 |
ໄດ້ເຂົ້າຮ່ວມກອງປະຊຸມຄະນະກໍາມາທິການການເມືອງຂອງສະມັດຊາລັດຖະສະພາປະເທດທີ່ໃຊ້ພາສາຝຣັ່ງ ຫຼື ເອພີເອັບ (APF) ແລະ ສໍາມະນາລັດຖະສະພາ ກ່ຽວກັບ “ບົດບາດສໍາຄັນ, ການຄຸ້ມຄອງ ແລະ ການນໍາໃຊ້ ດີຈີຕອນ ແລະ ປັນຍາປະດິດ (AI) ໃນລັດຖະສະພາ” ທີ່ເມືອງຊຽມຣຽບ ຣາຊະອານາຈັກກໍາປູເຈຍ, ມີຄະນະຜູ້ແທນຈາກບັນດາສະມາຊິກ APF 15 ປະເທດ ແລະ ເຂດແຄວ້ນ ເຊັ່ນ: ແບນຊິກ, ກາເມີຣູນ, ກາຕານໂລ, ກົດດີວົວ, ຝຣັ່ງ, ສປປ ລາວ, ລຸກຊໍາບວກ, ມາຣົກ, ໂມຣິຕານີ, ນູແວນ ກາເລໂດນີ, ເກເບັກ, ກົງໂກ, ຣູມານີ, ເຊເນການ, ສະວິດ ແລະ ອົງການຝຣັ່ງໂກໂຟນີສາກົນ (OIF) ແລະ ສູນລັດຖະສະພາອາຊີ (PCAsia). ນອກນັ້ນ, ຍັງມີປະທານຄະນະກຳມາທິການການເມືອງ, ເລຂາທິການໃຫຍ່ ຂອງ APF, ບັນດາສະມາຊິກລັດຖະສະພາ ແລະ ເຈົ້າໜ້າທີ່ກ່ຽວຂ້ອງຂອງປະເທດເຈົ້າພາບ ເຂົ້າຮ່ວມ.
 |
ກອງປະຊຸມຄະນະກໍາມາທິການການເມືອງຂອງ APF ໄດ້ພິຈາລະນາ ແລະ ຮັບຮອງເອົາວາລະກອງປະຊຸມ; ປັບປຸງ ແລະ ຮັບຮອງເອົາບົດບັນທຶກວ່າດ້ວຍການພິຈາລະນາຕົກລົງບົດລາຍງານຂອງກອງປະຊຸມກໍາມາທິການການເມືອງ ທີ່ຈັດຂຶ້ນໃນເດືອນກໍລະກົດ 2025 ທີ່ນະຄອນປາຣີ ປະເທດຝຣັ່ງ; ທົບທວນຄືນ ແລະ ຮັບຮອງເອົາບົດລາຍງານກ່ຽວກັບສະຖານະການທາງດ້ານການເມືອງໃນບັນດາປະເທດທີ່ໃຊ້ພາສາຝຣັ່ງ; ພິຈາລະນາ ແລະ ຮັບຮອງເອົາແຜນປະຕິບັດງານ 2025-2030 ເພື່ອສົ່ງເສີມການຍົກເລີກໂທດປະຫານຊີວິດ ໃນຂົງເຂດບັນດາປະເທດທີ່ໃຊ້ພາສາຝຣັ່ງ; ຮັບຟັງການລາຍງານກ່ຽວກັບສະ ພາບການທາງດ້ານການເມືອງຂອງບັນດາຄະນະ APF ຂອງບັນດາປະເທດທີ່ເປັນສະມາຊິກ. ໃນວາລະນີ້, ຄະນະຜູ້ແທນສະພາແຫ່ງຊາດລາວ ໃນນາມສະມາຊິກສົມບູນຂອງ APF ໄດ້ລາຍງານສະພາບການພົ້ນເດັ່ນທາງດ້ານການເມືອງ ເປັນຕົ້ນການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະມາຊິກສະພາປະຊາຊົນຂັ້ນແຂວງ ຊຸດທີ V ທີ່ຈັດຂຶ້ນໃນເດືອນກຸມພາຜ່ານມາ ແລະ ຜົນສໍາເລັດຂອງກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X. ພ້ອມນັ້ນ, ບັນດາຜູ້ແທນກອງປະຊຸມຍັງໄດ້ແລກປ່ຽນ ແລະ ປຶກສາຫາລືກ່ຽວກັບທັດສະນະຂອງ APF ສຳລັບກອງປະຊຸມສຸດຍອດຝຣັ່ງໂກໂຟນີສາກົນ ຄັ້ງທີ 20 (Le XXe Sommet de la Francophonie): ບົດບາດຂອງ APF ໃນສະຖຽນລະພາບໃນພາກພື້ນ ແລະ ທົ່ວໂລກ ແລະ ຄຳແນະນຳດ້ານນິຕິບັນຍັດເພື່ອນຳໃຊ້ສັນຕິພາບເປັນກົນໄກສຳລັບການພັດທະນາແບບຍືນຍົງ, ຮັບຟັງບົດລາຍງານກ່ຽວກັບການດໍາເນີນວິທີການການໄກ່ເກ່ຍຂໍ້ຂັດແຍ້ງທາງການ ເມືອງໃນປະເທດກົງໂກ ແລະ ຣະວັນດາ; ຮັບຟັງ ແລະ ແລກປ່ຽນຄໍາຄິດຄໍາເຫັນໃນການດໍາເນີນງານຂອງ ຄະນະກຳມາທິການສືບສວນອາຊະຍາກຳທາງການເງິນຂອງສະພາສູງຝຣັ່ງ ກ່ຽວກັບການຕ້ານອາຊະຍາກຳທາງການເງິນ, ອາຊະຍາກຳທີ່ມີການຈັດຕັ້ງ ແລະ ການຫຼີກລ່ຽງມາດຕະການການລົງໂທດສາກົນ; ຄົ້ນຄວ້າພິຈາລະນາຮ່າງບົດລາຍງານກ່ຽວກັບຄວາມປອງດອງແຫ່ງຊາດ ແລະ ຄວາມຍຸຕິທຳ ໃນສະໄໝຂ້າມຜ່ານ; ຮັບຮອງເອົາບົດລາຍງານສະບັບສຸດທ້າຍກ່ຽວກັບການຕ້ານຂ່າວປອມ ແລະ ການກະທໍາໃນຮູບແບບທາງເລືອກ ໃນການສະໜອງທຶນໃຫ້ສື່ມວນຊົນ; ຮັບຮອງເອົາຮ່າງມະຕິກ່ຽວກັບການເພີ່ມທະວີບົດ ບາດຂອງສື່ສາທາລະນະ ໃນການຮັບມືກັບຂ່າວປອມ ແລະ ການປັບປຸງໂຄງສ້າງຂອງສື່ຕ່າງໆ; ປັບປຸງ ແລະ ຮັບຮອງເອົາຮ່າງມະຕິກ່ຽວກັບການສະໝັກເຂົ້າເປັນສະມາຊິກ APF ເພື່ອດໍາລົງຕໍາແໜ່ງຜູ້ສັງເກດການໃນອົງການສະຫະປະຊາຊາດ; ແລກປ່ຽນຄໍາຄິດຄໍາເຫັນກ່ຽວກັບບັນດາເຫດການພົ້ນເດັ່ນທີ່ເກີດຂຶ້ນພາຍໃນພາກພື້ນ ແລະ ທົ່ວໂລກ ໂດຍສະເພາະໃນຂົງເຂດປະເທດທີ່ໃຊ້ພາສາຝຣັ່ງ. ກອງປະຊຸມ ໄດ້ຕົກລົງມອບໃຫ້ປະເທດເບແນັງ ເປັນເຈົ້າພາບຈັດກອງປະຊຸມຄັ້ງຕໍ່ໄປ ໃນປີ 2027 ທີ່ເມືອງໂກໂຕນູ. (ແຫຼ່ງຂ່າວ: ຂປລ)
ຄໍາເຫັນ