຫ້ເຂັ້ມແຂງ.
ທ່ານ ນາງ ສຸດານີ ແພງຄຳມີ ຮອງຜູ້ອຳນວຍການບໍລິສັດ PSL ກໍ່ສ້າງຄົບວົງຈອນ ຈຳກັດຜູ້ດຽວໄດ້ຕາງໜ້າບັນດາບໍລິສັດທີ່ເຂົ້າຮ່ວມເຊັນສັນຍາກ່າວວ່າ: ບໍລິສັດຈະເອົາໃຈໃສ່ສຸມທຸກສະຕິປັນຍາ ແລະ ກຳລັງແຮງ ເຂົ້າໃນການກໍ່ສ້າງ ໂຄງການນີ້ ໃຫ້ດຳເນີນໄປຢ່າງຕໍ່ເນື່ອງ, ຢ່າງເຕັມຂີດຄວາມສາມາດ ເຮັດໃຫ້ທັງສອງໂຄງການສຳເລັດລົງຕາມກຳນົດເວລາທີ່ໄດ້ລະບຸໄວ້ໃນສັນຍາ ເພື່ອເປັນການປະກອບສ່ວນເຂົ້າໃນການພັດທະນາພື້ນຖານໂຄງລ່າງໃຫ້ມີຄວາມເຂັ້ມແຂງ ແລະ ຈະເອົາໃຈໃສ່ຈັດຕັ້ງປະຕິບັດການກໍ່ສ້າງໃຫ້ສຳເລັດ ຕາມກຳນົດເວລາທີ່ໄດ້ລະບຸໄວ້ໃນສັນຍາຢ່າງເຂັ້ມງວດ, ໂດຍຈະເນັ້ນໃສ່ຄຸນນະພາບຂອງວັດສະດຸ ແລະ ເຕັກນິກການກໍ່ສ້າງໃຫ້ໄດ້ມາດຕະຖານຕາມແບບຜັງທີ່ກຳນົດ ເພື່ອໃຫ້ໂຄງການມີຄວາມທົນທານໃນໄລຍະຍາວ.ທ່ານ ກ່າວຕື່ມອີກວ່າ: ການກໍ່ສ້າງເສັ້ນທາງເບຕົງເສີມເຫຼັກ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນໃນຄັ້ງນີ້ ເປັນການຍົກລະດັບຄວາມປອດໄພໃຫ້ແກ່ປະຊາຊົນທີ່ອາໄສຢູ່ບໍລິເວນແຄມນ້ຳ, ທັງເປັນການປັບປຸງທັດສະນີຍະພາບຂອງແຂວງໃຫ້ມີຄວາມສວຍງາມ ແລະ ມີຄວາມເປັນລະບຽບ.