ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານ ແລະ ກ່າວເປີດຂອງທ່ານ ເຫຼັກໄຫຼ ສີວິໄລ ລັດຖະມົນຕີກະຊວງ ຍທຂ ວ່າ: ບັນດາໂຄງການກໍ່ສ້າງເສັ້ນທາງພາຍໃນເທດສະບານຕົວເມືອງຊໍາເໜືອ ຊຶ່ງໄດ້ຮັບອະນຸມັດຈາກສະພາແຫ່ງຊາດໃນແຜນລົງທຶນຂອງລັດ ປີ 2025 ໂດຍແມ່ນ ພະແນກ ຍທຂ ເປັນເຈົ້າຂອງໂຄງການ ແລະ ກຸ່ມ ບໍລິສັດ ແສງທອງ ກໍ່ສ້າງ ເປັນຜູ້ຮັບເໝົາ ລວມມີ 3 ສັນຍາ, ໄລຍະເວລາຕາມສັນຍາ 36 ເດືອນ ເລີ່ມແຕ່ເດືອນ 5/2025-5/2028 ໂດຍມີລາຍລະອຽດຄື: ສັນຍາທີ 1. ໂຄງການກໍ່ສ້າງປັບປຸງ ປູຢາງຂົ້ວເສັ້ນທາງເທດສະບານ ແລະ ເສັ້ນທາງສາຍຫຼັກລວງຍາວ 7.3 ກິໂລແມັດ, ໜ້າທາງປູດ້ວຍອັດສະຟານຄອນກຣີດ, ຄວາມກວ້າງໜ້າທາງ 6 ແມັດ - 14 ແມັດ; ສັນຍາທີ 2 ໂຄງການກໍ່ສ້າງປັບປຸງເສັ້ນທາງຊອຍພາຍໃນເທດສະບານເມືອງຊໍາເໜືອ ລວງຍາວ 7.8 ກິໂລແມັດ, ໜ້າທາງປູດ້ວຍເບຕົງເສີມເຫຼັກ ແລະ ອັດສະຟານຄອນກຣີດ, ຄວາມກວ້າງໜ້າທາງ 5 ແມັດ - 10 ແມັດ; ສັນຍາທີ 3 ໂຄງການ ກໍ່ສ້າງປັບປຸງບັນດາເສັ້ນທາງຮ່ອມ ປູຢາງຂົ້ວພາຍໃນເທດສະບານຊໍາເໜືອ, ລວງຍາວ 18 ກິໂລແມັດ, ໜ້າທາງປູດ້ວຍເບຕົງເສີມເຫຼັກ ແລະ ອັດສະຟານຄອນກຣີດ, ຄວາມກວ້າງໜ້າທາງ 4 ແມັດ - 8 ແມັດ; ລວງຍາວທັງໝົດລວມທັງ 3 ສັນຍາ ຈໍານວນ 31.1 ກິໂລແມັດ, ເປັນມູນຄ່າ 943,840,422,486 ກີບ, ຄວາມຄືບໜ້າສະເລ່ຍຮອດປັດຈຸບັນ 8.56% ທຽບກັບສັນຍາເຫັນວ່າຊັກຊ້າກວ່າສັນຍາ 21.9%, ໄລຍະເວລາຕາມສັນຍາ ແມ່ນ 36 ເດືອນ ມາຮອດປັດຈຸບັນເວລາທີ່ຍັງເຫຼືອແມ່ນ 25 ເດືອນ, ປັດຈຸບັນບໍລິສັດດັ່ງກ່າວກໍາລັງຂຸ້ນຂ້ຽວດໍາເນີນການກໍ່ສ້າງ ແລະ ຄາດວ່າຈະສໍາເລັດສົມບູນຕາມກໍານົດເວລາຂອງສັນຍາ.
ທ່ານໃຫ້ຮູ້ຕື່ມວ່າ: ກ່ຽວກັບບັນດາໂຄງການດັ່ງກ່າວ ເປັນໂຄງການກໍ່ສ້າງຢູ່ພາຍໃນເທດສະບານແຂວງ ເປັນເຂດຊຸມຊົນ, ມີຜົນກະທົບ ແລະ ມີການສັນຈອນໄປມາຂ້ອນຂ້າງຫຼາຍ ຊຶ່ງບໍ່ສາມາດເຮັດວຽກຕາມແຜນທີ່ວາງໄວ້ໄດ້ເທົ່າທີ່ຄວນ ເຮັດໃຫ້ການຈັດຕັ້ງປະຕິບັດມີການຊັກຊ້າ ເມື່ອທຽບກັບໄລຍະເວລາຕາມສັນຍາ ແລະ ມີຫາງສຽງຈົ່ມວ່າຂອງສັງຄົມ; ສະພາບເສດຖະກິດທັງພາຍໃນ ແລະ ພາກພື້ນມີການມີການ ເໜັງຕີງ ລາຄານໍ້າມັນ ແລະ ວັດສະດຸໃນທ້ອງຕະຫຼາດມີການເພີ່ມຂຶ້ນ ແລະ ບາງຄັ້ງຄາວບໍ່ມີນໍ້າມັນພຽງພໍຕາມຄວາມຕ້ອງການໃນການຈັດຕັ້ງປະຕິບັດວຽກຕົວຈິງຢູ່ພາກສະໜາມ; ແຮງງານທີ່ມາເຮັດວຽກພົບຄວາມຫຍຸ້ງຍາກ ແຮງງານສ່ວນຫຼາຍແມ່ນປະຊາຊົນທີ່ມາແຕ່ທ້ອງຖິ່ນຕ່າງໆພາຍໃນແຂວງ ຮອດຍາມເຮັດໄຮ່ ເຮັດນາ ຫຼື ມີວຽກຄອບຄົວອື່ນໆກໍພັກ ບໍ່ສາມາດເຮັດວຽກເຕັມເມັດເຕັມໜ່ວຍໄດ້; ດັ່ງນັ້ນ ພະແນກ ຍທຂ ໄດ້ສົມທົບກັບບໍລິສັດທີ່ປຶກສາ ແລະ ບໍລິສັດຮັບເໝົາຈັດກອງປະຊຸມປຶກສາຫາລື ແລະ ໄດ້ເອກະພາບກັນ ກໍານົດແຜນວຽກຄືນໃໝ່ເພື່ອໃຫ້ແທດເໝາະກັບສະພາບຕົວຈິງ ແລະ ເວລາການກໍ່ສ້າງທີ່ຍັງເຫຼືອຢູ່ອີກ 25 ເດືອນ, ໃນການດໍາເນີນແຜນວຽກໃໝ່ນີ້ ພະແນກ ຍທຂ ໄດ້ຊຸກຍູ້ໃຫ້ບໍລິສັດເພີ່ມຈໍານວນກົນຈັກ, ບຸກຄະລະກອນ ແລະ ເວລາເຮັດວຽກ ເພື່ອໃຫ້ການຈັດຕັ້ງປະຕິບັດວຽກສົມດູນກັບໄລຍະເວລາທີ່ຍັງເຫຼືອຕາມສັນຍາ.
ຄໍາເຫັນ